Fesoasoani le Iunivesite a Otago i fanau aoga a Aukilani

E to‘a sefulutasi le aumalaga mai le Iunivesite a Otago na faatinoina se polokalame fesoasoani mo alo ma fanau aoga a le Pasefika o loo alala ma aumau i Aukilani, e tapena ai mo le ulufale atu i le Iunivesite.

E toaono fanau aoga o loo auai i lea malaga, ma o i latou foi ia o loo nonofo i Aukilani ae ua maua le avanoa e aooga ai i le Iunivesite a Otago.

E toatolu tamaiti o loo faauma a latou faailoga faafomai nifo, o le isi o le tusiata, ma isi o le galuega faafomai.

O lenei ‘au o loo taitaia mai e se tasi o alo o le atunuu le faletua ia Tofilau Nina Kirifi ma o ia foi o loo faauluulu i ai lenei faamoemoe. O loo mafai foi ona faatasi mai ai nisi o alo o Samoa o loo galulue i totonu o le Iunivesite.

O le afiafi o le Aso Gafua 23 o Iuni na faatautaia ai lenei polokalame i le faletalimalo o le Grand Chancellor i Magele. Na faatumulia le maota i mātua ma fanau aoga na agai atu e faalogologo ma molimau lenei fesoasoani tāua.
O le faletua ia Tofilau Nina Kirifi na fai ma fofoga o le po, ma faafeiloaia le mamalu o le atunuu. Na amata i le tatalo na saunia e le susuga i le faafeagaiga ia Victor Pouesi, ma faagasolo ai loa le polokalame.

Ae na saunoa le faletua ia Tofilau o le polokalame muamua lea ua mafai ona faatinoina i Aukilani mo le komiuniti, ae o le tele o latou fesoasoani o loo faagasolo lava i totonu o Otago, Ueligitone ma Kalaiesetete.

Ma o le manulauti foi lea o loo taumafai e tauave, o le fesoasoani i mātua ma fanau i le tapenaga a o lei ulufale atu i le aoga, auā e iai nisi o fanau e o i le aoga ona o taa‘iga, o le mafuaaga lena ua a‘e ai se manatu o le aufaigaluega e faia se polokalame fesoasoani mo Aukilani.

Na ia ta‘ua foi o le 70% o tamaiti aoga i le Iunivesite a Otago o tamaiti mai Aukilani. Na faafiafiaina mātua na auai i lenei faamoemoe ona o le avanoa tāua ua tufa mai ai nei alo o le atunuu i tapenaga mo fanau i le lumanai.

Mamalu o matua ma fanau aoga na molimauina le fesoasoani a le Iunivesite a OtagoFaletua ia Tofilau Nina KirifiTamafanau a le Pasefika o loo aooga ma galulue i le Iunivesite a Otago