Ua toe taliu mai i Niu Sila le pulega a le Mapu Maia, ina ua mae‘a se feiloaiga ma ta‘ita‘i aemaise susuga i Faifeau mau tofi o le ekalesia EFKS, sa faia i Malua i le vaiaso atu i ona tua.
O lea feiloaiga o se valaaulia faapitoa sa tuuina mai e le kolisi Faafaifeau i Malua mo le auaunaga a le Mapu Maia i Aukilani, e faatalanoaina ai le mataupu e uiga i se kasino atoa ai ma masini taaloga faitupe ua fuafua le malo e faatuina i Samoa.
E ui lava ina ua foliga mai e leai se isi avanoa e toe taofia ai lea fuafuaga a le malo mo le faatuina o se kasino i Samoa, peitai o loo faatumauina foi se manatu popole, ma se finagalo lē mautonu o ta‘ita‘i o le ekalesia, talu ai lea lava mataupu. Sa auai uma ta‘ita‘i ma faifeau mau tofi o le ekalesia mai vaega eseese o le lalolagi mo lea fonotaga ona o le faatāuaina o le mataupu sa agai i ai finagalo o toeaiina.
O le alii palagi o Graham Ramsey, o Dr Lana Perese, Pesio Ah-Honi-Siitia, faapea Rufo Pupuialii, o sui ia sa malaga atu i Samoa e talia le tusi valaaulia e pei ona sa tuuina mai e tauala mai i le kolisi i Malua.
E pei ona ta‘ua ua lē o iai se talitonuga e toe solomuli le malo mo lea fuafuaga, peitai o le autū o lea feiloaiga, sa talanoaina ai ni auala e fesoasoani ai, ma saunia tagata o le atunuu mo taimi leaga o le a oo mai, ona o aafiaga o le kasino ma ona tuinanauga.
O vaega sa talanoaina e aofia ai le tulaga lamatia o le soifua atinae o aiga, pisinisi, aemaise ai lava tagata taitoatasi. Sa folasia e le Mapu Maia se folasaga e faamanino ai itu ma aafiaga o lea nofoaga pe a faatuina. O lea folasaga o le manaoga tonu lava foi lea sa i toeaiina o le ekalesia, ina ia lava tapena i ai, ma faaauupegaina ai le lautele o tagata o Samoa.
Aafiaga o le atinae o le atunuu / aafiaga o aiga
le a matuā faatupuina le mativa ma le misa i totonu o aiga e afua mai i le matautia o le kasino pe a faatuina le a faateleina le amioleaga ma le solitulafono e pei o le gaoi, ma le faomea, talepe fale, e ono oo lava i le fasioti tagata le a tupu tele le faafitauli o ulugalii misa soo ma le feaina‘i, ma e oo lava foi ina tetea ai ma fevaevaea‘i.
E ono amata ai ni faiga faa-Sotoma e afua mai i tamaitai ma fanau teine i luga o auala ma soo se nofoaga i totonu o le taulaga ma isi nofoaga. O le a faaosofia lagona leaga ma tuinanau o le tino e ono oo atu ai ina lē tausia lelei le tino ae o le a malo faiga faapaumutu i alo ma fanau teine ona o le mativa o lea tulai mai.
O nisi ia o atugaluga ma popolega sa matuā faaalia e sui o le Mapu Maia, i le feiloaiga ma ta‘ita‘i ma faifeau i Malua. E tusa ai ma se saunoaga manino a le faletua ia Pesio, o le tamaitai pule o le Mapu Maia, sa ia ta‘ua ai le matuā lagolagoina e toeaiina o le ekalesia o le latou folasaga sa tuuina atu i ai ma itu e pei ona ta‘ua i luga.
O le isi itu o lea lava folasaga, sa faailoa e le Mapu Maia, ua mae‘a ona faia la latou suesuega, ma sa faamaonia ai le lē lava o le fuainumera o turisi e malaga atu i le atunuu i tausaga taitasi e faaaogāina le kasino, pe a fuafua i le mau a le alii palemia ma le malo o Samoa.
E pei ona silafia sa saunoa manino le ta‘ita‘i o le atunuu, o le kasino e lē mo tagata Samoa i Samoa, a o mo tagata ma malo asiasi atu i fafo, o loo fuafua agai i ai le faaaogāina o le kasino.
O le isi vaega o lea lava suesuega sa faamaonia ai foi, e lē mafai e le kasino pe a faatūina ona faateleina ni galuega mo tagata lautele.
O itu malolosi ia sa faavae ai le mau a le Mapu Maia, ma ua taoto atu nei i ta‘ita‘i ma le mamalu i Faafeagaiga o le EFKS, ina ia toe momoli atu pea lea feau tāua i le malo pe mata e toe silasila i ai, ma le faamoemoe talosia ia fai ni ‘ai o le faatauanau a auauna a le Atua.
