O le alofa moni e vaai mamao, ma e lē vaai i le tagata, ae silasila i le Atua ma lana galuega. E tāua le mea moni, ae lē o le mea lelei
Ua mae‘a le feiloaiga a le komiti o le matagluega a Niu Sila ma le aulotu a le toeaina ia Samani Pulepule, e pei ona sa faatalia ai se tali o le mataupu i le va o le ekalesia ma lo latou Faifeau.
O se feiloaiga sa lē mautonu, ma ua faailoga fesili i nisi o le aulotu poo fea tonu le sa‘o ma le moni, a o fea tonu foi o agai i ai le faamoemoe ma le galuega a le Atua i lea foi itu o le Tovine.
O le fenumiai o finagalo, ona o le femoumouai ma le faalotolotolua o nisi, ma ua lē mafai ai ona tautino le mea moni o manatu i ai, ma saili ai se tali o le manaoga o loo iai.
E tusa ai ma lipoti a nisi o sui o le ekalesia sa faamatalaina i le Samoa Times, na ta‘ua ai e faapea, na muai fofola e le komiti ma toe faamanino le mafuaaga o lo latou teena o le mataupu e pei ona saunoa i ai Onesemo Pulepule, e ala lea i le faasee ese pe mālōlō foi Samani Pulepule mai lona tofiga Faifeau, a o se faafeagaiga taulagi foi o le aulotu mai le silia ma le 40 tausaga talu ai.
O felafolafoaiga a le komiti ma sui o le aulotu e pei ona ta‘ua, sa faaali manino ai e nisi le tulaga talia lelei, ma le faatumauina o le mau a Onesemo e pei ona sa talanoa ai muamua.
Peitai na faateia nisi ina ua tulai foi isi toeaina o le aulotu, ma sa‘i i le ekalesia, ma toe ta‘ua ai lo latou teena o le finagalo o Onesemo ma le gaioiga sa fofogaina.
O se tasi o finagalo, sa oo lava ina faaseā i tagata lotu, ona o le oo i le nusipepa o le mataupu, ma sa ta‘ua ai e lē tatau ona ave i le nusipepa mataupu faapea.
Sa ta‘ua foi e le molimau faamoemoeina, sa maitauina i lea po i le fonotaga lava lea, le vave tele ona toe suia o finagalo o nisi, ma piipii loa i le mau a le komiti, ae ua faatuatuanai le ioe, ma galo isi foi saunoaga sa saunoa i ai a o faafesagai ma Onesemo.
O le taunuuga o le fonotaga i le afiafi o le Aso Lulu, aso 11 o Me, ua toe taoto ai le mataupu i le faataotoga sa faia e Onesemo.
O le tauaveina lea e sui e toatolu sa tofia, o galuega ma tiute o le faifeau, seia toe maua se malosi o le toeaina. Na pau lona eseesega, ua lē sailia nei se faifeau a ua toe faatumauina pea le toeaina mo le taitai o le galuega, e ui ina o loo tauivi pea ma mafatiaga o le tino.
Ae o se vaaiga lautele i nisi o finagalo o le aulotu ina ua feiloai atu i ai le Samoa Times ma fesiligia, poo fea tonu lava le moni ma le faasinomaga a le Atua i o latou finagalo, e aunoa ma le limataitaina i finagalo o le au matutua.
E toatele sa fulisia lava i le tatau lea ona faia se suiga, ma o lea suiga ua alagatatau ai ona tuu se avanoa se‘i mālōlō ai le toeaina, ona ua matuā gasegase lava. Atonu o se taimi tāua foi lea i lona soifua, se‘i mālōlō ai ma talosia le aao laveai o le Tamā e toe faafoisia ai lona malosi.
O le ala foi lea latou te lagolagoina ai pea le finagalo ma le manatu sa faaalia e le susuga i le faifeau ia Onesemo. A silasila foi i se tasi itu, o loo tele se puipuiga ma le alofa o Onesemo i lona tamā, ona ua lē toe gafatia se isi lava galuega i le taimi nei, o tulaga uma ia sa tatau foi ona toe vaai toto‘a i ai le aumatutua o le aulotu, aemaise le komiti a Niu Sila.
