O lana fonotaga faalevaiaso na toe laga ai e le Taitai o le Itu Agai, Afioga Palusalue Faapo II le tupe na aumai i fesoasoani mai i fafo i le afā. O le faaauau ona fesiligia pea ona o le manatu o le alii faipule e tatau lava ona iai se tupe faaagaga e le Malo mo aiga nei ua matuā pagatia ua leai se fesoasoani o maua talu ona tafefea fale, leai ma ni meatotino o toe maua ona o lenei mala faalenatura.
“E tatau lava i le Malo ona ave se fesoasoani e toe fausia ai aiga nei,” o le mau lea a le Afioga Palusalue Faapo II.
“A fuafua i le tupe na aumai mai i fafo, e sili atu ma le $20 miliona tala ma o lea ua matou iloa o le isi tupe ua faaagaga e Ausetalia ina ia fausia ai faleaoga ae e fia iloa lava poo fea la ua faaaogā ai le isi tupe tele lea,” o se faaaliga lea a le alii taitai o le Itu Agai.
Na ta‘ua e le Tautua Samoa, o galuega faaleleia o auala, le eletise ma le suavai, e lē tatau ona faaaogā i ai le fesoasoani mai i atunuu mamao. Sa fautuaina e le Itu Agai le tagai o le Malo i le seleni lea e aofia ai le $5miliona tala na maua mai i le Tala Faatatau Faaopoopo o le Tupe, le $13 miliona tala lea na faamatuu mai i le faaputugatupe mo faalavelave e lei fuafuaina auā le faatinoga o galuega tetele nei toe faalelei.
Ae na faaalia e le Afioga i le Minisita o Tupe, le Afioga Faumuina Tiatia Liuga, e le taitai a‘ua‘u lea tupe e pei ona ta‘ua e le Taitai o le Itu Agai, ma le tau atoa o le galuega o loo faagasolo o le toe faaleleia o meatotino ua faaleagaina i le afā.
“E tusa ma le $400miliona tala le tau atoa o meatotino na faaleagaina i le afā o Eveni. E lē taitai lava le tupe lea e fai mai ai le Tautua e tau toe fai ai auala ma le suavai ma le eletise, o lea e agai Samoa i ana paaga mai i fafo e faatupe le tele o lea galuega ae o le tupe e pei ona ta‘ua e le Taitai o le Itu Agai mai i le Tala o le Tupe Faaopoopo ma le tupe maua mai Unforseen Funds, o lea e iai se fuafuaga e ono alu le tupe lena e toe fausia ai faleaoga ua faaleagaina,” o se saunoaga lea a le Afioga Faumuina Liuga.
Faaalia e le Alii Minisita o le taimi lenei ua iai folasaga o fesoasoani e faatino ai le galuega tele toe faalelei o faleaoga, peitai e umi foi se taimi ona faatoa vaaia lea o ni tupe mai nei fesoasoani, ae o le galuega o le toe faaleleia o faleaoga o se tulaga o loo fia vave faatino i le taimi lenei ma o le mafuaaga lea o le manatu o le alii Minisita e avane le $13miliona ua pasia e faatupe ai lenei galuega tele ae tālia ai le aumai o le tupe lea ua ofo mai e Ausetalia mo faleaoga ona toe faatumu lea o lea seleni.
O le isi tolu masina ua tatau ona faagaioi galuega ia o faleaoga e pei ona ta‘ua e le Alii Minisita.
Faaalia e le Afioga Faumuina, e matuā telē lava le seleni o loo faatino ai galuega toe faaleleia ae o le mafuaaga lea o le ave o le fesoasoani mulimuli, le $24miliona tala i le faletupe o atinae ma le faalapotopotga o fale ina ia mautinoa e iai se isi avanoa e agai i ai i latou ua leai lava se isi sulufaiga ina ia mafai ona maua se fesoasoani i le toe faaleleia o meatotino ua faaleagaina.
Ua iai foi nisi o i latou o loo nonofo pea i nofoaga lē tumau ona o le leai o ni fale o toe iai i le taimi lenei, ae o le latou faamatalaga e faigata foi ona maua ni nonogatupe ona o le toatele sa faamoemoe i faatoaga ma faigafaiva mo tupe maua ma e faigata ona saili ni faamaoniga e faamatuu mai ai nonogatupe ia. O le faamatalaga a le alii Palemia e leai ni tupe e soona avatu fua i tagata ona o loo faamalosia e le Malo le agaga e tulai mai le tagata latou e galue faatasi ai ma fesoasoani o loo mafai ona maua mo le galuega o le toe faaleleia o nofoaga ua faapea ona faaleagaina. Faatoa mae‘a ona faatautaia se suesuega a ni inisinia faapitoa ua ave i ai le galuega mo se lipoti i le tulaga o le faaleagaina o fale ma isi meatotino ona o le afā.
