O le tagi a le alii Nigeria o William Okoro faasaga i leoleo ona o le leiloloa o ana meatotino, ma le sauaina o ia a o nofo taofia i le falepuipui i Tafaigata ua faamaonia ai e le faamasinoga le faatamala o le faatinoga o le tiute o leoleo.
Ua totogi atu ai e le Malo le selau afe o se taui mo lea alii Aferika, toe alu ma tupe a le Malo e totogi ai lona toe foi atu i lona atunuu.
I le silasila a le Malo o se mataupu ua maumau ai tupe a le atunuu ona o le faatamala o le faatinoina o le pitolaau a leoleo.
O le mafuaaga lea o le Komisi suesue ua faatonuina e le Malo lea na amata ana suesuega i le Aso Lulu, 14 o Mati 2012. O le komisi lenei o loo taitaifono ai le alii loia o Patrick Fepuleai ae lagolago i ai se tamaitai loia mai le ofisa o le Loia Sili a le Malo.
O le suesuega a le komisi o loo agai i le mea tonu na tupu mai lava i le amataga ina ua molia le alii Nigeria i se moliaga e faasino i se tinoitupe lea na soloia le moliaga ina ua lē mafai e leoleo ona tuuina atu ni molimau e lagolago ai le faaauauina o suesuega a le faamasinoga i le moliaga o lea alii mai fafo.
O loo sosoo ai ma le fia sailia e le komisi o le mea na tupu ina ua mae‘a lea faamasinoga seia oo ina toe taofia e leoleo Okoro i le falepuipui ae faaiu i le tuuina atu o lana tagi i le faamasinoga faasaga i leoleo ma le ofisa o femalagaiga.
O le aso muamua o suesuega a le Komisi na tulai ai se tasi o tamalii sa avea ma leoleo ma ia folasia i luma o le Komisi le faataotoga o le galuega a leoleo i le tagofia o se suesuega faasaga i se tagata ua masalomia i se solitulafono seia oo ina faia ni moliaga.
Sa fua lea folasaga i le vaitau sa galue ai lea tamalii i le Matagaluega o leoleo ma falepuipui. E lē o faatagaina e le Komisi ona faailoa le suafa o lea tamalii.
O le amataina foi o lenei suesuega na tulai ai nisi o leoleo e toalua ma se sui o le ofisa o femalagaiga i le matagaluega a le Palemia ma le Kapeneta.
O le tamaitai ofisa o le vaega o femalagaiga o Herem Ieremia na ia faamatala lana tiute sa iai i le malae vaalele i Fagalii i le aso 26 o Aperila 2009 lea na toe aumai ai i Samoa le alii Nigeria.
O lana molimau na ia faailoa ai lona kiliaina o le tusifolau o Okoro e tusa ai ma taiala o lana galuega i le ofisa o femalagaiga. Na sosoo ma le molimau a se tasi o leoleo asiasi poo se Police Inspector o Leiataua Luatimu, sa faatonuina e le Komesina e malaga i Amerika Samoa e saili ma toe aumai i Samoa le alii Nigeria.
O le taimi lea o loo galue le alii leoleo asiasi i le vaega o le TransNational Crimes Unit o loo i lalo o le vaaiga a le Matagaluega a le Palemia ma le Kapeneta.
Faaalia foi i le molimau a Leiataua Luatimu, na taunuu i le malae vaalele i Fagalii i le aso 26 o Aukuso 2009, ma tuuina atu loa i lima o nisi o alii leoleo le taulealea Nigeria.
O le alii leoleo taai lua o Tise Muliaga na faia foi lana molimau sa faamatala ai le taofia ma le faatalanoaina o Okoro, seia oo ina faia moliaga faasolitulafono.
O se tasi foi o Komesina lagolago le susuga Leiataua Fata Aviga Salale na tulai mo lana molimau i le Aso Faraile na tea nei, ma sa ia faamatala ai le faatinoga o suesuega a leoleo faasaga i se tasi o le vasega o le Malu o le Malo e tuuaia.
O le aso 30 o le masina nei o Mati o le a toe faaauau ai le suesuega a le Komisi lea o le a faaauau ai le molimau a le Komesina lagolago.
