Fesili – O ma‘ua ma lo‘u toalua palagi e iai lo ma fale (bach) i Taupo, e faaaogā matou te malolo i ai i aso fiafia e pei o le Kerisimasi ma le Tausaga Fou. Ou te faigaluega tumau pule o le ASB Botany. O loo matou nonofo ma le ma fanau laiti e toalua i le matou lava fale i Aukilani. O le fale i Taupo o loo togitogi le mokesi. O le la foi e faasalalau i luga o le “Book a Batch” website mo nisi e fia nofo totogi ai, a o lenei lava e lei nofoia. Ua fai sina ou popole i le tulaga o le va ma le Ofisa o lafoga, pe mafai ona e faasoa mai faamolemole?
Tali – Afai na o le vaitaimi o le Kerisimasi ma le Tausaga Fou e faaaogā ai e le tou aiga le fale, ae o lena e avanoa mo nisi e fia nofo totogi ai i isi taimi o le tausaga. E faamaonia lea i le faasalalauga lena o loo tau sue pea nisi e mafai ona nofo totogi ai. I lalo o le tulafono, tusa lava pe lē o maua mai se tupe ona o lena e tuufua le fale, e mafai lava ona e tapaina se vaega o tupe alu (expenses) mo le faatamoeina o le fale e pei o le tupe tului o le mokesi, lafoga o le fanua, lipea ma le inisiua o le fale. E mafai ona e tapaina le sefulu masina auā o lena e faaaogā e le tou aiga le fale i masina o Tesema ma Ianuari. E manaomia e le Ofisa ni faamaoniga o lena na avanoa le fale mo le sefulu masina a o tau sue nisi e nofo totogi ai.
Fesili – O le fale lava lenei na ma faatauina ia Tesema 2011. Ua fai sina tuai o fata ma kapoti o le umukuka. I le masina na tea atu nei na faatau ai le umukuka fou, tama foi ia e na o le faatau mai lava ona sau lea o le kamuta faapipii. E sili laiitiiti atu lava i le $5000 le tau atoa o le umukuka fou ma lona faapipiiina. E mafai ona faaaogā le tupe alu lea i lalo o lipea o le fale e tusa ai ma lau tali i le fesili lea e i luga?
Tali – O galuega mo le faaleleiina o se fale e lavea i lalo o lipea e pei ona faamalamalama mai e le Ofisa o Lafoga, o le tau lea o le faaleleiina o se vaega o le fale ua pala, ina ia toe faafoi i lona tulaga sa iai a o lei pala, ina ia mafai ai ona faaaogā. Auā e lē mafai ona teu ni meaai i totonu o se kapoti ua pala. E lē fetaui foi ma le soifua maloloina. Ae a faapea o le mafuaaga na faafou ai le umukuka, ona o fata ma kapoti ua tuai ae e lei pala, lona uiga o lena lava e mafai ona faaaogā, o galuega la nei e tau o capital expenditure, ae lē o ni lipea. E lē o ni galuega lipea ae o galuega e faamanaia ai le umukuka ina ia pei o umukuka o aso nei, ma o le a avea foi lenei galuega ma mafuaaga e ono faaleleia ai le tau o lenei fale.
Fesili – Ae faafefea le toe valiina atoa o fafo o le fale. Ni galuega lipea?
Tali – Afai o fafo atoa o le fale na iai le vali ae ua matafi ma mafoefoe ona o timuga ma mugala poo elemeni o le tau, o galuega lipea le ta‘u o galuega nei. Ae afai o se fale e fau fafo i laupapa faapitoa e lē tau valiina, na e faatauina mai lava e lē o iai se vali, ae o lenei ua e manatu e vali ina ia faamatagofie ai lona lanu, e ono fai mai le Ofisa o Lafoga e lē o se lipea le galuega lenei.
Fesili – O lea e fia sii le matou ofisa i se isi nofoaga lapoa atu i lo le matou nofoaga i le taimi nei, ua fai si pumoomoo, a ua ola foi le kamupani ia. E manaomia se ofisa fou e ofi uma ai le aufaigaluega aemaise ia lava le avanoa mo a matou malo ma le au faatau, ia lava foi nofoaga e paka ai taavale. E iai la le ofisa fou ua uma ona matou siakiina, a o le faalavelave o lea ua tapa mai le pule o lenei fale e fia vaai i lipoti o tupe a le matou kamupani, faato‘ā mafai lea ona fai se matou lisi. O le ā tonu lava le mafuaaga e fia vaai ai le vaega lea i le lipoti o tupe a le matou kamupani?
Tali – Ou te talitonu o se lisi e lē taugofie lona totogi. O le tulaga muamua e manao ai lenei vaega e ona le fale, e fia faamaonia pe tou te gafatia le totogiina o le lisi. Pe mafai foi ona faatuatuaina le tou vaega e totogi le lisi i le taimi e tatau ona totogi ai, ma faatino uma isi tou tiute e pei ona tusitusia i lalo o se tou feagaiga, pe a oo i le taimi e saini ai se feagaiga.
