Fesili – O le aofai lea e tusi i luga o la‘u lisiti mai le matou lotu e $5800, E fia se refund e maua?
Tali – A foai le $1 e toe maua mai le 33 sene. Lona uiga a $5800 le foai e maua le refund $1933.
Fesili – O a‘u ou te talitonu a foai tupe mo le Atua e lē tatau ona toe tapaina se lisiti. O tupe ua foai mo galuega a le lotu e pule ai Iesu, e lē tatau ona faailoa i se isi tagata na o le va o a‘u ma le Atua?
Tali – Faafetai mo le fesili ma le faasoa mai o lou talitonuga. E tofu lava le tagata ma lona talitonuga ae ou te tali atu faa-Tausi Tusi.
O le tele o aulotu ua faaaogā fuainumera ma teutusi e lafo ai le seleni foai. E lē mafai ona iloa atu e Pai le aofai o le foai a Lafai. Na o le Teutupe poo lē na te sainia le lisiti e ono maitauina lenei tulaga.
O le tiute ma galuega a le Teutupe o le faamaumauina o tupe maua uma a le Ekalesia, e lē gata e tusa ai ma tulafono a le Ofisa o Lafoga, aemaise pe a oo i le taimi e manaomia ai ona okika tusi a le lotu.
A faatumu le pepa e apalai lau refund, tusi ai le numera o le tusitupe a le lotu, ina ia toe foi le refund i le lotu, ona pei lava laia e leai se mea na tupu, a o lena ua toe faaopoopo atu lou alofa mo galuega faatino a si tou ekalesia.
Fesili – E iai lo‘u fale o loo mautotogi ai le kaseni o lo‘u toalua ma le latou aiga. E lē misi le totogi o le latou rent $300 i le vaiaso, e alu sa‘o i totonu o le ma tusitupe.
Fai mai la‘u uo ma te faigaluega faatasi, sa faila e le isi Initia lana lafoga, na maua lana refund lata i le $3000 i le tausaga ua mavae.
O la‘u uo e lua ona fale, o le fale e nonofo ai ia ma lona aiga, ma le isi fale o loo nofo ai lona uso ma lona toalua ma lana fanau.
E totogi foi le latou $350 i le vaiaso. E faafefea ona maua sa‘u refund e pei o la‘u uo?
Tali – E mafai foi ona maua sau refund pe afai o loo e totogi PAYE poo le Withholding tax. O le fale e faaaogā e apalai ai le refund o le fale lea e mautotogi ai le kaseni o lou toalua ma lona aiga. A faaopoopo le aofai o tupe faaalu mo le fale, ae sili atu i lo tupe maua mai (rental income), ona maua lea o se refund.
Ae a sili atu le tupe maua i lo le tupe faaalu, ona toe totogi lea o le isi lafoga. O itu nei e ono suesue mai e le Ofisa o Lafoga:
• Suafa o loo lesitala i le Council e ona le fale, o i latou ia e mafai ona apalai mo le refund
• E talafeagai le rent ma le maketi e fuafua i le telē o le fale ma le pitonuu o loo iai. (leai ni rent faa-aiga)
• Saini se tenancy agreement, maua le form i le website a le Housing www.dbh.govt.nz pe piki mai soo se Ofisa faatau fale.
• E manaomia pepa o le faatauina mai o le fale, e iloa ai le tau mo le galueina o le depreciation.
• Teu faalelei loan statements e mafai ai ona iloa le aofai o pasene tului. A maualuga le mokesi, e maualuga foi le pasene tului, o le tele foi lea o le refund e maua.
• Aua ne‘i e faaaogāina le fale mo oe (personal use).
• Faaaogā se tusi lisiti e faamaumau ai le tupe maua.
• Faaaogā se pusa seevae e teu uma ai pili o le fale ua uma ona totogi.
• Sue se Tausi Tusi agavaa e mafai ona e faatuatuaina e na te failaina lau lafoga, pe valaau mai le tatou Ofisa.
