Fesoasoani Amerika i se faaaliga o oloa Samoa

O le fesoasoani lea e tusa ma le $18,000 tala Amerika poo le latalata i le $40,000 tala Samoa ua tauaao atu e le Amepasa o le Malo o Amerika i Samoa ma Niu Sila o David Hubner ua iai le faamoemoe o le a fesosoani i le faaaliga tele o oloa o loo gaosi i Samoa o le a faia a’o le’i mae’a le tausaga nei.
Ua talafeauga lelei lenei foa’i ma le mana’oga o le Faalapotopotoga o Pisinisi Laiti i Samoa (Small Business Enterprise Centre – SBEC) i se isi laasaga e saga una’i ai le tulaga ua iai pisinisi laiti ua gaosi oloa i totonu o le atunuu.
O le alii pule fou o le Ofisa o Amerika i Apia, o Peter Ganser lea na sainia lenei fesoasoani mo le Malo o Amerika faatasi ai ma le tamaitai pule o le SBEC Margaret Malua i se sauniga puupuu na faatautaia i Apia i le faaiuga o le vaiaso.
E le gata ina faamalosia i lenei fesoasoani le va galulue faatasi ai o atunuu e lua na ta’ua e Hubner,  o se auala lelei fo’i lenei e faamanatu ai ia Samoa o lo la va latalata ma Amerika Samoa e tatau ona toe vaavaai iai ona o le itu lea o Amerika Samoa ma lona fesootaiga ma Amerika e mafai ona maualuga ai le tupe maua a Samoa nei e ala i ana oloa e mafai ona avatu i Amerika Samoa.
O se maketi na ta’ua e le alii Amepasa o Amerika mo Samoa, e tatau lava i Samoa nei ona silasila lelei iai.
Ua tele feutagaiga ua faia i le va o malo lava ia e lua o Samoa ma Amerika Samoa ma e tele lava faafitauli i le itu tau i fefaatauaiga ona o le maualuga o aiaiga ma tulafono a Amerika o loo lima taitaina ai le itu tau i fefaatauaiga i le va o Samoa e lua.
O le taimi lenei ua leai ma se aano o se manufasi o faataga le avatu i Samoa nei mo Amerika Samoa. O lea ua faamalosia e Amerika le toe faaulufale mai o le siusiu pipi i totonu o le atunuu e ui ua matua maualuga fo’i tulafono a Samoa nei latou i le toe faaofi mai ai o lenei taumafa i le atunuu.
O le faaaliga lenei ua iai le fuafuaga a le SBEC o le a faalauaitele atu i Amerika Samoa ina ia mafai ona to’atele nisi o le motu o Sasa’e e malaga mai ai ma vaavaai i oloa o loo ua maua i Samoa nei e mafai ona faatau atu i le teritori.
E silia i le to’a 1000 tagata ua fuafua le SBEC e tatau ona afea ma silasila i lenei faaaliga o le a faia mo aso e lua.
Ua iai ma le faamoemome o le a tele le fesoasoani o lenei tupe ua foai e Amerika i le faatutuina o nofoaga le tumau mo lea faaaliga aemaise o nisi o auala e mafai ai ona faailoa ma faamalosi atili lenei faaaliga e ala i le au fai pisinisi laiti ua iai le manaoga e faatau a latou oloa i lea taumafaiga.
Atonu o le faaaliga foi lenei o ole a faafaigofie ai fefaatauaiga ua tele tausaga o talanoaina i le va o atunuu e lua o Samoa, o se talotaloga lea a le SBEC i le taimi nei.