Ua iai nei ni faamaumauga fou o le a mafai ai e Samoa ona puipui nisi o nofoaga tāua i le atunuu mai i suiga ogaoga o le tau.
O ni faamatalaga ua mafai ona faamauina i se galuega fai faatasi i le va o le Malo o Samoa e ala i lana Matagaluega o Punaoa Faalenatura ma le Siosiomaga ma le Malo o Ausetalia i lana matagaluega o Suiga o le Tau ma le Faaaogā tatau o Malosiaga.
O lenei galuega na faalauiloa i lenei vaiaso e le sui Hai-Komesina o le Malo o Ausetalia mo Samoa, le susuga Ryan Tierney. “E malosi pea le lagolago a le Malo o Ausetalia i le taumafaiga e fesoasoani i ona atunuu tuaoi aemaise atumotu o loo maualalo nofoaga o loo taatitia ai i le Pasefika, i auala e mafai ai ona tali atu i suiga ogaoga o le tau,” o se faaaliga lea a Tierney.
O faamaumauga ma faamatalaga ua aoina e le Malo o Ausetalia, o le a mafai ai e le Malo i le matagaluega o Punaoa Faalenatura ma le Siosiomaga ona iloa lelei le tulaga ogaoga o le a iai le siisii o le sami ma mafai ai ona amata ni galuega poo fuafuaga mo le faamalosia o puipuiga o le taulaga o Apia aemaise o le malaevaalele i Faleolo.
O nofoaga e tulata uma i le sami ma e faigofie tele ona afatia i suiga o le tau ona o le tu tonu i luga o le sami o nei eleele.
Faaalia e le sui Hai-Komesina o Ausetalia, o le aoina o faamaumauga ma faamatalaga nei i le suiga o le tau, o le a mafai ona faatino i se masini e ta‘ua o le LiDAR ma o se masini ua mafai ona fausia i tomai faaonaponei e iloa ai le maualuga ua iai eleele mai i le sami, ae e lē gata i lea o le tulaga ua iai le loloto o le sami poo le siisii foi i autafa o le uafu i Apia ma autafa o le malaevaalele i ogasami i ia nofoaga.
O se vaalele o le a faaaogā e feaveai ai le masini lenei auā le fuaina o nei suiga ma o le a aoina ma faamatuu mai i le Matagaluega o Punaoa Faalenatura ma le Siosiomaga auā le faaauau ai o ana fuafuaga i le maualuga ua iai le afaina o ia nofoaga mai suiga o le tau ae o ā foi fuafuaga e mafai ona fai i le ituaiga tali e faatino ina ia malupuipuia ia nofoaga mai le siisii pea o le sami.
O se tasi lenei o le tele o galuega ua mafai ona fesoasoani mai ai Ausetalia ia Samoa i le tali e avatu i suiga o le tau, mai aafiaga i luga o le eleele e pei ona iai le utiuti pea o le suavai maua, e lē gata i lea o suesuega i auala e mafai ai ona vave le tali atu i taimi e tulai mai ai faalavelave faalenatura, atoa ai la ma faamaumauga nei ua mafai ona faatautaia i tomai faaonaponei ua maua i Ausetalia, ina ia fesootai ai pea ma Samoa aemaise isi atumotu laiti ia latou gaioiga e tatau ona fai ona o le tele o atumotu laiti na ta‘ua e Tierney, ua savali nei i le lua tausaga o feagai lava ma faafitauli o suiga ogaoga o le tau, ona o le laiti ma le tulata i le sami.
E talafeauga lelei lenei faasilasilaga mai le Ofisa o Ausetalia ae ua mae‘a foi ona faalauiloa e le Malo galuega o le a faatautaia auā le atina‘e o lenei vaega o le taulaga o Apia, ma o le a aofia ai le toe faaleleia o le fale tele o le Malo i le Eleele fou auā se faletalimalo, e lē gata i lea o ni faleaiga ma nisi o atina‘e o le a fausia i le nofoaga lenei ua iai taligalu i Apia.
O ni fuafuaga nei o le a vaaia ai le tele o fale o le a faapea ona fausia i luga tonu o le sami i le taamilo lea mai le taulaga e agai atu i le Penisula i Mulinuu.
E lē o manino poo le ā le fautuaga e ono aumai i galuega faamaumau nei o le a aoina e Ausetalia i le fausia ai o nei nofoaga i eleele tonu ua manatu lea Malo e tatau ona puipui malu mai i le siisii o le sami.