Na saunoa foi le Taitaifono o Ekalesia Soofaatasi i le atunuu le toeaina ia Oka Fauolo, ma ia ta‘ua ai le faigata tele ona toe suia le faaiuga a le malo ua iai nei mo le kasino. Peitai o le a faia pea la latou pitolaau o le faufautua ma talosagaina le malo ina ia tuutuu pea i le loloto le tofa ma le faautautaga, ma ia saga silasila atili i ona aafiaga matautia o le a tulai mai pe afai ae taunuu lea faamoemoe.
Sa ta‘ua foi e Pesio Ah-Honi-Siitia e faapea, sa maua foi se avanoa e feiloaia ai ma toe faia ni polokalame faaleaoaoga ma le Iunivesite a Samoa le NUS, faapea foi le aoga a le soifua maloloina ma tausi soifua.
O ia a‘oa‘oga sa faatatau lava i lea mataupu ma ona aafiaga, ma le faanaunautaiga ina ia faalautele pea le feau ma le savali i le matautia ma aafiaga leaga o le kasino pe a faataunuu pea ona fai.
O le taunuu ai o le Mapu Maia i Niu Sila, ua toe sauni atu ai e toe momoli lava lea feau agai i le pulega a Aukilani mo le Super City. Saunoa Pesio ma ia ta‘ua ai le faatāuaina e le pulega faaitumalo o Manukau o le latou mau i le tausaga e 2007, lea na faaititia ai ma tapunia nisi nofoaga o taaloga faitupe i totonu o le aai.
O le talitonuina e le pulenuu ma le pulega o le aai o le mau sa tuuina atu i ai, na mafua ai ona faia lea faaiuga tāua e oo mai lava i le taimi nei.
Saunoa Pesio, o le mau lava foi lea e tasi ua sauni e momoli i le pulenuu ma lana pulega fou mo le aai tele o Aukilani pe a tulai mai le Super City. E lē foi lava poo ai le pulenuu e tulai mai i le faiga palota, e lē ‘alo ai lava le Mapu Maia ma lana anavatau e pei ona taulai i ai mo le mauia o tagata Samoa ma le Pasefika atoa ai tagata lautele o loo nofoia aukilani.
O Pesio o le isi lea sui tauva o Manurewa ua sauni atu mo le finauina o le tulaga mo le fono faatonu mo tagata lautele.
Sui tauva a le ABC mo Manurewa mo le Super City
Pesio Ah-Honi Siitia
Tamā: Leauvaa &a Leulumoega i Upolu
Tina: Fusi i Safotulafai i Savaii
Agavaa e tatau ai ona palota mo Pesio
O ia o se tamaitai Samoa, malamalama foi i tu ma aga a le atunuu, faatasi ai ma le iloa o manaoga faapitoa ma fesoasoani mo aiga ma tagata taitoatasi.
Ua silia ma le 15 tausaga o tautua ma galue mo Aukilani i Saute, e aofia ai ma Manurewa. O le tele o galuega ma matata sa auai i lea taimi umi, o le galulue faatasi lava ma le faalapotopotoga o tagata eseese i totonu o le aai.
O loo nofo foi i totonu o le aai, malamalama lelei i manaoga ma polokalame aoga mo tagata lautele o le itumalo. Galulue faatasi ma tagata lautele mo le tele o tausaga.
Sa ia finauina le mataupu mo le faaititia ma le aveeseina o le tele o taaloga faitupe, ma masini poka mai totonu o le itumalo o Manukau mai le tausaga 2007. E tusa ma le 7000 talosaga sa ia faamaopoopoina mo le finauina o lea lava mataupu agai i le pulenuu ma le pulega faaitumalo o Manukau, lea ua manuia ai tagata lautele o le aai.
Mataupu e finauina pe a manumalo ma tulai mai i le faiga palota
O le a toe finauina malosi le mataupu lava lea e uiga i taaloga faitupe ma masini poka, mo le puipuia lelei o tagata Pasefika ma soo se tasi i totonu o le aai tele o Aukilani pe a suia i le Super City.
O le a faalogologo ma amanaia aiā tatau, ma manaoga o tagata uma o le aai ina ia mautinoa le soifua saogalemu ma le soifua manuia. Ia faateleina ni atinae aoga, mo alo ma fanau laiti faapea nisi o polokalame faaleaoaoga mo tupulaga talavou.
Ia faateleina ni galuega ma avanoa e toe a‘oa‘oina ai mātua matutua ma nisi ua silia ma le tulaga faigata o a‘oa‘oga.
O vaega uma ia ua faamoemoe le tamaitai tauva ma le sui o le ABC, o le a silasila totoa i ai ma finauina pe afai ae tulai mai i le faiga palota o le Super City.
