Fesili – E fia le GST ae faafefea foi ona sue? E $2,300 le matou siaki fesoasoani a le Council mo mea fa‘ili a le autalavou, ma le faaupuga o loo iai le GST e totogi.
Tali – $300 le GST. E maua pe a vaevae le $2,300 i le 23, ona faatele lea i le 3.
Fesili – Faapea matou o tupe faameaalofa mai matagaluega a le malo, e faatino ai galuega i totonu o nuu, ekalesia ma faalapotopotoga, e leai ni GST e totogiina.
Tali – Soo se meaalofa tupe e maua mai i se matagaluega a le malo e pei o le Ofisa o Aoga, Ofisa o Falemai, ACC poo le WINZ, o loo iai le GST e ao ina totogi i le Ofisa o Lafoga. E faapea foi meaalofa poo grants e maua mai i le Lotteries Commission. O fesoasoani tupe mo le totogiina o le aufaigaluega e maua mai i le WINZ, e faapena foi ona iai le GST e totogi. Ae e iai isi meaalofa tupe e maua mai i Community Boards e i lalo o le faamalu a le Council, e leai se GST e totogiina. Silasila lelei i le tusi lena na lafo faatasi mai ma le siaki, e faailoa mai ai le aofai o le tupe, ma aiaiga o le faaaogāina o lenei tupe, pe totogi se GST pe leai.
Fesili – O a‘u lea e self-employed, a o lea ua maua mai le pili mai le ACC e totogi atu le $465. O le ā foi lenei pili o lena ua uma ona e failaina la‘u lafoga, ma e fai mai e totogi le $1200 i le Ofisa o Lafoga, a o lei oo i le aso 7 Aperila 2011?
Tali – Ona o lena e te self-employed, e lē o totogiina sau PAYE e pei o tagata ia e employees. O le PAYE lea e tipi mai i le totogi o le employee, o loo iai i totonu ma le ACC poo le earner levy. O le $1200 lena o le a totogi i le Ofisa o Lafoga, e lē o iai se ACC. O le mafuaaga lena o le ese mai o le pili a le ACC.
Fesili – Ou te lē malamalama pe aisea e totogi ai fua lea pili a le ACC; ou te lei lavea lava i se faalavelave talu mai ona ou faigaluega.
Tali – Se‘i manatua o le ACC, o se isi foi ituaiga lafoga e ao faamalosi e le malo i lalo o le tulafono. A lē totogiina lona uiga ua soli le tulafono. Na o tupe maua mai i le penefiti, e leai se ACC e totogi, ae totogi lava le lafoga. Ae soo se totogi e maua mai i soo se ituaiga galuega, e totogi uma lava le ACC, pau le eseesega o auala e ao ai e le malo lenei foi ituaiga lafoga. Pe iai se faalavelave e tupu i taimi faigaluega pe leai, e totogi lava le lafoga e aofia ai ma le ACC earner levy.
Fesili – Ae fai mai le isi a‘u tama le la e fai foi lana pisinisi e pei o a‘u, pau le eseesega o ma‘ua e iai lana aufaigaluega. E lua ana pili na lafo mai i le ACC la e tau totogi. Aisea ua lua ai ana pili?
Tali – E lua ituaiga ACC e totogi. O le earner levy e totogi e tagata faigaluega taitoatasi. E fuafua lava i le aofai o lou totogi. O lenei tupe e ao e le malo ma faaaogā mo faalavelave e tutupu i taimi e lē o ni taimi faigaluega. A o le Workplace cover levy, e totogi e le fale faigaluega mo manu‘a ma faalavelave e tutupu i taimi faigaluega, poo luga foi o galuega. E fuafua le tupe totogi i le ituaiga fale faigaluega, ma le aofai atoa o totogi o le aufaigaluega. O fale faigaluega e ta‘iina uaea eletise ma telefoni, poo fale kamuta e feaei i apefai e vali fale, e taugata atu a latou pili, i lo fale faigaluega e tele ina faatino galuega i totonu o ofisa. Soo se taimi e tupu ai se faalavelave faafuasei, poo luga o galuega, poo taimi o tafaoga ma malologa, e leai se faaletonu o le tapaina o lau ACC. A o e gasegase e totogi mai oe e le ACC se‘i oo i le taimi ua e malosi ma ua mafai ona toe foi i le galuega. Ae afai o se faalavelave matuiā, ua lē mafai ona toe foi i le galuega, e aumai e le ACC se vaega tupe (pe a uma ona faatumu pepa ma talia lau talosaga) e tausi ai oe, sei oo i le taimi e maua ai lau penisione. Ae a tupu se faalavelave ae suesue atu na e faigaluega ae e lei totogiina se ACC, o le a tetee mai foi le Ofisa o le Malo e leai se fesoasoani e aumaia.
