Fesiligia le tutoatasi o faaiuga a se media council i Samoa?

Ua toe unaia malosi e le Palemia le vasega o tusitala matutua ma le au ao sinasina o le galuega i le tatau ona faatu se media council, poo se itutino e taunuu i ai faasea e faasino i ni faasalalauga ma lipoti ua faaletonu.
O le saunoaga lea a le taitai o le Malo i le alii Palemia, Susuga Tuilaepa Lupesoliai Sailele Malielegaoi, e tatala ai se mafutaga a faatonu o faasalalauga ma tala eseese a nusipepa, leitio ma televise i Samoa e faatatau i o latou lagona i le taimi na amata ai ona lipotia le faalavelave faalenatura o le galulolo.
Na faamamafa ai e le alii Palemia le tatau i tusitala ona lipotia tala sao ma moni, ae le o le faavae o ni tala e faasalalau, i ni tala faalogo ma ni manatu e le faavaea.
E le o teena e le Palemia le tuusao o ni lipoti i ni mea ua faaletonu aemaise o faaletonu e aafia ai pulega malo i soo se taimi ma le lautele o le atunuu.
Peitai na ia faamamafa, e ao ona mamafa foi ni tusitusiga ma ni lipoti a tusitala i ni tala lelei ma ni tala e faafiafia ai le faafofoga ma le faitau a tagata, nai lo le mamafa pito tasi i tala e aliali ai ni mea faaletonu.
O le toe aumai e le Palemia o lea luitau mo le sosaiete a tusitala le JAWS, e mafua mai i le salalau o lipoti i nai vaiaso faatoa tuanai le galulolo, na taua ai le amata ona faatau e nisi o tagata o nuu na mafatia i le galulolo o taga araisa o mealofa o le sunami poo le galulolo.
Na laga e le taitai o le Malo le saolotoga e faatino ai le galuega a tusitala o loo olaola lelei i Samoa.
Aemaise e pine faamau lea saolotoga i le fefaaaliaiga o manatu e pei ona iai nisi finagalo ua faitioina ai lana taitaiga e nisi e faapea, e tasi le leo e faimea faalogo uma i ai (dictatorial administration).
O le nusipepa o le Samoa Observer sa agai tele i ai se finagalo o le alii Palemia i sana tusi na ave i le sosaiete a tusitala na toe saga faamauina ai pea lona finagalo i le faatuina o se media council, e pei ona faia foi e isi atunuu e pei o Niu Sila ma Ausetalia.
Peitai o le tamaitai mai Niu Sila o Judy McGregor, o le ulu o le Komisi o aia tatau a tagata soifua mo atunuu o le Pasefika, o ia foi o se tusitala sa ia afea lea mataupu i lana folasaga i le mafutaga a faatonu.
Fai mai lea tamaitai e taua tele le faatulai mai o lenei mataupu i le taimi nei ina ia avea ma avanoa e fefaaaliai ai lagona ma manatu ma faia ai se faaiuga pe ua alagatatau ona faatu se media council mo Samoa, ae pe ua talafeagai.
O le finagalo o McGregor e ao ona silasila totoa itu uma e aafia i le faatuina o sea itutino mo faasea e ave i ai ona faaletonu i galuega tau faasalalauga poo le a le tutoatasi o galuega a se media council.
Sa laga foi e lea tamaitai le itu i le aafia o se itutino faapea i ni malosiaga (influence) mai fafo e pei o faiga faapolokiki e aafia ai ni tiute tauave o se media council. O le lima tausaga ua mavae na uluai amata ai ona faataoto lenei itutino i se galuega a le sosaiete a tusitala o Samoa na fesoasoani mai i ai le Thompson Foundation i Peretania.
O se galuega sa muamua tuufaatasia ai se taiala e faatino ai galuega a vaega uma e aafia i auaunaga tau faasalalauga e pei o leitio, nusipepa, ma televise, fale tifaga, ma fale video. O le vaega lona lua o le faatuina o se media council, peitai na tosotoso mai ai pea lenei faamoemoe e lei toe lotea, ona sa iai nisi lagona tetee o le au tusitala ona o nisi o vaega e fefefe i ai, pe a faatu sea itutino e pei ona laga ai le tutoatasi o se auaunaga faapea.
O le faasea a le Malo o Samoa faasaga i se lipoti a se tamaitai tusitala o le Televise a Niu Sila, Barbara Dreaver.
O loo suesueina ma iloilo e se itutino faapea e faapitoa i galuega faasalalau a leitio ma televise i Niu Sila, lea e taua o le New Zealand Broadcasting Standards Commission.