Fesili – O lea ou te faamoemoe e sue manuia i Ausetalia mo se tausaga, se‘i siaki foi le vao o lena atunuu pe lauusiusi. Ou te manao e tapuni la‘u pisinisi, ae faaauau pea le lesitala a le kamupani se‘i o‘u toe foi mai. E iai ni pepa e faatumu?
Tali – Na o le pau le pepa e faatumu o le IR433, e logo atu ai le Ofisa o lafoga, o lea ua faamuta lau pisinisi se‘i e toe faaolatia mai. A talia e le Ofisa lau talosaga, ua aumai ia te oe le faatagaga e lē toe failaina ni lafoga a le kamupani se‘i e toe foi mai.
Fesili – Sāua i le faalogo o loo iai fesoasoani a le malo mo matou nei e nonofo ma faigaluega i Christchurch, lea ua aafia tele i le mafui‘e. Se‘i fai mai sau faamatalaga i lenei tulaga?
Tali – Mo tagata taitoatasi ua leai se galuega ona ua tapunia le fale faigaluega talu ai le mafui‘e, e maua le $400 i le vaiaso pe a faigaluega tumau, ae $240 a le tagata faigaluega part-time. E totogi sa‘o atu ia te oe lenei tupe mamā mo le ono vaiaso.
Fesili – Ae faafefea matou nei e fai a matou pisinisi ma kamupani? E iai foi tagata faigaluega, a o le taimi nei o loo tapuni le ofisa se‘i uma ona faalelei le tulimanu lea na malepe i le mafui‘e. O lea foi e lipea le auala a le malo, e lei maua uma foi fesootaiga o telefoni, faapea foi le vai ma le eletise.
Tali – Na o ituaiga pisinisi nei poo fale faigaluega e mafai ona maua le fesoasoani tupe mai le malo:
• o se pisinisi e pulea e tagata Niu Sila
• o le ofisa poo le fale faigaluega e tu i totonu o le siosiomaga o nuu ia e lisi atu i lalo
• e faatatau foi lenei fesoasoani mo le au faipisinisi self-employed, a sole-trader poo se contractor
• o loo tapunia le fale faigaluega mo le taimi nei se‘i uma ona fai lipea o le fale ma le auala, eletise, telefoni ma le vai. Ae toe tatala lava le Ofisa i se taimi o i luma.
O le lisi lenei o nuu e faatatau tonu i ai lenei fesoasoani mo le au faipisinisi:
• Akaroa-Wairewa
• Burwood-Pegasus
• Fendalton-Waimairi
• Hagley-Ferrymead
• Lyttelton-Mt Herbert
• Riccarton-Wigram
• Spreydon-Heathcote
• Shirley-Papanui
E totogi sa‘o e le malo i le fale faigaluega poo lē e ona le pisinisi le $500 i le vaiaso mo le tagata faigaluega tumau e toatasi, ae $300 i le vaiaso mo le tagata faigaluega part-time.
O lenei fesoasoani e lē tau totogiina se GST, ae tatau lava ona toese ma totogi le PAYE.
Afai o iai se tagata faigaluega na aafia i le mafui‘e, o loo maua mai se fesoasoani mai le ACC, e lē mafai e le fale faigaluega ona apalai se fesoasoani mo lena tagata.
O loo lapatai mai le malo, mo le au faipisinisi e iai a latou inisiua, e muamua tapa se fesoasoani mai le kamupani inisiua.
Telefoni 0800 779 997 mo nisi faamatalaga, pe apalai nei loa i luga o aupega o fesootaiga tuatusi: http://www.msd.govt.nz/
Sue se ofisa lata ane o le WINZ o loo maua ai computers ua faapitoa mo outou e faaaogā. O ofisa nei o le WINZ e tatala i le 8.30am-5pm i aso faigaluega, poo le 9am–4pm i le weekend:
• Ashburton Community Link, cnr Cass and Moore Streets
• Hornby Service Centre, 25 Shands Road
• Rangiora Service Centre, cnr Good and Blake Streets
• Riccarton Service Centre, 76 Riccarton Road
• Kaiapoi Community Link, 77 Hilton Street
• Shirley Service Centre, 203-205 Hills Road
• Linwood Community Link, 154 Aldwins Road
• New Brighton Service Centre, 26 Beresford Street
