Fesili – O lea faato‘ā amata la‘u pisinisi kamuta mo le lipeaina o fale. E toalua la‘u aufaigaluega e fesoasoani ia te au. O le matou konekarate lea ua saini, e tusa ma le va o le $120,000 – $150,000 i le tausaga le tupe maua. Sau fautuaga e uiga i le GST, ae faafefea le faiga o totogi ma le tipiina o lafoga a le aufaigaluega?
Tali – Ona e sili atu i le $60,000 le tupe maua, e tatau ona lesitala i le GST. E mafai ona faila tai 2 masina pe tai 6 masina. A tai 6 masina ma faila, e tau sefe ai foi se tupe, i lo le faila soo pe a tai 2 masina. E tatau foi ona lesitala mo le totogiina o le PAYE. Tofu le tagata faigaluega ma le pepa IR330 e faatumu. I luga o le pepa lena o loo faailoa mai ai e le tagata faigaluega lana tax code, e tipi fuafua i ai lana lafoga pe a oo i le taimi e fai ai totogi. E uma loa ona lesitala le kamupani mo le PAYE, ona lafo mai lea i masina taitasi e le Ofisa o lafoga le pepa IR345, e faatumu. Tusi ai i luga le igoa, numera lafoga, aso na amata ai ona faigaluega, tax code, aofai o le totogi ma le lafoga na tipi i le masina ua tuanai. Ona faafoi lea o le pepa faatasi ma le siaki e totogi ai le PAYE, a o lei oo i le aso 20 o le masina.
Fesili – O le matou faleoloa e gaosi i Samoa le tele o matou oloa. E iai se GST o tupe ia e fai ai faatau i Samoa? Ae ā le tau o matou pasese i luga o vaalele, totogi o fale talimalo ma taavale matou te feoai ai i Samoa?
Tali – O le GST e faaopoopo i le tau o oloa gaosi ma galuega e faaaogā i totonu o Niu Sila. E leai se GST o le tau o oloa pe a faatau mai i fafo, faato‘ā totogi le GST i le Ofisa o Tiute, i le taimi e taunuu mai ai oloa i totonu o Niu Sila. O totogi o pasese i luga o vaalele, tau o fale talimalo ma taavale e feoai ai i Samoa, e leai se GST.
Fesili – Faato‘ā ou foi mai i le semina na talanoaina ma a‘oa‘o ai le tusiina o konekarate poo le feagaiga lea e saini a o lei faafaigaluegaina se tagata. Matuā tele nei mau gaogaosa. Foliga mai o le tele o le taimi o ma‘ua o le a alu i le tau faatumuina o nei pepa, ae laiititi le taimi e faatamoe ai le pisinisi. E oo foi i le aufaigaluega e tofu lava le tagata ma lana galuega e fai. Leai se taimi e toe suesue ai faila pe o iai ni feagaiga. Sau fautuaga?
Tali – E moni le faaseā, a o le faalavelave, o galuega uma lava ia e oo i ai soo se tagata e fai sana pisinisi ma iai ana tagata faigaluega. E lē mafai ona ‘alo ese mai ai. E sili ona faafaigaluega se tagata e iai sona tomai, na te saunia feagaiga, pe tusiina konekarate mo oe, e mafai ona faaaogā i soo se taimi e faafaigaluega ai se tagata fou. A lē o lena, e mafai foi ona saunia lava e oulua nei feagaiga, e faaaogā ai feagaiga ua uma ona saunia e le Ofisa o Leipa. E maua nei fesoasoani mai le website, www.ers.dol.govt.nz. Mafai ona sefe le lua tupe lea o le a tau totogi ai se isi na te saunia nei feagaiga. Aemaise foi e fesoasoani e faamatala ia oulua le tulafono, ma le mafuaaga e ala ai ona tāua tele le taimi lea e faaalu mo le tapenaina o nei pepa.
Fesili – Ou te faigaluega tumau e $42,000 lo‘u totogi, ma ou galue faavaitaimi i le pisinisi a le matou aiga e maua ai la‘u $14,000 i le tausaga. O lo‘u toalua e faigaluega tumau i le pisinisi e $24,000 lona totogi. E iai se auala e mafai ai ona tipi i lalo la u lafoga?
Tali – A faaopoopo faatasi ou totogi mai au galuega e lua, ua sili atu i le $48,000. O totogi i le va o le $14,000 ma le $48,000 e 17.5% le lafoga. Totogi i luga atu o le $48,000 ua mei foi le lafoga i luga i le 30 %. Vaevae lou totogi lena e maua mai i le pisinisi. Totogi na o le $6,000 ia oe, ae faaopoopo le $8,000 i le totogi o si ou toalua. Ona maualalo pea lea o lau pasene lafoga i le 17.5%.
