Fesili – Se‘i toe faamanatu mai le pa‘ū o lafoga mo kamupani a o afea foi e amata mai ai lenei pa‘ū?
Tali – I le taimi nei e 30% le lafoga a kamupani. A uma ona faapaleni api ma sauni lipoti o tupe o le tausaga lea e faauma i le aso 31 o Mati, ae maua se polofiti poo le tupe mamā pe tusa ma le $6,000, o le lafoga e ao ona totogi e $1,800. Faato‘ā amata ona faamamalu le pa‘ū fou o lafoga i le 28%, i le polofiti poo le tupe mamā e maua, pe a mae‘a le tausaga lea e faauma i le aso 31 o Mati 2011.
Fesili – Na matou o ma o‘u uso i le faletupe mo se nonoga tupe e amata ai le matou pisinisi, ae tapa mai le pule o le faletupe i se business plan. E mafai ona e fesoasoani mai?
Tali – I lo‘u manatu ou te faatusaina le business plan i le tusiina o se ata o se fale a o lei fausiaina. E muamua lava ona tusi le ata o le fale ona faato‘ā fauina lea. E faapena foi ona muamua ona tusi se ata o le pisinisi, a o lei amataina. O nisi nei o mea e ao ina mafaufau loloto i ai ma tusitusi i lalo:
• Faamatalaga ma le mafuaaga ua e filifilia ai lenei ituaiga pisinisi.
• E iai sou poto masani i lenei matata e mafai ona faaaogā.
E manaomia se au faigaluega.
• O iai se avanoa i lenei maketi mo oe.
• O ai au customers e faatau i ai, pe latou te faaaogāina lau pisinisi.
• O ā ou moomooga poo lou faamoemoe e fia ausia.
• Tauvaga ma isi pisinisi.
• O fea e sau ai le seleni, poo auala e faatupe ai le pisinisi.
Sauni se pakesi poo se forecast o tupe alu ma tupe o le a maua, e aofia ai ma le totogiina o le nonoga tupe, ae fia foi le umi e totogi ai. Talatalanoa i isi au faipisinisi mo ni fautuaga aemaise lou auaiga e lagolago mai ia te oe.
Tele le fesoasoani e te maua, pe a e asiasi i le website a le NZ Trade & Enterprise:
www.business.govt.nz/starting-up, pe faafesootai mai foi le tatou ofisa.
Fesili – E manaomia e a‘u se Accountant ma se Loia mo le faatuina o la‘u pisinisi?
Tali – Tele o pisinisi o loo solosolo manuia, e iai a latou Accountant agavaa ua uma ona toleni i le itu tau lafoga, aemaise le faamaumauina o aluga i le itu tau tupe o le pisinisi. E mafai foi e oe ona faila au lafoga pe a e agavaa, ma iai sou taimi e faatino ai nei galuega, ae faaaogā le Accountant e te fesili i ai mo se fautuaga. Sue se Accountant o loo galue mo isi pisinisi laiti e pei o lau pisinisi.
A iai se lisi e saini poo ni konekarate tusitusia, muamua lava ona faafesootai se loia, ma fesili i ai mo sana foi fautuaga mo oe ma le kamupani.
Fesili – E iai ni tupe a le malo e fesoasoani mo le amataina o se pisinisi?
Tali – Tele lava o pisinisi e apalai i le faletupe mo se nonoga tupe. Ou te leiloa pe iai ni grants a le malo, ae a iai foi e faapito lava mo pisinisi e ono faalelei atili ai le tamaoaiga o le atunuu.
Fesili – E manaomia se resource consent a o lei amata lau pisinisi
Tali – Se‘i vaganā e te fuafua e faatu pe faatamoe mai lau pisinisi i se nofoaga e lē fetaui ma le tulafono Resource Management Act, ona tatau lea ona suesue muamua i le Council mo lena tulaga. Mo se faataitaiga, a fia faatu se pisinisi fufulu taavale mai luma o lou fale, e ono atugalu ai ou tuaoi. Ou te iloa foi e faasā ona faatu se fale kalapu i le ogatotonu o se nuu. E tatau lava ona muamua fesili i le Council mo lena tulaga, pe faafesootai se loia mo se fesoasoani.
Fesili – O ā ni itu lelei pe a ou faatauina se pisinisi o le la e ola ma solosolo lelei?
Tali – O itu lelei nei:
• E lē tau alu lou taimi e faatu se pisinisi fou.
• Lena ua iai lau customer base.
• Ua iloa foi au suppliers.
• E lē tau sueina se nofoaga poo se isi ofisa.
• Lena ua iai le aufaigaluega ma le poto masani.
• O se pisinisi ua lauiloa, e lē tele se tupe alu e tau faailoa atu ai.
