“E miliona tala o le a toe fausia ai vaa na leaga i le sunami”…Minisita o faigafaiva
Ua lē vaai pitotasi le Malo i lana fesoasoani mo le atinae o faigafaiva i le atunuu ae ua tutusa le aufaivaa ‘alia fagota o loo lesitala faaletulafono, ma vaa e lē o lesitalaina. O le fesoasoani a le Malo ua faatatauina ai se vaega tupe e tusa ma le tasi (1) miliona, 72 afe tala mo le toe fausia o ‘alia fagota na faaleagaina i le sunami. “O le agaga autū ma le faamoemoe o le Malo ia toe fesoasoani i le atinae o faigafaiva”, o le finagalo lea o le alii minisita le susuga Tauā Seuala Kitiona Tavaga.
E 16 ‘alia ua lesitala faaletulafono sa faaleagaina i le sunami o le a selesele i le fesoasoani, ae 7 ‘alia fagota e lei lesitalaina. “Ou te faailoa atu i lo outou mamalu ua lē vaai pitotasi le Malo i le fuafuaga lenei, ona e faigata o le sunami na matuā aafia ai le toatele o le atunuu”. O le saunoaga lea a le Minisita ina ua saunoa e faalauiloa le fesoasoani a le Malo i le mafutaga ma le aufaivaa fagota na āfaina o latou vaa i lea mala faalenatura.
O se tasi o tamalii ua leva tausaga o ia faia le atinae o faigafaiva i ona ‘alia fagota le tofa Levaa Sauaso na ia momoli le faafetai i le minisita ma le Malo i le iai o se finagalo alofa i le latou foi galuega o loo fesoasoani ai i le tamaoaiga o le atunuu. “Pau lava lenei lau afioga i le Minisita sei silasila ane i vaa o loo faia le galuega o le la‘uina o tagata i le motu o Manono, o pasi ma taxi ia o loo feoai ai lea vaega o le atunuu”. O le talosaga lea a Levaa i le minisita pe faamata e tau se finagalo o le Malo ae fausia ai ma se vaa ‘alia e faia ai malaga i le va o Manono-uta ma Manono-tai.
O loo fuafua le matagaluega o faatoaga ma faiga faiva e faatino lenei fesoasoani e ala i le tuuina atu o seleni i se pisinisi fau vaa ‘alia fagota e toe fausia ai vaa ua faaleagaina, ma faafou ai vaa e lei āfaina tele. O se faiga o le a lē tuuina atu ai ni vaegatupe i le aufaivaa fagota ae e galulue faatasi le matagaluega ma le pisinisi fauvaa. E faato‘ā tuulima le ‘alia fagota i le faifaiva pe a mae‘a le galuega.
