O le lua ai lenei o vaiaso talu ona faalauiloa i fesootaiga le moomia o se fesoasoani tau seleni e faatupe ai tapenaga a Satiamaalii Vaitele Soi mo lana fusuaga i le Auckland Boxing Association (ABA) stadium i le Aso Faraile nei, lea ua faafetaia ai e le pulega a Soi le tali mai o faipule o le NZ First, faapea le pulega a DUCO ma le fesoasoani a le aufusu a Toga.
Faaalia e Pa‘u Fereti Puni o le pulega a le Event Polynesia, “O le lima ai lenei o tausaga o fai lenei galuega o sailiga seleni e faatupe ai le toe lalagaina o fusuaga faapolofesa i Samoa aemaise o le faatupeina o koleniga, ofu taalo, pasese o vaalele, totogi o ‘visa’, mea e nonofo ai, meaai ma falekoleni mo tama fusu mai Samoa e auai ai i fusuaga i Niu Sila ma atunuu i fafo.”
O le avanoa e fusu ai Satiamaalii i Niu Sila i le vaiaso nei, o loo faamatuu mai ai e le alii fai fusuaga o Bruce Glozier ia pepa ulufale e faatau mo le faatupeina o tapenaga ma isi vaega o le fusuaga a Soi.
Faaalia e Pa‘u, “O nisi o i latou ua faatau pepa e faatupe ai le fusuaga a Satiamaalii, e aofia ai le taitai o le vaega faaupufai a le New Zealand First, le afioga Vaovasamanaia Winston Peters faapea le faipule tamaitai Samoa o le maota fono o Niu Sila, le fetalaiga Leaufaamulia Asenati Lole-Taylor; e lē fou le lagolago ma le tapuaiga a Vaovasamanaia ma Leaaufaamulia i fusuaga o loo masii mai ai alo o Samoa e pei foi ona iai fusuaga sa faagasolo i Otara.”
Faamautu mai foi e Pa‘u le faatau o pepa a alii faifusuaga numera tasi a Niu Sila, le alii o David Higgins faapea Dean Lonergan o faatonu o le kamupani o le DUCO lea sa faia le fusuaga tele a David Tua ma Shane Cameron, faapea le fusuaga tele o le Fight For Life i tausaga taitasi.
Fetalai Pa’u. “E iai le manatu o le toatele e le silafia le faigata ona maua o ni avanoa mo tama fusu faapolofesa mai Samoa, aemaise pe afai e ono faiaina ai le tama Niu Sila poo le Ausetalia. Pau tama fusu Samoa e faaalu ai tupe a fai fusuaga i atunuu i fafo e aumai, o tama fusu Samoa ia e sue ai malo a tama Niu Sila ma Ausetalia.”
“E lē taitai ona lava fusuaga i Samoa ma e moomia ai e tama fusu mai Samoa ia ni fusuaga i fafo e faaopopo ai le aofai o a latou fusuaga (record) e pei o Satiama’alii lea ua sefulu iva fusuaga, leai se faiaina. O le faafitauli, e leai se fai fusuaga Niu Sila poo Ausetalia e manao e faaalu a latou tupe i tama fusu Samoa o i lalo o le pulega a Event Polynesia ona e mautinoa e faaletonu ai a latou tama fusu.”
Sa iai le fuafuaga e fusu Satiama’alii i le fusi a Niu Sila o le aupaga ‘cruiserweight’ i le Aso Faraile nei, peitai ona o le leai o se Niu Sila e fia fusu ia Satiama’alii, o le ala lea o le a fusu ai ma le alii Samoa o Junior Iakopo i le aupaga mamafa.
O se tasi o faamāmā avega mo tapenaga a Satiama’alii o le koleni faatasi lea ma le aufusu ‘amateur’ a Toga o loo tapena mo taaloga a le Oceania i Ausetalia i le vaiaso nei. E lē gata i lea ae o le sao o le faiaoga Toga o Lolo Heimuli i koleniga a Soi i le tolu vaiaso a o iai i Niu Sila.
O le Aso Toanai na tea nei na auai le alii lakapi lauiloa o Jonah Lomu e faamavae atu i le aufusu a Toga i le latou koleniga mulimuli ma Satiama’alii i Henderson.
Faaalia e Pa’u, “O loo iai fetuunaiga ma Higgins ma Lonergan i le taimi nei e ono fusu ai Satiama’alii i paga faaopoopo o le fusuaga tele a Shane Cameron ma Monte Barrett ia Me ma o le isi lea mafuaaga o lo la fia auai i le fusuaga i le Aso Faraile nei.”