O loo ua laga finagalo o le Itu Agai le Tautua Samoa e lagolago ai le taumafaiga a le Malo ina ia ave le faatāua i le toe foi o le atunuu i faatoaga auā lava le tausiga o aiga ma le faamautu ai o le laalaa i luma o le tamaoaiga o Samoa.
E faaauau nei vaaiga ae o loo faagasolo le polokalame lea ua amata i lenei tausaga e se faalapotopotoga a le Ekalesia Aso Fitu o le toe Afio Mai, e ta‘ua o le ADRA. O se faalapotopotoga ua galulue mo le faaleleia o soifua o tagata lautele ma e lē na o tagata o le Ekalesia Aso Fitu o loo maua lenei fesoasoani ae o loo faalautele i soo se aiga lava e moomia le fesoasoani a lenei faalapotopotoga.
O le ADRA e i le tele o atunuu o le Lalolagi e pei foi o Niu Sila. O le faalapotopotoga lenei i Samoa lava ia ua faatautaia nei se polokalame e tolu tausaga ua agai atu ai sui o lenei faalapotopotoga, i aiga e laititi le tupe maua ma ofo atu i ai laau mo togalaau. Latou te faatautaia foi aoaoga mo le mautinoa e umi le taimi o ia atinae.
O togalaau nei o le a mafai ai e le aiga ona tausi aiga ae o le isi vaega ua mafai ona agai e faatau atu auā le tupe maua.
E lē gata foi i aiga ae ua iai nisi o faalapotopotoga ma mafutaga i totonu o nuu eseese o Samoa ua faatautaia ai lenei polokalame e pei foi o le Mafutaga a Tina i le Ekalesia Faapotopotoga Kerisiano Samoa i Faleasiu ua faagasolo nei se latou togalaau‘aina tele mai i le fesoasoani lenei ua mafai ona ofo atu e le ADRA.
Faaalia e se pepa faalauiloa a lenei faalapotopotooga, ua silia i le 1000 aiga ua oo i ai lenei fesoasoani ma o le vaavaai a le ADRA o i latou ua amata ona fua mai a latou faatoaga ua maua ai le fesoasoani i pili o fanau aoga, aemaise isi pili e pei o le eletise ma le suavai aemaise lava le tausiga o le aiga.
