Ua ofo atu e le tamaitai loia Samoa, o Iuni Sapolu se fesoasoani mo tamaitai uma e toavalu ia ua molia i faiga faa talitane i Samoa. O lea fesoasoani ua laga e lenei tamaitai loia o loo faamautu lona ofisa i Niu Sila, ona o lona manatu alofa i nei tamaitai.
Faaalia e Sapolu o tusitusiga ua faia faasaga i nei tamaitai ua lagona ai le faanoanoa ona o le tulaga lenei, ua molia tamaitai i le faia o nei faiga ae ua le agai suesuega i alii o loo tapa lenei tautua i totonu o le atunuu.
Faaalia e Iuni Sapolu i se feiloaiga, e manino le finagalo o Samoa i le aoaoina ai i le ola Kerisiano ma le olaga faa-Samoa ma e le talitonu e nofo nofo se tamaitai Samoa agai i nei ituaiga faiga sei vagana ai ua matua le tagolima lava.
Faaalia e Sapolu o lana vaavaai atu i le Tulafono e leai se vaega e ono aafia ai nei tamaitai ona e le o maioio mai le tulafono e faatatau i nei faiga ae o lea na taofia tamaitai mo se taimi umi mai i le tasi ma le afa vaiaso seia oo i le lua vaiaso faato‘a tatala i tua a o tau faamae‘a ai galuega ma suesuega a Leoleo.
O le leai la o se tasi e tali atu i le taofia pea o nei tamaitai na lagona ai le lē fiafia o le tamaitai loia.
“O le lu‘i ua ou ave i le Faamasinoga poo fea le tulai mai mo i latou ua lē tagolima e mafai ai ona totogi se loia e finau mo i latou aua a leai se loia, o le Faamasinoga e tatau ona tulai mai mo nai tagata nei”.
Na maua se avanoa e faatalatalanoa ai nisi o tamaitai na taofia ma na o la ta‘ua ai o le tulai ai i luma o le Faamasinoga faato‘a manino ai loa o faiga faatalitane ua tuuaia ai i latou ae na toe taofia lava i le toese i Tafaigata ona o le talosaga a Leoleo ina ia toe faafoi i latou i le toese ona e leai ni aiga e nonofo tumau ai.
O ni lafoga na teena e nei tamaitai ma na o la ta‘ua e iai o la aiga ae na aumai i laua e leoleo a o tafafao i se tasi o falekalapu i le taulaga.
Na taofia faatasi ma nisi tamaitai ia na ta‘ua e Leoleo na maua i le fanuatanu a le Ekalesia Katoliko i Savalalo o potopoto ai.
O le tulai lona tolu o nei tamaitai i le Faamasinoga na o la ta‘ua ai na toe tapa ai e le Faamasino le afioga Vaepule Vaemoa Vaai pe aisea o le a toe talosaga ai leoleo e taofi pea tamaitai ae o loo tau faamautu tagi faasaga ia i latou.
Na le talia ai loa le talosaga a leoleo e taofia pea ia tamaitai ae ua tatala i tua e tālia ai le sailiga o ni loia aemaise o a latou tali i tuuaiga ua feagai nei ma i latou.
O le oo foi o le tamaitai o Iuni Sapolu i le toese i Tafaigata na ia ta‘ua ai e tasi le po na iai ae matua ese faalogona na oo ia te ia ma e misi alofa ai i le umi ona taofia o nei tamaitai a o tau tālia ai suesuega a le ofisa o Leoleo. “A o fea o latou aiga, o tamaitai nei o afafine i o latou aiga, o tuafafine, o tina foi nisi ae ua taofi lava faapea, o le uiga matagā lena e tatau ona laga, o le taofia o tamaitai e aunoa ma le faamautu ai o nei tuuaiga”.
“Ona ou manatu lea, ou te fia fesoasoani i nai nei foi uso ma e moomia se fesootaiga ma i latou a o lei toe tulai i luma o le Faamasinoga”, o se faaaliga lea a le tamaitai loia o Iuni Sapolu.
“O loo iai a‘u ma la‘u tama o Josephine (o se tamaitai loia foi) e ofo atu le auaunaga a le Sapolu Law auā le tulai ai e aunoa ma se totogi mo nei tamaitai”.
O le taimi lenei ua toe tolopo le mataupu faasaga i nei tamaitai i le masina o Aperila ma o loo saini i le ofisa o leoleo i vaiaso uma ae ua tapu fale faafiafia ma le taulaga o Apia ona toe vaaia ai seia toe tulai i luma o le Faamasinoga. O le tapu lenei e amata faamamalu i le 6 i le afiafi ae tatala i le 6 i le taeao.
O le toalua na maua le avanoa e faatalatalanoa ai na o la ta‘ua e matua teena tuuaiga ua faia faasaga ia i laua ma ua lapataia i laua e lo la nuu o le a ono faatulai ese ona o lipoti ua salalau nei ma tapue ai o la ata ona o moliaga nei o le faia o faiga faatalitane ua tuuaia ai.
