Fesili – O matou lea na malaga mai Samoa e faigaluega mo le kamupani a Mr Apple, i le pikiina o le apu. O le matou konekarate na amata ia Fepuari ae faauma ia Me. O le lona lua lenei o tausaga o le matou galuega. Ou te fia malamalama pe aisea e toese ai le lafoga mai lo‘u totogi, a o matou e nofomau i Samoa. O le la foi e tau sue ni tupe mo le atina‘e ma le tamaoaiga o si matou atunuu. E uma foi le fā masina matou toe foi. A o fetaui lenei lafoga e toese mai o matou totogi?
Tali – Soo se tagata faigaluega i totonu o Niu Sila, pe nofomau pe faavaitaimi, e totogi uma le lafoga, se‘i vaganā e iai sau exemption certificate, e faataga ai ona lē totogiina sau lafoga. O le kamupani a Mr Apple e iai le latou feagaiga ma le Ofisa o Leipa e mafai ai ona aumai faapitoa a latou tagata faigaluega mai atunuu o le Pasefika. O se tiute tāua o le kamupani i lalo o lenei feagaiga, o le toese o le lafoga mai totogi o tagata faigaluega. E amata mai i le aso muamua o Aperila 2011, ona pa‘ū le lafoga i le 12.54 sene i le tala. A toese la le ACC e 2.04 sene mai le 12.54 sene, ona maua ai lea o le lafoga lava ia e 10.5 sene.
O le pasene lafoga lea pito i maualalo, a faaaogā e toese ai lau lafoga, ua paleni ma lou totogi, e leai foi se refund e toe maua. Ae tatau ona toe maua mai sau refund mo le tausaga lea na faaiu ia Mati 2010, ma le tausaga faaiu ia Mati 2011, ona sa maualuga le pasene lafoga i le 15 sene i le tala.
Fesili – O le ā ea le tulaga o le a oo i ai kamupani foi ia LAQC? O le tausaga 2006 na faatau ai ma rental properties e lua. Na faatonu le ma loia faapea foi le faletupe, e lesitala uma i le igoa o le ma LAQC. Ae o loo fesoasoani maua i le totogiina o le mokesi, ona e lē o lava le tupe e maua mai i tenants.
Tali – Ole aso 31 o Mati i le tausaga nei, e faamuta ai foi le aogā o nei ituaiga kamupani. O le a tuu mai e le Ofisa o Lafoga le ono masina e fai ai le lua filifiliga, ma apalai atu mo se tasi o filifiliga nei:
• Filifiliga muamua – Faaaogā pea le igoa o le lua kamupani e pei ona lesitalaina ai i le Ofisa o kamupani. Ae faatumu le pepa e faailoa atu ai i le Ofisa o Lafoga, o le a lua see ese mai i le LAQC, ae lua see atu i le LTC poo le “Look through company” e tusa ai ma suiga o le tulafono.
• Filifiliga lua – Faatumu pepa e faailoa atu ai i le Ofisa o Lafoga, o lea o le a sui oulua i le “sole trader” poo se “Partnership”. Tapuni le lua kamupani ma ave ese ma le lesitala a le Ofisa o kamupani. Ave ese rental properties ma nonoga tupe mai le igoa o le kamupani, ae toe lesitala i suafa o i latou o loo totogiina le nonoga tupe, o tagata foi ia e mafai ona apalai pea mo le refund.
(A lua faaaogāina le filifiliga lona lua, e tele isi galuega e toe fai e manaomia ai le loia, faletupe, ma le lua tausi tusi, ma e iai foi le tau o le faatinoina o nei galuega. O le mafuaaga lea o lo‘u lē lagolagoina o lenei laasaga, se‘i vaganā ua lua mautinoa o le laasaga lenei e pito i sili ona talafeagai mo oulua.)
A leai se lua filifiliga e faia, e tumau pea le lua kamupani i luga o le lesitala a le Ofisa o kamupani, ae o le a solofua le LAQC, e lē toe faaaogāina e le Ofisa o Lafoga. E lē mafai foi ona toe faaaogā “tax loss” a le lua kamupani e apalai ai se lua refund.
Poo le ā lava le lua filifiliga e fai, e lē mafai ona toe tapaina le depreciation o se rental property. O le isi suiga fou lea e amata ona faamamalu i le aso muamua o Aperila. O se taimi o le masina nei e taunuu atu ai pepa e faatumu. Se‘i tautuana pepa e faatumu a o lei oo i le aso 30 o Setema. Mo nisi faamatalaga faafesootai mai le tatou Ofisa.
Fesili – O le ā le pasene lafoga a kamupani ma family trust?
Tali – Pasene lafoga a kamupani sa 30% lea ua pa‘ū i le 28%, a o le family trust e tumau lana lafoga i le 33%.
Fesili – Se‘i otooto mai pasene lafoga mo tagata taitoatasi mo le tausaga 1 Aperila 2011 – 31 Mati 2012?
