Fesiligia pe faapefea ona toe sola ese le pagota mai lima o leoleo

O Aperila o le tausaga nei 2009 na sola ese ai ma le falepuipui i Tafaigata le alii pagota o Iosua Savusa, peitai sa fiu sailiga a leoleo e le maua. Na taumafai foi lona aiga i Faleatiu e sue ae e lei manuia ma teena ai e le pulenuu o le afioaga lipoti e faapea o loo vaaia le alii o Iosua i Faleatiu. Na faia se feiloaiga a alii ma faipule ma leoleo ma ave ai se talosaga a malu o le malo e manaomia lo latou lagolago atu i sailiga, lea na mafai ona maua ai le alii pagota ma momoli ane loa i le ofisa o leoleo i Apia i le Aso Gafua na tea nei, aso 15 o Iuni 2009.
Na taofia ai i le ofisa o leoleo i le po o le Aso Gafua lea, ae Aso Lua na sosoo ai ave loa i Tafaigata. Peitai na toe sola mai ai le alii o Iosua e pei ona taua e se molimau faatuatuaina mai le falepuipui i Tafaigata. Na faaalia e lea molimau na taunuu le taavale na avatu ai Iosua, ae o le taimi na matala ai le faitotoa na tamoe televave ese ai, ma ua toe sailia ai nei poo fea o loo faamautu ai.
E lei mafai e le molimau ona faamatala atoa mai le mea tonu na tupu, ae e manino mai i le faamatalaga a le molimau, e lei saisaia lima (hand cuff) o le alii pagota i le taimi na avatu ai, ma na iai se faatamala o le tapenaga i le taimi na tuua ai le ofisa autu o leoleo i Apia. Na maua le avanoa e fesiligia ai le sui sooupu le afioga i le Komesina lagolago susuga Papalii Li‘o T Masipa‘u, ma ia faamaonia mai ai na maua le alii o Iosua i le Aso Gafua, peitai sa musu e faailoa mai faamatalaga poo fea na maua tonu ai.
O le musu o le sui sooupu na ia faasino ai le tusitala i le Komesina o leoleo e maua ai nisi faamatalaga, peitai e lei manuia sailiga ma agai ai loa suesuega mo nisi faamatalaga i nisi o molimau faatuatuaina ma faamatala mai ai le tulaga ua toe sola ese ai le alii o Iosua Savusa mai Faleatiu. O loo tuli le faasalaga soloatoa o lea alii pagota ina ua faamaonia lona moliaga o le fasioti tagata faamoemoeina lea o loo tuli ai foi faasalaga o nisi taulelea se toalua o lea afioaga. O loo iai le talitonuga o loo faia se suesuega faalotoifale a leoleo pe na mafua i se a ona mafai ona toe sola ese Iosua ma le falepuipui. O loo ua toe faia foi sailiga a leoleo mo le toe fia maua o lea pagota.