Feiloai ma loimata i si ana tama

“Ona pau le mea ua ou fiafia ai o le mafai ona ou toe tagotago atu i si au tama, mafai ona toe sii ma pai atu i ai, ua lava lava le vaiaso lea ua toe sau ai mo au a o lea ua ou vaai atu i ai ma ua ou vaai foi i le alofa o le aiga ua tausia si au tama”.
O fasaga ia a le tina o Mele Sooalo o Tufulele ina ua fai ifo feiloaiga, fiafia ma le taumafataga na saunia e lo latou aiga, nuu ma le Ekalesia Metotisi i Tufulele lava, aua le faataliga o le taunuu manuia mai i fanua o le tamaitai o Jayden Soya, le uii o le fanau a Mele ma Upega Sooalo o Tufulele na vaetama i Amerika i le faatoa atoa ai o le fa o ona tausaga.
Ua foi mai ona o tuutuuga o se faaiuga o le Faamasinoga i Utah i Amerika ona o se sese i le faatinoga o nei vaega tama.
Poo le a lava le faafitauli, na taua e Mele e leai lava se isi mea ua sili atu nai i lo le mafai ona toe feiloai isi ana tama e leai se manatu a toe vaai atu i ai.
“Ua fai e le Atua le auala e mafai ai ona toe vaai atu isi au tama,” o sana faamatalaga lea.
O le tea laititi lava o le 5 i le taeao o le Aso Lulu, (Aso Tofi, taimi Niu Sila) na tulaueleele ai le faigamalaga a le Air Niu Sila, na malaga mai ai lenei teineititi ma lona tina ua vaetamaina o ia, o Patty Soya ma lona tuagane ma le uso atoa ai ma nisi o pueata ma fai polokalame televise mai i Amerika na pueina lenei mataupu i le tausaga ua mavae seia oo lava i le faigamalaga lenei i le maea ai o le faamasinoga.
E taunuu mai i le malaevaalele i Faleolo ua leva ona miomio solo sui o le aiga o lea teineititi mai Tufulele, o ona matua, o ona uso ma tuagane aemaise le toatele o le aiga potopoto ma le afioaga o Tufulele. 
Na faapea foi ona tumutumu ai ma tusitala ma pueata i le fia molimauina lava o lenei feiloaiga.
O le Faalapotopotoga o le Toomaga mo Tagata Puapuagatia lea na faatautaia atoa le sauniga lea mai Amerika seia oo i le agai mai o lenei aiga e momoli mai le latou teineititi i le aiga na vaetama atu o ia i Amerika.
O fiafia na faatautaia e uso ma tuagane o lenei teineititi i Samoa na amata ai fiafia o lea aso, ma le feiloaiga na umi se taimi o faatautaia i le malae vaalele a o lei see atu le faigamalaga i le afioaga o Jayden o Tufulele.
O se sauniga lotu na amata ai lea vaega o feiloaiga sosoo ai lea ma le feiloai atu o Jayden ma lona aiga mai i Amerika i le isi toatele o le aiga ma le afioaga o Tufulele.
Na vave ona toe vaaia le pipii o le teineititi i lona aiga i Samoa ma o le tele lava o le taimi na vaaia ai le sii i lona tina o Mele.
O foliga vaaia o le tina o Mele na manino ai le ootia ma na ia taua lona fiafia ae na vaaia lava e tau le ata, e iai foi le taimi o le feiloaiga i lo latou fale na maua lelei lava le nofonofo ma punou i le taimi atoa i le pa maa o loo i luma.
O le teineititi foi o Jayden, o ona foliga ataata ma le tau autilo solo i taimi o siva ma taimi o felafolafoaiga a lona tina mai i Amerika, na faaliliu e Lina Chang o le Toomaga mo Tagata Puapuagatia.
Ae na tuu atu loa le avanoa e fai ai sana tala, e lei lagona atu lana tau memumemu ae na vave ona vaaia le tagi ma tapa i lona tina palagi lea na vave ona tago ane ma opo le teineititi.  Na manino le le faigofie o ia ituaiga feiloaiga ma ua vaaia ai le tele o le aafiaga o i latou uma ua aofia ai i lenei mataupu.
O le fa o tausaga o Jayden lea na vaetama ai i lalo o le polokalame lea ua taua o le Focus on Children – o se ofisa i Utah na taua i le vaitau faatoa aliae mai ai le mataupu, ua o latou saili aiga o loo faaletonu le faasoa pe ono talia le ave o nisi o a latou fanau e vaetama i aiga Amerika o loo mananao i ni tamaiti.
Faaalia e nisi o matua na tapa i ia tausaga ua tuanai na oo atu nisi mai i Samoa nei ma ni sui papalagi o le FOC e pei ona iloa ai lea ofisa ma feutagai le vaetamaina o le fanau.
O nisi matua ua fapea mai na tau atu lava o le atoa o le 18 o tausaga o le fanau e mafai ai ona toe foi mai i aiga i Samoa nei.
O se vaega lenei o lea tuutuuga o loo finauina pea e i latou i Samoa nei na fesoasoani i le vaetamaina o fanau ona o le mau lava ia a le FOC na tau ma faamalamalama i matua i Samoa nei o le 18 le matua o le tamaititi Amerika e mafai ai ona tutoatasi e aunoa ma le tau pulea e matua ma o le taimi lea e mafai ai ona filifili le tamaititi poo le teineititi pe toe foi mai pe leai foi.
Na faaalia e le tina o Jayden mai i Amerika o Patty e ui i le faigata o lenei mataupu, ae na mautinoa le suiga o lona aiga ina ua vaetama atu Jayden ma o se suiga lea na ia taua ua faamanuiaina ai lo latou aiga. 
Faaalia e lenei tina atonu o le finagalo lea o le Atua, ina ia vaetama atu lenei teineititi aua le faaleleia o lana aoga i Amerika ma atonu a manuia ua mafai ona toe foi mai i Samoa aua le fesoasoani ai i ona matua ma nai ona tei.
O fiafia na faaiu ai le aso o le feiloaiga ma o i foi na toe vaaia ai le teineititi lenei, e ui i le lolofi atu o lona aiga i le taimi na saasaa ai, na toe saili lava i le tina palagi ina ua le mautonu i ana taga e fai.
O le vaiaso lenei e toe foi ai le aiga i Amerika ma ua iai le manaoga o Patti Soya o le a fai ma asiasi mai lana tama i ona matua i Samoa i taimi o aso malolo o aoga ae o se feiloaiga lenei na ia faaalia ua le na o Jayden ua faamanuiaina ai ae e oo ia te ia ma lana fanau moni, o le avanoa lenei ua maua ai se isi aiga fou ua fesootai mai i ai ma atonu lava o se faiga lenei a le Atua ina ia faasoa ai le isi aiga i le isi.
“E le taitai mafai ona o tatou faapea ua lava lea alofa ua ave i le tamaititi e toatasi, afai o le finagalo o le Atua ia alolofa uma le lalolagi ia Jayden, ia ai lava o le tulaga lea,” o le faaaliga lea a le tina o Patty Soya.