Fesili – O le ā le mafuaaga e ala ai ona eseese tausaga e lipoti ai tala o tupe a ekalesia? O isi ekalesia e amata ia Iulai ae faauma ia Iuni o le tausaga e sosoo ai. A o isi foi ekalesia e tausaga faatasi ma le malo e amata ia Aperila ae faaiu foi ia Mati o le isi tausaga?
Tali – Afai o se ekalesia o loo faamalumalu i lalo o se faalapotopotoga tele, ua tatau ona iai se faavae poo ni tulafono e mulimuli ai. O totonu o lenei faavae, e masani ona faataoto mai ai le taimi e fai ai fono faaletausaga, o inā foi la e faatonu mai ai le tausaga e tatau ona faaaogā e nei ekalesia uma e lipotia ai a latou tala o tupe. Ae afai o se ekalesia fou e leai sona faamalumaluga, e tutoatasi lava ia, e fou foi lana faavae, e masani ona faaaogā le tausaga e atoa i ai le sefululua masina talu mai ona amata pe faatu le lotu.
Fesili – O afea e faagata ai ona apalai mo le suiga fou o kamupani mai le LAQC i le LTC?
Tali – Aso 30 o Setema 2011, pe a e manao e amata lelei mai le LTC i le amataga o lenei tausaga lafoga, mai le aso muamua o Aperila 2011.
A misi le aso 30 o Setema, faato‘ā mafai ona faamamalu lau LTC ia Aperila o le tausaga fou. Lona uiga afai e iai ni “tax loss” a le kamupani mo le tausaga lafoga lea e faauma ia Mati 2012, e lē mafai ona faaaogā e shareholders o le kamupani e faalaitiiti ai o latou totogi, ma ia mafai ai ona maua se refund.
Fesili – O le ā le igoa ma le numera o le pepa e faatumu ma saini, o ai foi e mafai ona sainia, ona faafoi lea i le Ofisa o Lafoga e mafai ai ona maua le suiga o le matou LAQC lea e fia sui i le LTC?
Tali – O le igoa o le pepa o le “Look through company election”, a o le numera o le pepa o le IR862.
E mafai ona faatumu e le Faatonu Sili o le kamupani poo lē e tausia tusi a le kamupani.
E tusi ai le suafa o le Faatonu Sili ma lana numera lafoga, faapena ma suafa uma o i latou e iai a latou siea i le kamupani ma a latou foi numera lafoga. Ona saini lea e i latou uma o loo tusia o latou suafa i luga o le pepa.
Fesili – E mafai e se kamupani e lē o se LAQC ona apalai mo le LTC?
Tali – Na o kamupani fou faato‘ā faavae e lei failaina ni a latou lafoga muamua, e mafai ona apalai. Lona uiga soo se kamupani fou na faavae i le va o Aperila seia oo mai i lenei taimi, auā soo se kamupani fou na faatu a o lei oo i le aso 31 o Mati 2011, ua tatau ona uma ona faila lana lafoga se‘i vaganā e iai se tax agent. O kamupani fou uma nei e lē o ni LAQC ae mafai ona apalai, e faagata le taliaina o a latou talosaga i le aso 31 Mati 2012.
Fesili – O lea e fia sii le matou ofisa i se isi nofoaga lapoa atu i lo le matou nofoaga i le taimi nei, ua fai si pumoomoo a ua ola foi le kamupani ia. E manomia se ofisa fou e ofi uma ai le aufaigaluega aemaise ia lava le avanoa mo a matou malo ma le ‘au faatau, ia lava foi nofoaga e paka ai taavale. E iai la le ofisa fou ua uma ona matou siakiina, ae o le faalavelave o lea ua tapa mai le pule o lenei fale e fia vaai i lipoti o tupe a le matou kamupani, faato‘ā mafai lea ona fai se matou lisi. O le ā tonu lava le mafuaaga e fia vaai ai le vaega lea i le lipoti o tupe a le matou kamupani?
Tali – Ou te talitonu o se lisi e lē taugofie lona totogi. O le tulaga muamua e manao ai lenei vaega e ona le fale, e fia faamaonia pe tou te gafatia le totogiina o le lisi. Pe mafai foi ona faatuatuaina le tou vaega e totogi le lisi i le taimi e tatau ona totogi ai, ma faatino uma isi tou tiute e pei ona tusitusia i lalo o se tou feagaiga, pe a oo i le taimi e saini ai se feagaiga.
Fesili – Ua maua le matou tusi mai le Ofisa o Lafoga, e uiga i le GST a le matou aoga faataitai ua ova atu i le $20,000 ua aitalafu ai matou. E iai sau fesoasoani?
Tali – Muamua lava ona faafesootai le Ofisa, talosaga i ai e tuu mai se avanoa e togitogi atu ai le tou aitalafu. Sauni faalelei se tou pakesi ia mautinoa lelei e outou, o le ā se aofaiga o se tupe e malie mai le Ofisa e togitogi atu, e mafai ona tou tausisi i ai aua ne‘i misi. O le tulaga tāua i le Ofisa o le vaai mai o lena tou te taumafai e totogi le aitalafu. E iai aoga faataitai ua ou iloa ona o le faamaoni e togitogi le latou aitalafu, na talia e le Ofisa le latou talosaga e faamagalo se isi vaega o le aitalafu. E iai foi isi aoga ua muamua talosaga e faamagalo le aitalafu, na teena e le Ofisa, e lei taliaina foi se talosaga ona o le lē faamaoni.
