O le fesoasoani mai Amerika Samoa mo mafatiaga o le atunuu ile afa o Eveni, na muamua taunuu.
O se fesoasoani e aofia ai tapoleni, faguvai, lavalava ma taumafa, faapea le selau afe tupe amerika.
O le vave la ona aapa mai ole faigamalo a Tutuila ma Manu’a i mafatiaga o Samoa Tutoatasi ona o le afa ma ana sauaga i matagi malolosi ma tafega, ua fesiligia ai nei e le faigamalo fou ua tulai mai a le alii kovana sili o Lolo Matalasi Moliga, pe sa faapefea ona faia le faaiuga a le kovana ua uma lona taimi e tusa ma le foai tupe e selau afe mo galuega fesoasoani i Samoa tutoatasi ona o mafatiaga mai le afa.
I se lipoti mai Amerika Samoa ua faaalia ai e se sooupu o le faigamalo fou a Tutuila ma Manu’a, toe tasi ma le afa miliona tala le vaegatupe o loo totoe ile teugatupe mo galuega a le Malo ae o le selau afe ua maea ona faasilasila e le kovana ua maea lona taimi le tofa Togiola Tulafono, e le o iloa pe o fea tonu le alagatupe e tatau ona totogi ai pe a fua i le seleni o loo iai nei.
Peitai o le saunoaga mulimuli a Togiola ao ia lei tuua le tofi na ia faailoa ai, o le selau afe o le foai tupe mo Samoa tuaoi ua malilie faatasi iai ma le faigamalo fou a le Kovana o Lolo Matalasi Moliga ma le lutena kovana o Lemanu Peleti.
E lima sefulu afe amerika le isi foai tupe mai Amerika samoa mo mafatiaga o lo tatou atunuu ma o se foai na maua ise sailiga tupe a le koluse mumu a amerika samoa o loo taitaifono ai le Kovana sili filifilia ua seei nei ile tofi.
I se isi o lipoti mai le faigamalo fou a Tutuila ma Manu’a, ua lipotia le faamalolo uma o le komiti faafoe o le pulega o galuega tetele a lea Malo tuaoi ma ose faaiuga mai le kovana sili.
O se tamalii o le tatou atunuu o loo galue i lea matagaluega a le faigamalo i sasa’e le susuga Fonoti Perelini ua tofia e avea ma taitaifono le tumau mo le pulea o lea matagaluega e ta’ua o le ASPA ao faatalia ai se filifiliga a le faigamalo fou o se pule sili ma se komiti faafoe fou.
O le susuga Perelini ua fai si tele o tausaga o aumau ma galue ile Malo o Amerika Samoa, ma sa auauna foi i Samoa tutoatasi i galuega a le Malo.
O ia e iai ona tomai i galuega inisinia ile fausia o alatetele ma isi galuega faa civil engineer.
