Fesili – Se‘i faamalamalama mai lava le uiga o “tax code” lea e tusia i luga o le pepa IR330?
Tali – O le faamatalaina nei o tax code. Afai e lua pe sili atu le aofai o au galuega, o tax code nei e faaaogā mo lau uluai galuega:
• M e faaaogā e le tagata e tasi lava le galuega ma e leai se student loan.
• M SL e tasi le galuega ae e iai le student loan. O le aofai atoa o lona totogi mo le tausaga e sili atu i le $19,084.
• ME e faaaogā pe a i le va o le $24,000 ma le $48,000 le totogi o le tausaga atoa, e leai se student loan, e lē maua foi le family assistance.
• ME SL pe afai e i le va o le $24,000 ma le $48,000 le totogi o le tausaga atoa, e iai le student loan, ae leai se family assistance e maua.
• ML e faaaogā pe a i lalo ifo o le $9,880 le totogi o le tausaga atoa, e lē o se tamaitiiti aoga, e lē maua foi le family assistance, e lē maua foi le penefiti lē faigaluega.
O tax code nei e faaaogā mo lau galuega lona lua:
• SB aofai atoa o ou totogi mai au galuega uma e $14,000 pe i lalo ifo i le tausaga.
• S aofai atoa o ou totogi mai au galuega uma e i luga o le $14,000 ae lē sili atu i le $48,000 leai se student loan.
• S SL aofai atoa o ou totogi mai au galuega uma e i luga o le $14,000 ae lē sili atu i le $48,000 ae e iai le student loan.
• SH aofai o ou totogi mai au galuega uma e sili atu i le $48,000 i le tausaga, leai se student loan.
• SH SL aofai o ou totogi mai au galuega uma e sili atu i le $48,000 i le tausaga, ae e iai le student loan.
• ST aofai o ou totogi mai au galuega uma e sili atu i le $70,000 i le tausaga, leai se student loan.
• ST SL aofai o ou totogi mai au galuega uma e sili atu i le $70,000 i le tausaga, ae e iai le student loan.
Fesili – O lea lava ou te nunumi pe aisea e mafai ai e la‘u uo ona tapa lisiti o ana tupe alu i le taimi e faila ai lana lafoga. O la‘u uo e self-employed, a o a‘u ou te faiaoga tumau i le kolisi?
Tali – O i latou e maua o latou totogi salaries and wages e pei o lau susuga, pau lava le tupe alu e mafai ona e tapaina, o le totogi o le failaina o lau lafoga, pe a faapea na faila e se isi tagata mo oe. A o tagata self-employed, atoa ma i latou e galulue i lalo o se konekarate ma totogi withholding tax, e mafai ona latou tapaina tupe alu i le faagaoioina o a latou galuega, i le taimi e faila ai a latou lafoga.
Fesili – O le ā le mafuaaga e ala ai ona eseese tausaga e lipoti ai tala o tupe a ekalesia? O isi ekalesia e amata ia Iulai ae faauma ia Iuni o le tausaga e sosoo ai. A o isi foi ekalesia e tausaga faatasi ma le malo, e amata ia Aperila ae faaiu foi ia Mati o le isi tausaga?
Tali – Afai o se ekalesia o loo faamalumalu i lalo o se faalapotopotoga tele, ua tatau ona iai se faavae poo ni tulafono e mulimuli ai.
O totonu o lenei faavae, e masani ona faataoto mai ai le taimi e fai ai fono faaletausaga, o inā foi la e faatonu mai ai le tausaga e tatau ona faaaogā e nei ekalesia uma e lipotia ai a latou tala o tupe. Ae afai o se ekalesia fou e leai sona faamalumaluga, e tutoatasi
lava ia, e fou foi lona faavae, e masani ona faaaogā le tausaga e atoa i ai le sefululua masina talu mai ona amata pe faatū le lotu.
Fesili – Ua maua le matou tusi mai le Ofisa o lafoga, e uiga i le GST a le matou aoga faataitai ua ova atu i le $20,000 ua aitalafu ai matou. E iai sau fesoasoani?
Tali – Muamua lava ona faafesootai le Ofisa, talosaga i ai e tuu mai se avanoa e togitogi atu ai le tou aitalafu.
Sauni faalelei se tou pakesi ia mautinoa lelei e outou, o le ā se aofaiga o se tupe e malie mai le Ofisa e togitogi atu, e mafai ona tou tausisi i ai ia aua ne‘i misi.
O le tulaga tāua i le Ofisa o le vaai mai o lena tou te taumafai e totogi le aitalafu. E iai aoga faataitai ua ou iloa ona o le faamaoni e togitogi le latou aitalafu, na talia e le Ofisa le latou talosaga e faamagalo se isi vaega o le aitalafu.
E iai foi isi aoga ua muamua talosaga e faamagalo le aitalafu, na teena e le Ofisa, e lei taliaina foi se talosaga ona o le lē faamaoni.
Fesili – Ae o ā ea nei lafoga e totogi mo le faifeau pe afai o lena e lē totogi lafoga ni aulotu?
Tali – E lē totogiina se income tax a le aulotu pe afai ua uma ona lesitala i le Komisi, ae totogi lava le PAYE a le faifeau.
O le PAYE a le faifeau, o le vaega lea o lona totogi, o le tiute o le Teutupe o le toese mai lea i le taimi e fai ai le totogi o le faifeau, ma momoli atu i le Ofisa o Lafoga. E lē o se lafoga a le aulotu.
Fesili – Fai mai le isi vaega e mafai e le matou aulotu ona claim le GST o le totogi o le faifeau.
Tali – O le totogi poo le alofa o le faifeau e lē aofia i totonu o le siosiomaga o le GST. E lē mafai foi la ona tapaina pe claim se GST.
