“Ua ave povi a le Peresitene ma le Failautusi tausi i pa a le ekalesia”…Petaia Setu
“Ua tele suiga ua vaaia i le Ekalesia i le tuanai atu o nisi sa taitaia, ma o le faavae lea o lou manatu ua faamalolo au ma lou toalua ma le toe tausia o se aulotu pe galulue foi i le ekalesia, ona e faaletagata le mafuaaga”, o le saunoaga lea a le susuga i le faifeau o Petaia Setu, i se talanoaga ma le tusitala o lenei nusipepa i le tuanai o le faamavaega ma le Ekalesia Metotisi i Talimatau i le vaiaso ua mavae. “Ou te tautala ma le ava ma le faaaloalo i le faafofoga ma le faitau a le atunuu aemaise o le ekalesia, ona ua le gata e faaletagata mafuaaga ua faamalolo ai maua, ae faapena foi le faaiuga ua faamalolo ai le susuga Fineaso sa tausia le ekalesia Metotisi i Matafele”.
O le finagalo o le susuga Petaia i le talanoaga ma le tusitala na ia faailoa ai nisi o mafuaaga e pei o le fesiligia o le itu ua agai i ai pulega a le ekalesia i le faamuamua o tupe ma faamanuiaga tau tamaoaiga i ona itu eseese, ae ua solipala le autu o le faaola o agaga o tagata. “Sa ou fesiligia i se tasi o fono a faifeau le ave o manu papalagi (povi) a le Peresitene ma le Failautusi tuu i pa a le ekalesia i fanua o le Metotisi o loo i Afiamalu”, na saunoa ai le faifeau. “E le fetaui ma e le talafeagai le faaaoga e laua o meatotino a le ekalesia e tausi ai a la povi”. Na faamatala foi Petaia na tei le failautusi i lana folasaga ona sa iai le manatu e le o iloa e faifeau lea tulaga.
O le tasi itu na faailoa e le faifeau o meafai a le ekalesia i le itu i faamanuiaga o le au faigaluega i felaugaiga a le au tausi aulotu, ona sa ia faamamafa i se tasi o fonotaga le tatau ona faatino e le ekalesia se faamama avega mo tagata lotu ona ua taugata le soifuaga. “Sa ou fai atu, aisea ua tatou le alolofa ai i tagata lotu ma faamama le avega, ae sa fai mai foi le failautusi aoao, o tagata o loo fia tautua ma galulue ae o tatou (faifeau) o loo taumafai e taofi le ola galulue o tagata. E matua lagona le faanoanoa o lou faifeau i ia lafoga tuulafoai e manino mai ai, le faamuamua e le ekalesia o faamanuiaga faaletino mo latou ae galo le ute o le galuega o le ola fiafia o le tagata”, na saunoa ai Petaia.
O le faletua o Petaia ua faamama lona toto ona o le gasegase o fatugao, o le mafuaaga lea o le faaiuga a le ekalesia e faamavae, peitai na faaalia e Petaia e moni ua gasegase lona toalua ae o loo malosi. Na amata aafia i le gasegase a o galulue i le ekalesia i Otahuhu i Niu Sila, lea sa faia ai le faatonuga a le Peresitene i lea vaitaimi le susuga Siatua Leuluaialii e totogi uma e le ekalesia togafitiga i Niu Sila ona e le o laua o ni sitiseni o lea atunuu.
“O le tasi lena mafuaaga o le faamalolo o au ma le galuega, ona e tele se tupe a le ekalesia sa faaalu i togafitiga o lou toalua”. Peitai ua faaalia e Petaia o le tiute lea o le ekalesia mo le au faigaluega aua o latou o loo faatinoina le galuega talai e ala i le taitaiga a le ekalesia Metotisi. O le taimi nei e le o toe totogia e le ekalesia togafitiga o le faletua o le faifeau. E lei manuia taumafaiga mo le fia maua o se finagalo o le susuga Fineaso sa tausia le ekalesia i Matafele, ae na faaalia e Petaia e le gata na faamalolo foi e le ekalesia lea auauna ona o le gasegase o fatugao ua aafia ai, ae na faia le faaiuga e lei sailia taitai o le ekalesia i le koneferenisi talu ai nei.
“E iloa uma e le ekalesia le auala na faia ai le faaiuga i le susuga Fineaso, o le mumusu ina nei manumalo lea faafeagaiga i le tofi taitai o le ekalesia”, o le isi lea finagalo o Petaia i le talanoaga ma le tusitala. O lana faamatalaga e mautinoa lava le manumalo o lea faifeau i se tasi o tofiga taitai pe ana le vave faia le faaiuga e faamavae loa, a o lei oo i le taimi e palotaina ai tofi. “A e matau mai la i lau faamatalaga, ua ese le tulaga ua agai i ai le pulega o le ekalesia, ua faaletagata ma faaletino ae ua le toe iai se agaga o le Atua i faaiugafai”, na saunoa ai lava le faifeau o Petaia. E lei manuia taumafaiga mo se finagalo o le Peresitene susuga Afereti Samuelu ma le Failautusi susuga Tupu Folasa. Na faaalia e le tamaitai o le ofisa, sa logo le fanoga o le tusitala i le failautusi mo se talanoaga, ae o lana tali e leai se avanoa ona e tele lona pisi. E faapea foi i le Peresitene e tele ana fonotaga ma e le maua ai se avanoa.
