Fesili ma Tali – 27 November 2012

Fesili – O la‘u nonogatupe lea sa fix mo le lua tausaga ua tea, lea ua tusi mai le faletupe ou te filifili ma logo atu latou pe toe fix mo se vaitaimi, pe tuu ai pea i le pasene tului femoumouai. Sau fesoasoani faamolemole?

Tali – O le tasi o mafuaaga e ala ai ona mananao isi tagata e fix a latou nonogatupe, ona e mautinoa lelei le aofai o le peimeni ma le taimi e totogi ai, pe totogi ta‘i vaiaso, poo le lua vaiaso, pe ta‘i masina foi. Na o le saini lava o pepa ona faitalia lava lea o le faletupe ma toese le totogi i le taimi sa‘o.

Pau lava le matafaioi a le tagata e ona le nonogatupe, o le mautinoa e oo atu i le taimi e toese ai le peimeni e le faletupe o loo iai le aofai sa‘o o le tupe i totonu o le tusitupe. O la‘u fautuaga, o le isi itu tāua e tatau ona suesue muamua a o lei faia lau filifiliga, o le aofai o le pasene tului. Ona faatusatusa lea o le pasene tului femoumouai, ma le pasene tului tumau mo se vaitaimi.

E lua lava malosiaga o loo latou faatonuina le feoaiga a pasene tului i totonu o Niu Sila. O le malosiaga lea o le Fale Tupe tutotonu poo le Reserve Bank, na te pulea le Official Cash Rate (OCR) lea oloo 2.5% i le taimi nei.

O isi faletupe uma o loo fai a latou fefaatauaiga ma le Fale Tupe tutotonu i aso uma. E nono mai tupe e faletupe nei e pei o le Westpac mai le Fale Tupe tutotonu i se pasene tului e latalata i le OCR.

E faapena foi tupe o loo teuina e faletupe nei e totogi mai i ai e le Fale Tupe tutotonu se pasene tului e lē mamao ese ma le OCR. O le mafuaaga lena a alu i lalo le OCR, ua tuu foi i lalo le pasene tului femoumouai a faletupe. Ae a sii i luga le OCR, e faapena foi ona sii i luga pasene tului a faletupe.

O le malosiaga lona lua o pasene tului o faletupe i atunuu i fafo. Auā e lē na o le Fale Tupe tutotonu e fai a latou fefaatauaiga ma faletupe a Niu Sila. O loo fefaatauai foi ma atunuu i fafo.

O le malosiaga lenei e tele ina aafia ai pasene tului tumau mo se vaitaimi. E leai ma se isi na te mautinoa, e oo lava i faletupe e lē mafai ona valoia e se isi poo le ā le pasene tului i tausaga o i luma. O le mafuaaga lea o le tuu mai o pasene tului eseese e te filifili i ai.

O la‘u fesoasoani e avatu pea e lē o se valoaga auā ou te lē mautinoa foi e a‘u ia e faapea, fix le ‘afa o lau nonogatupe mo sina vaitaimi aua ne‘i sili atu i le lua tausaga, ae tuu le isi ‘afa i le pasene tului femoumouai.

 

Fesili –  E iai le ma fanau o loo aooga i le kolisi, lea o le a faafaigaluega faavaitaimi e fesoasoani i le matou fale‘aiga i le taimi e tuua ai aoga ia Tesema. O le taimi muamua lenei ua faigaluega ai le vaega lea. Pe e iai ni pepa e faatumu i le va ma le Ofisa o lafoga, ae fia foi se lafoga e totogi pe a faapea e tatau ona tipi se la lafoga?

 

Tali – Afai e lei faigaluega muamua le lua fanau talu mai le amataga o Aperila o le tausaga nei, e lē manaomia ona toese se lafoga, leai foi ni pepa e faatumuina, pe afai o le aofai o le totogi a le tagata e toatasi e lē sili atu i lo le $2,340 mo le tausaga atoa (1 Aperila 2011 se‘i oo i le aso 31 Mati 2012).

 

Fesili – O lea e tau sue se isi na te faia le okika a le matou lotu. E lei faia lava se okika talu ona faavae le matou lotu. O masina taitasi e fai a matou fono e sauni lava e le Teutupe le lipoti o tupe.

E lua ofisa suetusi na ou telefoni e suesue se tau e fai ai se okika ae fai mai e taugata le okika, ae o le review e taugofie. O ā nei mea o “review” ae aisea e taugofie ai i lo le tau o le “okika”?

 

Tali – E mafua ona taugata le okika ona o le tele o suesuega e tatau ona faatino e le Suetusi ona faato‘ā mafai lea ona fai sana lipoti.

E sili atu foi le aofai o tulafono e faaaogā e le Suetusi i le faatinoina o le okika, i lo le aofai o tulafono e faaaogā mo le review. O suesuega a le okika e mafai ai ona maua pe lalaga i luga ni tupe ua gaoi pe faaaogā sese o loo taumafai nisi e faalilolilo, tusa lava pe aumai le lipoti e paleni.

A o le review mo se faataitaiga, a paleni lava le lipoti lea na sauni e le Teutupe ma le lipoti mai le faletupe ona uma ai lea o suesuega o lena vaega. Ae afai na ave se siaki a le lotu totogi ai le moli o lou fale, ae sa tatau ona totogi ai le moli o le falesa, e lē o se tiute o le review le suesue o lenei mataupu ma faailoa mai i lana lipoti.

Ae o le tiute o le okika e suesue tulaga faapea ma faailoa i le aulotu. A faatamala le Suetusi i le faatinoina o le okika e faasala mamafa e le Sosaiete Suetusi. O le mafuaaga lea o le taugata o lana galuega.