Ua avea le faatinoina o le tiute o leoleo i le faamalosia o aiaiga o le tulafono tau soligatulafono e faamalosia i le malosiaga o le tiute o leoleo le Police Offences Act 1961, ma faatupu lē fiafia i le aufaipisinisi laiti o loo faaaogāina nisi o polotito o fale tetele i le taulaga ma luma o faleoloa, aemaise foi o le aufaipisinisi laiti o loo faatau savali a latou oloa e pei o taumafa e aofia ai keke puaa.
O le tutuli ese e leoleo o i latou mai luma o polotito ma taofia le au faatauoloa savali seiloga ua totogi le $50 tala i leoleo mo se pemita faataga, faapea ona totogi le luaselau tala ma ona tupu i le ofisa o le Matagalugea o Tupe Maua mo se laisene pisinisi, ua atili mapuna a‘e ai lagona lē fiafia.
O le fesiligia e tusitala o le Palemia i lana polokalame masani ta‘i vaiaso i luga o leitio ma televise, na faaalia ai e le susuga Tuilaepa Lupesoliai Sailele Malielegaoi, lona lagona faanoanoa i le alofa i le aufaipisinisi laiti.
Na saunoa le Palemia ma ia ta‘ua ai le tele o isi tiute tāua o leoleo, ae o le o tutuli nei tagata faipisinisi o se gaioiga lē alofa.
Faaalia e Tuilaepa o ia pisinisi laiti o loo maua ai ni seleni e fesoasoani i aiga o i latou o loo faafoeina, ma o lana saunoaga ailoga lava e fia ni tupe o maua ai, ae ua oo lava le malosi o le tiute o leoleo i le tulituli o nei tagata ae o loo iai isi tiute e sili ona tāua e tatau ona agai e faatino. Na ta‘ua ai foi e le Palemia e iai taimi e tuuvili atu tagata i leoleo i le latou tiute e agai atu mo se fesoasoani i ni faaletonu e tutupu ma aliali mai, ae fiu e tatali e leai nisi e agai atu.
“O le mea lena ae o lea ua agai ane tutuli nai nei tagata o loo sue foi ni seleni e ola ai”.
O nai vaiaso e lei mamao atu na faataalise atu ai le tiute a leoleo ma tutuli ese le aufaipisinisi laiti mai luma o faleoloa ma fale tetele o loo latou faaaogāina e faatau ai a latou oloa, e aofia ai ma le aufaatau oloa savali e lē gata o taumafa eseese ae o oloa mai fafo.
O le finagalo o le sooupu o le Matagaluega o Leoleo ma Falepuipui le afioga Leaupepe Fatu Pula, o loo manino le tulafono i aiaiga e faasino i tagata e faatau savali oloa, ma tagata e faatau solo i luma o faleoloa a latou oloa.
O le isi finagalo o le sui sooupu na ia faaalia ai, ua fai ma faalavelave nei tagata i le sologa lelei o le feoaiga a le atunuu ia latou feau tāua, ma o lana faamalamalamaga e lē faatagaina i le tulafono ona faatau savali oloa mai fafo e pei o apa inu ma isi ituaiga o oloa.
I le finagalo o le Palemia i le mataupu lenei na ia faaalia ai, masalo o iai se faipisinisi o loo i tua o le gaioiga a leoleo ua fetulinai solo ai le aufaipisinisi laiti i totonu o le taulaga.
