Na usuia le fono faaletausaga a le komiti o le asosi mo aiga a tagata Polenisia ma le Pasefika a Vitoria, (Victorian Polynesian and Pacific Islander Family Association) i le Aso Toonai 19 o Me, e faamautuina ai nisi o polokalame fai a le asosi, aemaise o le toe iloiloina lea o nisi o fuafuaga faataotooto aua lava le lelei o aiga ma tagata lautele, e le gata i le atu Polenisia, aemaise o tagata mai atumotu o le Pasefika o nopiai ma avea Melepone ma o latou nuu.
O se tasi o polokalame na faatoa mae‘a atu a le asosi sa maitauina le toatele o aiga na auai atu i ai, o le aso faapitoa sa faamaopoopoina mo aiga i le Zoo a Melepone (family day at the zoo).
O nisi o fesoasoani a le asosi o loo matua aoga i nai aiga Pasefika, o le polokalame lea e mafai ai ona maua se faiaoga e fesoasoani i meaaoga a le fanau i fale ma aiga (home work club tutors) ae faapea foi ma la latou fesoasoani i aiga o faaletonu tupe maua mai le malo, aemaise foi o ni manaoga faapitoa, e pei o le lē atoatoa o le malosi.
O nisi o polokalame ua faataatia mo se taimi lata mai, o le maua lea o avanoa mo le tupulaga talavou e vave mumusu mai aoaoga, ae lei maua ni faailoga e ono fesoasoani i le sailia o ni galuega, e toe fai ai ni a latou mataupu ma aoaoga sue galuega (training and courses for jobs).
O se tasi o finagalo manaia tele e ono amataina i se taimi lata mai foi, o le fesoasoani lea e saili fale e mafai ona fai mai ai faatau o le vaiaso i se tau e taugofie atu nai lo supamaketi o iai nei.
A fia avea oe ma sui o le asosi pe fia malamalama foi i nisi o fesoasoani, pe mafai foi ona e fesoasoani mai, faamolemole silasila i le imeli thevicpolynesianandpacificislanderfamilyassociation@live.com