E latalata i le to‘a 30 misionare a le Ekalesia a Iesu Keriso o le Au Paia o Aso e Gata ai na alu le vaiaso atoa ua tea nei o feoai ma ni fomai eseese mai i Amerika, Niu Sila faapea ai ma Ausetalia auā galuega fesoasoasni o le soifua maloloina.
O le galuega a misionare na o latou faaliliu upu i fesootaiga i le va o nei fomai atoa ai ma le mamalu o le atunuu na agai i ai mo a latou siaki ma togafitiga i gasegase eseese o le tino na moomia ai le tomai o fomai asiasi nei. O le fesoasoani lenei na aumai ai fomai faapitoa ua mafai ona faataunuu ona o se polokalame e ta‘ua o le Faapaaga ma le Pasefika mo le tausaga e 2013.
O aso uma lava na agai ai fomai faapitoa ma misionare o le Mamona i afioaga eseese mo togafitiga o oloa ma mata atoa aoaoga o le soifua manuia lautele e ala i taumafa ma auala e foia ai faama‘i pipisi atoa ai faamai lē pipisi e pei ona agai ai i le falemai faaitumalo i Poutasi e amata ai lenei taumafaiga ma faasolo ane ai isi itumalo o le motu o Upolu.
Na faafe taia e fomai o fofoga ma fomai o le fatu le faafaigofie o le latou galuega ona o le vasega lea o fa’aliliu upu ua faigofie ai ona malamalama i togafitiga mo’omia o le lautele o tagata na afea lenei fesoasoani ua ofo fua atu.
E lē faigofie le taumafai e faasamoa āuga o gasegase ma o se fesoasoani lea na maua atu i misionare nei a o faagasolo ai le taumafaiga o le togafitiga ma le avatu o fualaau ma vai aemaise fautuaga mo le mamalu o le atunuu e pei ona matauina e fomai na asiasi mai.
E lē gata foi la i fesoasoani tau i le soifua maloloina sa maua taimi o i latou nei e agai ai i fale o aiga ma fesoasoani ai i le moaina o le vao, o le faamamā o le siosiomaga o loo nonofo ai nisi.
O afiafi na faatautaia ai aoaoga i maota o komiti i totonu o afioaga eseese mo le saga faalauiloaina o a latou polokalame o le soifua maloloina aemaise aoaoga na mafai ona tufa atu i fanau laiti auā le tuputupu a‘e o ni tagata soifua maloloina.
