O se vaega lenei o se folasaga a le alii loia o Tuala Ponifasio i le finauina o le tetee a le alii na tulai ai i luma o le Faamasinoga Maualuga i lenei vaiaso. O moliaga e lua o le taumafai o se alii e 40 tausaga le matua mai le Anoamaa e fai se faigaaiga faamalosi ma se teineititi e 10 tausaga le matua. Faaalia e le alii loia i le maea ai o le iloiloga, e fesiligia lava le faamaoni o molimau ma e foliga mai na fafau le molimau a le teineititi atoa ai ma lona aunty lea na avea le tagi i le faamasinoga.
Ua fa tausaga o lenei mataupu ma ua 14 tausaga o le teineititi na taua e leoleo na aafia i lenei soligatulafono. E toalua tamaitai matutua na molimau i le itu a leoleo. O le tamaitai muamua lea na lagolagoina le molimau a le teineititi faapea o se tasi o po a o 10 ona tausaga, ua moe i lona moega ae alu atu le alii ua molia ma sii ia i le isi fale e sosoo ma le fale na moe ai ma o ina na taumafai ai lea alii e fai uiga mataga ua taua i moliaga faasaga ia te ia. O lona tagi na lagona mai e tamaitai nei e toalua na matamata i le TV ma laga atu loa a o taumafai le alii ua molia e pupuni lona gutu.
O le molimau a le tamaitai matua muamua lea na ia faaalia ai o la sa matamata le la TV ma lona uso, ae o le teineititi o loo moe i se isi potu o le fale o loo iai ae vaaia loa i le fale sa nofo ai le la tausoga, le alii ua molia ua savali ane le alii ma tape le moli o lona fale. Taua e lea molimau e manatu lava ua moe le ua molia peitai e lei umi ona pe le moli ae faalogoina loa le tagi mai o le teineititi ma tamomoe atu loa. Taua e lea molimau e ki atu le moli o loo taoto le alii lenei i luga o le teineititi ae o loo taumafai e pupuni le gutu o le teineititi.
Peitai o le molimau a le isi uso, le tamaitai lona lua na ia faaalia ai e leai lava ma se mea na tupu i lea po ma e lei tulai mai foi ia gaioiga e pei ona taua e le teineititi ma le molimau muamua.
O le finauga a le alii loia o Tuala Ponifasio e tatau i le faamasinoga ona faaleaoga molimau a le teineititi ma le tamaitai molimau muamua aua o lea ua faaalia e le isi lava molimau a leoleo, e leai ma se mea na tupu i lea aso ma ua foliga mai ua tuuaia sese ai le ua molia ona o le feteenai o nei molimau a le itu a leoleo. E tumau le teena e lenei alii o tuuaiga ua faia faasaga ia te ia.
O lea ua toe tolopo le mataupu mo le lauina o le iuga i le vaiaso o lumanai.