E foliga mai e ui ina ua toe faamoe le toa mo lenei taimi i lea mataupu, peitai o nisi o loo ua faatumauina pea le lē toafimalie ma le tiga ona o le faatosotoso ma le fesuisuiai o finagalo o le aumatutua ma le aufaitonu a le aulotu.
Ua lua tausaga talu ona lē toe faataunuuina e le toeaina ia Samani ona tiute masani i totonu o le ekalesia lava ia i Aukilani. E oo lava foi i lana pulelaa ma le folafolaina, ma le a‘oa‘oina o le afioga a le Atua, e lei mafai ona toe tulai ai le toeaina.
O taimi foi ia sa vaaia ai suiga tetele i lona soifua maloloina, ma o se taimi faigata tele mo ia, ona e lē gata i le matua o lona soifua i le tino, a o le fetuleni i ai o gasegase. I le ma lea, o le taimi tonu foi lea, sa vesia ai le lotoifale ma feagai ai le ekalesia aoao i Niu Sila, ma faamasinoga tetele sa faia.
Ae peitai e ui lava i le mau faafitauli o le galuega ma gasegase o le tino, ae sa maua pea lona lototele ma le tauivi, aemaise o le malosi o le soifua faatuatua i le Atua, sa ia faamalosi ai pea mo nisi o vaega o lona valaauina.
O le tausaga na tea nei ma le tausaga nei, ua toe faaopoopo pea nisi o vaaiga i suiga o lona soifua, e lē gata i le matua ua oo i ai, ua latalata i le 90 tausaga, ae o loo faaauau pea uiga tuga o gasegase, ma ua lē mafai ai ona toe gagana, pe saunoa foi i se faamatalaga.
Sa faamaonia mai foi e Onesemo lea tulaga, sa ia ta‘ua ai o le toeaina o loo malosi lona tino ma le loto, peitai o lona mafaufau ua vaivai, ma o le ala foi lea o le faafitauli ua feagai nei, ma ua lē mafai ai ona tautala mai mo fesootaiga masani.
O le popolega tele lea o le toatele o le aulotu, aemaise foi o le vaai atu i fafo ma le lautele o auauna a le Atua.
E lē gata i totonu o le lio a le Ekalesia Faapotopotoga a le Atua lava ia, ae faapea foi isi uso a auauna kerisiano sa amata ma fofoa mai e Samani o latou soifuaga faaleagaga.
O nisi o fesili e tele ua faataoto nei, ma ua nofofale i finagalo o le toatele, Pe o le ā le umi, o le a faasolosolo ai pea le aufaigaluega i a‘oa‘o ma failauga o le aulotu, i le faataunuuina o tiute ma faiva masani o le taitai o le galuega, aemaise lava o le itu i le laugaina o le finagalo ma le Upu a Atua.
O le ā foi le umi o le a faagaioi ai pea le ekalesia, ma tauave le galuega e aunoa ma se finagalo faataitai o le galuega, ina ua lē gagana lana auauna.
E faapefea ona gaioi le tino o le galuega i ona itutino uma pe afai ua taofia ma lē tautala mai lē sa valaauina e taitai, ma fesootai ma le Atua i mea uma o lana galuega?
E toatele nisi ua fefefe ma atugalu i suiga fou o loo ua iai le lalolagi, ma o loo agai mai pea. Peitai e ao ina silasila ma maitauina le gasologa o le soifuaga, e lē o agai tua, a o mea uma o loo agai pea i luma. E ao ina silafia o le tele o suiga o mea, o le amataga lea o isi mea fou o le finagalo faaali mai o le Atua.
E lē mafai foi ona soifua pea i mea tuai o le soifuaga, ma taufaaofiofi mea tuai o le olaga i suiga fou ua iai nei.
E ao ina faafou ma sui agai i suiga fou, mo le malosi atoatoa ina ia faatumauina pea le lelei ma le atoatoa.
O le saunoaga tuusa‘o a Iesu sa ia fetalai ai e faapea: “E lē utufia foi le uaina fou i fagu pau tuai, a faapea, ona papa ai lea o fagu pau, ona masaa lea o le uaina, e maumau foi fagu pau fou, ona faatau saogalemu ai lea.”