Ua gugulu finagalo o faipule o le itu agai ma nisi o le atunuu i le mataupu i le faatauina o le taavale sa faaaogā muamua (used car) foeuli taumatau a le Fofoga Fetalai i le tau e $175,000 tala.
Na amata lipoti ua mae‘a ona faatau le taavale, ae oo ane i le faaiuga o le vaiaso na tea nei, ua faaalia e le Sui Fofoga Fetalai, le susuga Laaulialemalietoa Leuatea Polataivao, e lei faatauina le taavale.
O loo fesiligia le iai o se aafiaga o le Fofoga Fetalai ma le Sui Fofoga Fetalai i le faatauga o le taavale poo se conflict of interest.
Ua mafua lea fesili ona o le pisinisi faatau taavale o le Napro Samoa Limited, o loo iai sea (share) o le Sui Fofoga Fetalai.
O lana afioga ma se isi tagata mai Manukau i Niu Sila o loo iai sea i le pisinisi ma e na o laua foi faatonu poo directors.
O le fanua foi o le Sui Fofoga Fetalai o loo lisi e lea pisinisi.
O le Aso Lua, 9 o Mati 2010 na faailoa ai e le Sui Fofoga Fetalai i nisi o lipoti a televise ma leitio i le atunuu, e leiloa pe aisea ua vavaō ai fua i le faatauga o le taavale, aua e leai se faiga faaalatua poo ni faiga faapiopio ua aafia ai.
O loo teena ai foi e Laauli lipoti a se tasi o nusipepa ua faailoa ai le au faisea o le kamupani e pei ona aofia ai ma ia. “O lo‘u tiute faasui Fofoga Fetalai o le mautinoa lea o loo fai le auaunaga ma le tautua i le Fofoga Fetalai i soo se auala.
Ou te talitonu e tatau ona maua e le Fofoga Fetalai le mea silisili ona lelei e pei o se faataitaiga o le taavale”, o le finagalo o Laauli Leuatea Polataivao.
“O le taimi lenei e lua i le tolu vaiaso o loo fealuai ai le toeaina (Fofoga Fetalai) i le taavale e test drive le taavale ina ua mae‘a ona ave i totonu tulaga uma e pei ona manaomia e le tulafono e pei foi ona ave ifo ai tau a isi kamupani.
Pe lua ea pe tolu quotes la na ave, ia o le la e fai i ai le filifiliga i le taimi nei. O fea lava la e taunuu i ai le filifiliga o lena.
O le faaiuga la e fai e le Fofoga Fetalai o lena, auā o ia e faaaogāina le taavale lea”, na saunoa ai lava le Sui Fofoga Fetalai.
I le lipotia o le iai o lona sea i le pisinisi faatau taavale na faaalia e Laauli e moni, o ia le isi paaga a le Napro Japan e pei ona faaigoa le lala i lo tatou atunuu o le Napro Samoa.
Peitai o le pisinisi lava ia o loo faagaioi i se vaega o lona fanua i Vaitele e aunoa ma sona piitaga i le faagaioia. Ua faaalia e le Fofoga Fetalai le tofa Tolofuaivalelei Falemoe Leiataua, e leai sona silafia e iai se aafiaga o Laauli i le pisinisi e pei ona avea o ia ma se paaga i Samoa.
Ua faaalia e le sui faipule o Gagaemauga numera 2 le afioga Levaopolo Talatonu, o se mea tatau le iai o se taavale lelei mo le Fofoga Fetalai aua o ia o le faauluuluga o le isi vaega tāua o le Tafatolu o le pulega o le Malo ma le atunuu aua o loo faaao i ai le Palemene.
Peitai o loo ilitata le finagalo o le sui faipule i le tau o le taavale pe a fua o se taavale o le fausaga o le 2006 ma ua savalia le fa tausaga o faaaogā.
“O se fautuaga lea i le alii palemia ma lana faigamalo ina ia silasila toto’a ane i tulaga nei.
O loo tele isi taavale lelei e na o le selau lua sefulu pe selau lima sefulu afe tala”, o le finagalo lea o Levaopolo Talatonu.
