Select Page

O le vaiaso lenei ua faatulaga ai le mataupu o loo talosaga ai le loia o loo tulai mo Malele Paulo poo King Faipopo ma Lema’i Sione, i le faamasinoga, mo le tatalaina i tua mai i le falepuipui i Tanumalala, lea ua silia i le ono masina o taofia pea ona o moliaga o le taupulepulega e faaoo le maliu i le taitai o le atunuu le Susuga Tuilaepa Lupesoliai Sailele Malielegaoi.
O le vaiaso foi lenei i le Aso Lua, 11 Fepuari 2020, lea ua toe tolopo i ai le mataupu a Taualai Tuilaepa Leiloa o Laulii, ina ua toe manao e toe sui lana tali tetee i le ioe, pei ona ioe ai i le amataga i le moliaga lava e tasi.
Ae o fafo mai i le faamasinoga ma luga o upega tafailagi, ua amata ona faailoa mai e le toalua o Paulo Malele, le tamaitai o Lole Malele, nisi o vala ma tuua’iga i le mea na tupu, e aofia ai lona le fiafia i le tamaitai loia o loo tulai mo lona toalua ma le alii na tauva i le faigapalota laitiiti a le itumalo Faasaleleaga numera lua.
I le video a lea tamaitai na ia faaalia ai nisi o tuua’iga, e aofia ai le faalafi o Tala Pauga, le isi alii o loo tuua’ia i le taupulepulega. Pei ona toe tomanatu, o Tala Pauga, le alii lea na ia taumafai e osofai le alii Palemia, ina ua malaga atu e saunoa i le saunoaga autu o le tatalaina o le faaopoopoga o le tautua a le Samoa Airways i Brisbane Ausetalia.
O tuua’iga foi a Lole Malele o loo ia momoli mai ai o la manatu tuufaatasi ma le toalua o Lema’i Sione, le tamaitai ia Letiana Sione, lea e loka faatasi lona toalua ma King Faipopo ona o moliaga lava e tasi.
E tele nisi mau tuua’iga ua faia faasaga i le tamaitai loia, ae lē mafai ona faailoaina ona e lei maua mai se faamatalaga aloaia mai i le tamaitai loia, o loo mamafa agai i ai tuua’iga a lea mafine.
Peitai e uma ane le ata video a Lole, o loo lalau mai ai le mau gasu, ae mapuna ane i luga le ata video a le Susuga Taualai Tuilaepa Leiloa, lea o loo ia valaaulia ai le mamalu o le atunuu, ina ia auai atu i lona faamasinoga taeao, lea o le ia fai ai sana faamatalaga pe a tuu atu le avanoa ia te ia.
O loo tuua’ia e Taualai, e tele isi vala e lē o iloa e le atunuu, atoa ai ma taitoalua o Lema’i, ma Malele Paulo i le taupulepulega na faia, ma o le a nofo sauni e faamatala uma mea nei pe a toe maua lona avanoa i le faamasinoga.
O le vaiaso talu ai, na atagia ai i le faamasinoga, tuua’iga faasaga i le afioaga o Laulii, e faapea ua o latou faamata’u ia Taualai, ina ia faatumauina pea lana tali ile faamasinoga e pei ona ia ioe i ai i le amataga. Na fautuaina ai e le faamasino le pulega a alii ma faipule o Laulii na auai i le faamasinoga, ina ia aua nei tutupu tuua’iga, ma e tele foi lona talitonuga e le tatau ona tutupu.
Na saunoa foi le faamasino, e faatāua e le faamasinoga le aiātatau a soo se tagata soifua.
O Taualai Tuilaepa o loo tatala pea i tua, o Lema’i Sione ma Paulo Malele poo King Faipopo, o loo loka pea i le toese, ae o le isi lea o loo masalomia o Tala Pauga, na toe malaga i fafo ina ua maea lona faamasinoga.
O le faamatalaga manino a le Komesina o leoleo, o le a uia e leoleo auala e saili ai le tagata e faia ni uiga e faamata’u ai le soifua o le taitai o le atunuu. Na faamaonia mai ai foi e le Komesina ua faatino e leoleo le auala faatasi ai ma le fesoasoani a nisi o matagaluega a le malo, e aumai ai le tagata lea o loo latou sailia e molia i Samoa. E ui ina e lei faailoa mai e le Komesina o leoleo le suafa o le tagata, ui ina faailoa e Taualai i leoleo, lea na tolaulau i le faamasinoga ina ua uluai valaau le mataupu a Taualai.