Fesili – Ua fai sina popole ona ua atoa nei le tolu masina o o‘u faigaluega mo le isi faletaavale, ae totogi mai lava a‘u i le cash. Ou te talitonu e leai se lafoga o toeseina e le fale faigaluega, ona o le aofai lava lea o lo‘u totogi na ofa mai e le pule ae ou te lei amata, lea lava e aumai uma ia te au i vaiaso taitasi. E iai sau aikia e tau faatea ese ai lenei popole?
Tali – E tolu laasaga ou te fautuaina.
• Talosaga i le pule e fia maua se lua talanoaga e uiga i lau galuega ma le faiga o lou totogi. O lena e foliga mai o oe o se tagata faigaluega tumau mo lena faletaavale, na o le pau foi lena o lau galuega. Ua tatau ona saini sau feagaiga faigaluega e pei ona iai le tulafono mo soo se tagata faigaluega tumau. O lenei feagaiga e faamalamalama mai ai le aofai o lou totogi, ma aso e fai ai le totogi, o ou aso ma itula faigaluega, aso mālōlō, aso ma‘i, ma isi aso faatagaina i lalo o le tulafono, atoa foi ou tiute o oe o le tagata faigaluega, ma tiute o le pule e ona le fale o loo e faigaluega ai. Ua tatau ona sainia e oulua ma le pule lenei feagaiga ua lua malamalama ma lua malilie faatasi i ai. Afai o le feagaiga o oe o se tagata faigaluega tumau, o le tiute o le fale faigaluega o le toese o lau lafoga mai lou totogi i vaiaso taitasi, ma totogi atu lenei vaegatupe i le Ofisa o Lafoga, tai masina ma totogi.
• Sefe sina tupe auā le totogiina o lau lafoga mo le vaitaimi lea na leai ai sau lafoga na toeesea e lou fale faigaluega. E faato‘ā faatino lenei galuega pe a mae‘a le aso 31 o Mati i le tausaga fou.
• Faailoa i le Ofisa o lafoga le tulaga sa iai oe i le tolu masina talu ai, ma fai i ai a oo atu ia Aperila o le tausaga fou, lafo mai se pepa e faila atu ai lau lafoga.
Fesili – O lea faato‘ā lesitala le matou pisinisi i le GST. O ā uma faamaumauga e te manaomia pe a oo i le taimi e faila ai le matou GST.
Tali – E fia maua muamua le numera lafoga o le pisinisi, faatumu ma saini le pepa e faataga ai le matou ofisa e avea ma au Tax Agent. Matou te manaomia invoices ma lisiti o tupe alu, tusi siaki, bank statements a le pisinisi, depost books poo faamaumauga e mafai ai ona iloa tupe maua mai faatau, ma lisiti uma lava o faatau a le pisinisi tusa lava pe e lei faaaogāina le tupe a le pisinisi e fai ai nei faatau, ae sa faaaogā tupe a le pule.
Fesili – O lea lava ou te nunumi pe aisea e mafai ai e la‘u uo ona tapa lisiti o ana tupe alu i le taimi e faila ai lana lafoga. O la‘u uo e self-employed, a o a‘u ou te faiaoga tumau i le aoga faataitai?
Tali – O i latou e maua o latou totogi (salaries & wages) e pei o lau susuga, pau lava le tupe alu e mafai ona e tapaina, o le totogi o le failaina o lau lafoga, pe a faapea na faila e se isi tagata mo oe. A o tagata self-employed, atoa ma i latou e galulue i lalo o se konekarate ma totogi withholding tax, e mafai ona latou tapaina tupe alu i le faagaioiga o a latou galuega, i le taimi e faila ai a latou lafoga.
Fesili – Ou te faigaluega amata i le 9 i le taeao, mānava i le 3 i le afiafi e faatatau i le taimi e tuua ai le aoga a si a‘u fanau e aooga i le tulagalua. O lo‘u toalua e faigaluega i lana lava pisinisi inisinia ma le lipeaina o taavale. O lona totogi i le tausaga e $38,000, o loo totogi foi lana lafoga e pei lava o lana aufaigaluega. A o a‘u e $19,000 lo‘u totogi i le tausaga, o loo toese foi e le falefaigaluega la‘u lafoga. E toalua le ma fanau. O lea ua tusi mai le Ofisa o lafoga e toe totogi atu le $2,000 ma ona tupu o le family assistance, ona na toe fai le isi totogi o lo‘u toalua ina ua polofiti le pisinisi. Pe iai sau fautuaga ina ia aua ne‘i toe tupu mai lenei faafitauli i le tausaga fou?
Tali – Pau lava le auala e mautinoa ai e oulua e lē toe totogia se tupe i le faaiuga o le tausaga, o le faatonuina lea o le Ofisa o Lafoga e taofi le totogi mai o le lua family assistance tai vaiaso, ae se‘i totogi mai pe a uma le tausaga. A mae‘a le tausaga ona mafai lea ona iloa le aofai atoa o lua totogi tuufaatasi na maua, e aofia ai ma nisi totogi na fai ona ua solosolo lelei le pisinisi. O le aofaiga lenei e faaaogā e le Ofisa e fuafua i ai le aofai o le lua family assistance e tatau ona maua mai. Se‘i vaganā ua lua mautinoa i le amataga o le tausaga, na o le pau lava lea o le aofaiga atoa o lua totogi o le a maua i le tausaga atoa, ona tuu pea lea e totogi mai oulua tai vaiaso.
Fesili – O au lea e self-employed, a o lea ua maua mai le pili mai le ACC e totogi atu le $465. O le ā foi lenei pili o lena ua uma ona e failaina la‘u lafoga, ma e fai mai e totogi le $1,200 i le Ofisa o Lafoga a o lei oo i le aso 7 Aperila 2011.
Tali – Ona o lena e te self-employed, e lē o totogiina sau PAYE e pei o tagata ia e employees. O le PAYE lea e tipi mai i le totogi o le employee, o loo iai i totonu ma le ACC poo le earner levy. O le $1,200 lena o le a totogi i le Ofisa o Lafoga, e lē o iai se ACC. O le mafuaaga lena o le ese mai o le pili a le ACC.
