Fesili – Na atoa ia Novema lo‘u 65, a o lea lava ou te faigaluega. E mafai ona e fautua mai e uiga i la‘u KiwiSaver pe taofi loa e aua le toe toeseina mai i lo‘u totogi?
Tali – A e finagalo e faaauau pea ona toese lau KiwiSaver mai i lou totogi auā o lena o loo e faigaluega pea, e tatau ona logo le ofisa fai totogi o le tou fale faigaluega.
O le aso na atoa ai le 65 tausaga o lou soifua, o le aso foi lena e faagata ai ona toe totogiina e lou fale faigaluega le lua pasene o le latou sao i totonu o lau teugatupe, lea e totogi uma i le ofisa o lafoga.
Ae afai ua e finagalo e taofi loa lau KiwiSaver ua lava foi lea, ona faatumu lea o le pepa KS51 ma tuuina atu i le ofisa fai totogi o le tou fale faigaluega.
Fesili – Ua leva ona ou faigaluega ae e lei faia lava sa‘u KiwiSaver. A o lenei ua ou manatu o le a amata ia Ianuari o le tausaga fou. E fia se aofai o lo‘u totogi o le a toese?
Tali – O le tulafono i le taimi nei e tatau ona toese le lua pasene mai lou totogi a o lei toeseina le lafoga.
Mo se faataitaiga, a $500 lou totogi o le vaiaso a o lei toeseina le lafoga, e $10 lau KiwiSaver e tatau ona toese mai i lou totogi o le vaiaso. E mafai ona sili atu i le lua pasene o lou totogi e toese mo lau teugatupe, ae e lē mafai ona i lalo ifo o le lua pasene.
O nei fuainumera e faailoa atu i le ofisa faitotogi i luga o au pepa i le taimi e faatumu ai.
Ae amata mai i le aso muamua o Aperila o le tausaga fou, ona siitia mai le 2% i le 3% o le a toese mai i lou totogi mo lau KiwiSaver. E mafai foi ona sili atu lau teugatupe i le 3% o lou totogi, ae e lē mafai ona i lalo ifo.
Fesili – Na e ta‘ua i se tali o i luga faapea e iai le sao o lou fale faigaluega i lau teugatupe. E fia le aofai o le latou fesoasoani?
Tali – E 2% foi o lou totogi a o lei toeseina lau lafoga e faaopoopo mai e lou fale faigaluega mo lau teugatupe. O lenei foi 2% o le a siitia i luga i le 3% ia Aperila o le tausaga fou.
Fesili – O le matou kamupani o loo faamoemoe o le tausaga fou matou te faatauina ai le togiga mo le aulakapi a le matou nuu, lea e taaalo mo tauvaga lakapi foi ia a Aukilani Niu Sila. O le a lolomi le tagavai ma le igoa o le matou kamupani i luga o le togiga. E mafai e le matou ofisa ona tapaina le tupe alu i le faatauina ma le lolomiina o lenei togiga?
Tali – E faataga e le Ofisa o Lafoga tupe faaalu mo le faalauiloaina atili o le tou kamupani, e pei o se sponsorship mo se autaaalo ma le faatauina o le togiga e pei ona iai le tou faamoemoe.
Fesili – Sau fesoasoani mo tupe ia e faaalu e le matou ofisa, pe afai o se tasi o le matou aufaigaluega e aumau i Aukilani ae o loo malaga atu i Ueligitone i feau poo pisinisi a le Ofisa.
O le ā sau faamatalaga i le tau o lona pasese, totogi o le faletalimalo e nofo ai ma le totogi o ana mea taumafa a o aumau o ia i Ueligitone?
Tali – O totogi uma o lenei malaga i luga o pisinisi a le ofisa, e mafai ona faaaogā mo le faalaitiitiina o le lafoga totogi.
Fesili – Ua uma ona ou faatonu le pule lua o le matou ofisa, e o ma lona faletua e ave le pule o le kamupani lea latou te sapalaia mai a matou galuega i se fale‘aiga taugata, e fai ai se latou mea taumafa, e faafetai atu ai mo galuega o lenei foi tausaga. E mafai ona tapa uma le totogi o lenei taumafataga?
Tali – O le totogi o le taumafataga lenei e lavea i lalo o tulafono mo faafiafiaga poo entertainment. E na o le 50 pasene foi le tau o le taumafataga e mafai ona tapaina mo le lafoga.
Fesili – Ae ā le totogi o taumafa i aso e fai ai se seminar mo le aufaigaluega e pei o le malu o le taeao ma se taumafa o le aoauli? Ae ā le tau o le KFC poo le pizza a le aufaigaluega e fai ai se latou taumafataga o le po ona sa faigaluega ovataimi?
Tali – O le tau o meaai mo le aufaigaluega e taumafa i totonu o le Ofisa i totonu o itula faigaluega e lē lavea i le siosiomaga o le entertainment, e mafai foi ona tapaina le 100% o le GST atoa foi ma le faaitiitia o le lafoga totogi a le kamupani.
