Fesoasoani le Future Skills mo Deborah e maua tomai mo se galuega

E lei sologa lelei mea i le amataga mai o le olaga talavou o le tamaitai o Deborah Sefo, e lē pei o nisi talavou, o se mea fiafia le nofotatalia o le aulia o le 21 tausaga, auā ua iai foi ni avanoa lelei ua matala mai mo le laa atu i se isi laasaga mo ni faamanuiaga.
Peitai mo Deborah, sa fai sina faigata o mea mo ia, talu ai lava auga o olaga ua masani ai foi nisi tupulaga talavou, lea na vave ai ona faamuta aoaoga a le tamaitai i le fā tausaga muamua atu a o lei aulia lona 21, ma faapeapea ai lava ona faaletonu atu le tulaga o mea mo ia, ma peiseai ai ua leai se fiafia e faatalitalia le aulia o le tausaga e tausinio uma i ai talavou, o le aulia o le 21 tausaga.
O Deborah o se tamaitai talavou Samoa e nofo i Otahuhu ma e fai se pisinisi a lona aiga; o le mafuaaga foi lena o le lē nofo lelei i lagona o le aiga o le tulaga faaletonu o le olaga o le tamaitai o Deborah, ona o lea e foliga e lē o sosolo lelei mai ia te ia le soifuaga manuia o le aiga i le tulaga o galuega ma pisinisi.
Ae na talisapaia e le tamaitai o Deborah le maumauai o lona aiga e faasa‘o le sese lea na tau agai i ai lona olaga, auā na latou momoli i lenei tamaitai le upu malosi, e lē tuufauina i totonu o le aiga le ituaiga o olaga lea o loo ola ai, ae ua tatau loa ona fai sana fuafuaga e toe faatulaga lelei lona olaga.
O lea, i le tausaga talu ai, 2012 i le masina o Aperila, na agai ai loa Deborah ma saili sona avanoa i le polokalame tau aoaoga a le Future Skills Academy i Manukau, e ave ai lana mataupu mo le National Certificate i mataupu tau Business Administration and Computing – Level 2. O le tusipasi lena e 20 vaiaso e faagasolo ai, ma e faatupe uma lava i le fesoasoani tau tupe mai le malo, lea e mafai ai ona aooga fua fanau talavou e 16 tausaga pe sili atu. O le taulaiga tonu o lenei tusipasi, ina ia maua se tomai e galue ai i tomai tau galuega i totonu o ofisa, i le vaega o loo muai faatoai atu i ai tagata (customer services), le faagaioia atoa o faasologa ma faatulagaga o galuega i totonu o pisinisi ma ofisa (business administration).
O Iuni i le tausaga nei na faamae‘a ai aoaoga a le tamaitai o Deborah, ma o se suiga tele ua iai nei lona olaga, o se tamaitai ua mautu lona faasinomaga ma ana filifiliga ua faatulaga nei, auā ua iai faatasi ma ni tomai ua faaoloaina ai lona sauni atu mo le faatinoina o se galuega.
Tautino le tamaitai mai Otahuhu, o le tomai na ia maua mai lana aoga i le Future Skills Academy, na mafai ai ona lototele e alu e sue sana galuega, lea ua faigaluega ai nei o se office administrator i se kamupani i Otahuhu.
Na faafetaia e le tamaitai le telē o le fesoasoani a lenei aoga mo ia, e lē gata ua maua ai ona tomai mo le faatinoga o galuega, aemaise lava na ia faailoa lona talisapaia o le auala sa fesoasoani ai ona faiaoga ia te ia, ina ia maua tomai, ma maua foi le lagona mautinoa e faatino ai le galuega, o se mea na te lei maua muamua. Na ta‘ua patino e Deborah lona faiaoga o Lesley Heather, o se tamaitai faiaoga sa ese le faamaoni o lona naunau e fesoasoani atu ia te ia. Sa faalaieau ma faamalosiau ia te ia ina ia onosai e faaatoa lelei lana aoga, ma ia aua ne‘i misia se sana vasega i se aso. O le ala foi lea o le tupu a‘e o lagona naunau ia te ia e faamalosi i lana aoga, ona o lona alofa i le vaai atu, e naunau faiaoga e fesoasoani mai foi ia te ia.
E lē gata i galuega i totonu o le potu aoga e faaaoga ai le peni ma le pepa, ae iai foi polokalame e faatino moni ai tomai o loo aoaoina, ina ia matua maua e le fanau aoga le agaga moni ma le foliga moni o le a iai le faatinoga o nei tomai pe afai ae oo ina maua ni a latou galuega i na lava tomai. O le isi lea itu ua sili ai ona fiafia le toatele o tupulaga talavou o loo aoaoina i lenei polokalame a le Future Skills, ona e lē gata ina maua le tusipasi o le faamaoniga ua iai se malamalamaga tele, ae o le tomai faatino ua mafai ona lototele ai le talavou e agai loa e saili se galuega.
Soo se tasi o loo fia maua le tele o tomai e saili ai sana galuega, e mafai e le Future Skills ona avatu na tomai, pe a vili i ai ma fesili mo a latou mataupu o loo avanoa. Telefoni 0800 888 001 pe text INFO i le 244 (texts 20 cents).
Pe asiasi foi i le latou upega o fesootaiga i le www.futureskills.co.nz, ae afai e te latalata ane i le latou tuatusi lenei i le nofoaga tonu o loo faagasolo ai aoga, ona afe loa lea i le 5A Earl Richardson Ave, Manukau.