O le alii o Ryan Simpson ma le tamaitai o Lyla Tapusoa, o ni tamaiti aoga mai le aoga tumaoti o le Vaiala Beach school i Samoa, na manumalo i le tauvaga tusigatala sa faatautaia e le ofisa o le Hai Komisi o Peretania (British High Commission).
O le faamoemoe e maua ai le avanoa o ia alo laiti o le atunuu e maimoaina se vaega o le taamilosaga o le Supa 14 ua amatalia, ae faapitoa lava lea i taaloga a le au o le Hurricanes.
I se pepa o faamatalaga mai le ofisa o le Hai Komisi o Peretania ua faalauiloa mai ai le manumalo o ia fanau a Samoa, ua faailoa mai ai e le gata ina auai i laua i se tasi o taaloga lakapi o le Supa 14, ae o le a auai foi i se taaloga soka, faapea le faamaimoaina i le nofoaga o faaaliga o natura tau le siosiomaga.
O Lyla ua 10 ona tausaga, ma Ryan e 11 tausaga. O le aso ananafi, na maua ai e nei fanau laiti se avanoa e talatalanoa atu ai i tama o le Hurricanes, a o faia a latou toleniga i Newtown. O se tasi lenei o mea o le a lē mafai ona galo i le gasologa o olaga o nei fanau, ina ua mafai ona lūlūaao ma fesuiai a latou tusitusiga ma tama taaalo o le Hurricanes.
E 4 aso o le a maimoa ai ia alo e toalua o Samoa i ia vaega a o lei toe taliu i le atunuu.
O se avanoa taua tele aua o le a mafai ona saga faalautele ai le mafaufau aoaoina o ia fanau e toalua e le gata i le itu i taaloga ae o le poto aoaoina i natura o le siosiomaga.
I lenei tauvaga tusigatala, sa tusi ai e le alii o Ryan lana tala i se taaloga lakapi sa taalo ai mo le ‘au a Peretania a o taaalo ma le ‘au mai Argentina i se tasi o taamilosaga o le Ipu a le Lalolagi. Mo le tamaitai o Lyla, sa tusi lana tala i le taimi na la taaalo ai i se tasi o taamilosaga tenisi ma le tamaitai o Maria Sharapova i le taamilosaga tenisi o Wimbledon.
