O le Aso Lulu 20 Fepuari na feiloai ai le mafutaga a le Walking Samoans i Clendon ma le taitaifono o le Local Board a Manurewa le faletua ia Angela Dalton pei ona valaaulia faapitoa ai e le Walking Samoans i Clendon le komiti o le Local Board a Manurewa ina faatasi mai e latou te tauaaoina jackets savali a le Walking Samoans a Clendon pei ona agalelei mai ai le Local Board ma talia le talosaga a le Walking Samoans a Clendon pei ona talosagaina e Teleiai ma Sooalo, i le faasologa o a la talosaga mo ni jackets savali a ausavali taitasi.
Pei ona silafia, o le tausaga ua tuanai na talosagaina ai e Teleiai ma Sooalo ni jackets savali a le Walking Samoans i Tamaki, lea na talileleia mai e le Local Board a Maungakiekie/Tamaki ma tauaaoina ai foi lea faaaloalo ma taulimaina e le Tamaki Walking Samoans, a’o taitaifono ai le tamaitai Samoa o Josephine Bartley ae le i see atu i le tulaga councillor.
O le ausavali na sosoo le faiga o le latou talosaga, o le Walking Samoans i Mangere Bridge, pei ona agai i pulega a le Local Board a Mangere/Otahuhu, i le afioga i le taitaifono, le tofa Lemauga Lydia Sosene, lea foi na manuia le talosaga ma ua taulimaina e Mangere Bridge Walking Samoans la latou foi toniga.
O se tasi foi o alo o Samoa le faletua ia Lotu Fuli o le taitaifono o le Local Board a Otara/Papatoetoe, na agai foi iai le talosaga a Teleiai & Sooalo i ni jackets a Otara lea foi ua laei foi Otara ia.
Ae o le Aso Lulu la 20 Fepuari, lea na tufaina ai jackets savavali a le Walking Samoans a Clendon, lea na tauaaoina aloaia e le taitaifono le faletua ia Angela Dalton, faapea le tamaitai Samoa o Sarah Colcord o se tasi o sui o le Local Board a Manurewa.
Na mamalu foi lea sauniga ona o le faatasi mai ai foi ma le susuga i le alii Councillor o Manurewa, Cr. Daniel Newman.
O le susuga lava foi i le taitai, le tofa a Tevaga Silino na saunoa e faafeiloai le aumalaga i le Taitaifono ma le Councillor tainane sui o le Local Board na auai… ona sosoo ai lea ma le sauniga lotu taitaia e le sui taitai o le ausavali, le afioga a Toleafoa Esekia, ona sosoo ai loa lea ma le saunoaga a le tamaitai taitaifono ma tauaao ina atu ai loa ma jackets i taitai o le mafutaga, e le gata o le taitai o loo seei i le nofoa, tofa ia Tevaga ma lona auvaa, ae faapea foi ona faatauaina le tautua ma le taitaiga a le tama matua ia Tutagailevao o le sa seei mai i le nofoa o le taitai i le na tausaga ma lana laulau o i latou na iai i le taimi na talosagaina ai ni jackets. Na saunoa foi le susuga i le councillor Daniel Newman e le gata o le faafetai ma le faamalo i le Walking Samoans a Clendon, ae na ia faafetaia foi le galuega a Angela ma le Local Board i Manurewa aua o le vaega tonu lea na patino i ai talosaga o jackets lea ua tauaaoina.
E tele nisi mataupu faalotoifale na oo iai fetalaiga ma saunoaga o le aso, aemaise ai o le le mapu o le tuitui a faatonu o le Walking Samoans (Teleiai & Sooalo) i le Local Board i nisi faamanuiaga e ono maua e le mafutaga a le Walking Samoans i Clendon, tainane nisi o ausavali i totonu lava o Manurewa. Aua pei ona silafia, o le savali a le leitio a Tavai ma lana vaega, e pa’u i totonu o le Local Board a Manurewa, o le savali i Manurewa a le Susuga i le faafeagaiga ia Amosa Kenna, o le savali i le Botanical Garden a Lili’a, Tolu ma le au widows, faapea ai ma le savali fou a le faletua ia Ane i le Life Church, e i totonu uma o le li’o a le Local Board a Manurewa.
Ma o le ala lea o le tuitui pea o faatonu ia Teleiai ma Sooalo ina ia to ni manu mo a tatou au savavali uma i Manurewa.
O le itu sili ma taua o lea ua amata mea Clendon ma o lea ua tatala ai le faitotoa o fesootaiga a le Walking Samoans ma le Local Board a Manurewa.
E na’o le agaga o le faafetai na tumu ai lagona o le feiloaiga, auā e leai ma se sene a le Walking Samoans i Clendon na alu i le lenei togiga, o le tulaga foi lea o loo agai iai tapenaga a faatonu ia Teleiai & Sooalo, ina ia faasopolia uma ausavali i lea faamanuiaga.
O le a agai foi le faasologa i Papakura ma West Auckland, ae lē faagaloina foi le Walking Samoans i North Shore, e fia ave foi se talosaga i le latou Local Board auā e tutusa uma lava manulauti o auaunaga ma polokalame a Local Boards taitasi.
O le tofa foi lava ia Tevaga na fai ma fofoga o le mafutaga e toe momoli le faafetai i le taitaifono o le Local Board, Angela Dalton, ma le sui o le Local Board le tamaitai Samoa o Sarah Colcord aemaise o le afioga i le Councillor Daniel Newman i le faaavanoaina mai o latou taimi, e tali le valaau atu a le Walking Samoans…ma taualuga ai i feofoofoaiga i si na iputi mamā na saunia lava e le Walking Samoans i Clendon.
