Fesoasoani Eddie Hearn e faatulaga ni fusuaga lelei mo Joseph Parker

O le faanaunauga o Eddie Hearn, ina ia faatulaga se fusuaga a le alo o Samoa ia Lupesoliai Laaulialemalietoa Joseph Parker pe a mae’a le pepesi o le Covid-19.

O le susuga ia Eddie Hearn o loo ia pulea tama fusu iloga o le lalolagi, i lalo o lana kamupani a le Matchroom Boxing, o nisi o alii fusu o loo i lalo o le pulega a Hearn e aofia ai le siamupini o le lalolagi ia Joshua faapea foi Dillian Whyte. Na sainia le maliega a Hearn ma Parker e faafoe ai e Hearn ma le Matchroom Boxing fusuaga e tolu a Parker, o lea ua mae’a fusuaga e lua, ae toe tasi le fusuaga o loo totoe i lalo o lea maliega. 

Na faailoa e le alii Peretania ia Hearn nisi o suafa iloga o le aupaga mamafa i le lalolagi o loo ia fuafua ma faatulagaina e faipele ma Laauli Joseph Parker i se la talanoaga ma Laauli i luga o upega tafailagi.

E ui lava loo iai pea se avanoa e ono fetaui ai Laauli ma Junior Fa, peitai sa faailoa lava e Hearn nisi o suafa o tama fusu lelei o loo pito i luga e manao e ui i ai Laauli. Sa faia lava le la talanoaga ma tau faamanatu i ai e Laauli le igoa o Junior Fa ia Hearn ne’i te’i ua misi i lana lisi, peitai na saunoa Eddie Hearn, e tāua tele pe afai ae taunuu lea fusuaga ma Jr Fa. E lē gata o le a lelei tele mo Niu Sila ae o se avanoa tāua foi lea e faalauiloa atu ai le vaega a le Matchroom i nisi foi o paaga fou.

Peitai na saunoa Hearn, o lona manaoga moni lava o le taumafai lea ina ia toe uli tonu le sa o Laauli Joseph Parker i nisi o suafa tetele o le taaloga. E leai se afaina o se fusuaga ma Jr Fa, peitai o loo ia naunau ina ia toe vave maua se isi avanoa o Parker na te toe lu’iina ai le fusi o le lalolagi.

O i latou e pei o Luis Ortis, poo le toe faia o se isi la fusuaga ma Dillian Whyte, ia pe toe faia foi se isi a la taaloga ma Andy Ruiz lea sa manumalo ai Laauli i le la fusuaga i le fusi o le WBO.

Na saunoa foi Eddie Hearn, e le taumate le fiafia o Ruiz pe afai ae faataunuuina se la taaloga lona lua ma Parker. Na ioeina e Parker lona fiafia foi pe afai e taunuu lea fusuaga lona lua peitai na pau lona manao, o se fusuaga e ono vave maua ai se isi siitiaga i luga o ana taumafaiga.

E na’o le faalua lava ona fusu Laauli Parker i tausaga e lua ua mavae atu nei, lea sa ia manumalo ai i le fusuaga ma Fuamatu Alex Leapai i le 2019, ma le faatoilaloina o le alii fusu ia Shawntell Winters ia Ianuari na te’a nei.

Na faailoa foi e Laauli J. Parker ia Eddie Hearn i le la talanoaga lona faafetaia ai o le avanoa sa ia toe sosolia ai le maea i ni nai vaiaso a’o lei pepesi ma tetele le faama’ioti i le Malo tele o Amerika ma sa ioeina foi e Hearn lea manatu.

O le laualuga o le fiafiaga o le susuga ia Laauli i si ana taumafaiga i le amataga o le tausaga nei, ona o le feagai ai o le lalolagi ma le matautia o le tulaga lea ua tupu mai nei. Na ia ta’ua foi lona lagona faafiafiaina i tami uma e a’e manuia ai sana taumafaiga e pei o le avanoa lea na ia taofia ma faatoilaloina ai Winters.

Na saunoa Hearn e toatele nisi tagata sa manatu māmā ia Winters a’o faasauni ai le la fusuaga ma Laauli peitai sa vaaia le tulaga malosi ma le matautia o tapenaga a Winters sa faatinoina i le la taaloga ma Parker e ui sa malolo ma faia’ina o ia.

Na ia faailoa foi, o le susuga ia Laauli Joe Parker o se tasi lea o tama fusu iloga ma lelei i le ‘au paga mamafa o le lalolagi atoa o loo iai nei, ma o se tagata e tauagafau foi. Sa ia faailoa foi se tulaga faaletonu o le faaiuga o lenei tausaga 2020 i faipelega ona o le toe tolopoina ai o nisi o fusuaga maoa’e sa faamoemoe e faataunuuina ai.

E pei o le fusuaga i le fusi o le lalolagi i le va o Anthony Josua ma Kubrat Pulev, o le toe lu’iina lea e Deontay Wider o le fusi o le WBC mai le alii o Tyson Fury o loo siamupini nei, faapea le fusuaga a David Chisora ma le alii o Oleksandr Usyk faatasi ai ma le fusuaga a Alex Povetkin ma le alii ta’uta’ua o Dillan Whyte.

O nei fusuaga uma sa fuafuaina e faia, peitai ua tolopoina uma lava ona o tulaga faigata ma le leaga o loo iai nei le lalolagi i le faama’ioti, le COVID-19. Ae o le mea sili ma tāua, o le mae’a atu o le faama’i ae o loo lava tapena ma saunia lelei ma atoatoa tapenaga a Laauli Joseph Parker mo soo se tasi lava.