E lei uma le fia faafofoga ma le naunautaiga e fia faaauau pea ona pu’epu’e mai ni nai faamanuiaga ma saunoaga taua a tamalii ma failauga o le Faleula o Samoa i le latou polokalame lua aso na faia i le nofoaga i Malaeola i le vaiaso na tea nei. O le aso muamua o lenei feiloaiga na matua iloga ona faatumulia ai lea nofoaga seia oo lava foi i lona toe aso. O se feiloaiga na faafofoga ai foi le toatele o le atunuu o loo aumau i Niu Sila nei ae sasaa mai le tofa loloto ma le faautaga mai sui o le Faleula e faatatau i mataupu eseese o le aganuu aemaise lava le mataupu e faatatau i le faamama avega i le taimi o faalavelave i lo tatou atunuu. O le aso lona lua na talanoaina ai ma faaali finagalo i le mataupu o le Faaoso lea e faalogoina soo i le taimi o faalavelave, o le fesili pe alagatatau ona faia ni faaoso i siialofa o maliu ma isi faalavelave. O le tali na saunoa iai le Faleula, o le faaoso lava ia e patino lona faatinoina i le autovaa mai o se aumalaga, ona alagatatau ai lea o le faaoso aua e fai ma fesoasoani e tua iai le malaga pe a lagona le vaivai peitai ane o le faia o faaoso i siialofa i taimi o maliu ma isi faalavelave e le talafeagai. E tatau lava ona tamau le faatinoina o le siialofa i le tulaga na sau ai le atunuu i aso ua mavae lea e maea loa ie e tolu e pei ona faaaogaina i mea faapea ona tatau foi lea ona faagata ai loa le faaaloalo e aunoa ma le tau toe faatinoina o ni faaoso.
O se tasi mataupu na faaali finagalo foi iai o le pasese lea na faailoa e le tele o finagalo o le Faleula e le tatau lava ona faia ni pasese pe a fua lava i le tu ma le aganuu a Samoa ma o se tasi lea o itu e ao ona silafia e avea tele ma faamama avega i aiga i le taimi o faalavelave o le faamatuu ese o le pasese e le tatau ona toe faataunuuina aemaise lava i taimi o maliu. O le polokalame sa faatautaia lava e le tofa Maulolo Tavita Amosa atoa ai ma le fesoasoani a le afioga Pau Fereti Puni lea sa ia fesoasoani foi i le filiina o tamalii o le atunuu e agaia le faamoemoe o le Faleula i aso ia e lua, o nisi o manatu taua na faaalia e le au agai poo fea tonu e taoto ai le tuaoi o le alofa moni ma le fai aiga lelei i le aganuu a Samoa atoa ai ma se manatu faaalia o se tasi o tootoo po ua le alagatatau ona finauina e le Faleula se suiga i le mataupu e faatatau i Tama a Aiga i le atunuu ina ia tau o gatasi ma faataotoga o tulaga mamalu i isi atumotu o le pasefika lea o loo taua o latou taitai, o tupu.
Fa’alauiloa tusi Fa’afaletui o le Aganu’u
O le taunu’u ai i Aukilani o le aumalaga a le Fale’ula o Samoa mo le fa’atalanoaina ma le mamalu o lo tatou atunuu i Niu Sila o se fa’amama avega i fa’alavelave fai masani o le atunuu fa’apei o maliu, ua ma’ea se tasi o galuega sa feagai ma le Fale’ula o se tusi ua faaulutalaina o le Fa’afaletui o le Aganuu. O se tusi na fa’alauiloa i Samoa nei i le faai’uga o le vaiaso a’o lei tuua le atunuu e le aumalaga. Ua fa’amaumauina i lea tusi fa’amatalaga eseese fa’atatau i a tatou tu ma aga i taimi o fa’alavelave faasamoa e avea ma fa’asino-ala i le lumana’i. Peitai i le finagalo o le taitai o le Malo i le alii Palemia susuga Tuila’epa Lupesoliai Sa’ilele Malielegaoi, i le aso na fa’alauiloa ai lea tusi, na ia saunoa ai o le galuega a le Faleula o Samoa e taua tele e fai ma faatupu manatu, ae o le faaaogaina, o le sa’olotoga lea o le tagata lava ia, pe mana’o iai pe leai. Ua tele faiganuu ua latou faaaogaina fautuaga a le Faleula i le faia o fa’alavelave faapei o maliu, ua maua ai se fa’amama avega ma toe molimauina ai le mamalu o tu ma aganuu a Samoa sa faatino ai lo latou valevale alofa i osiga o aiga ma le auala e mafua ai ona ave se fesoasoani ise faalavelave. E le o le mana’o ia toe faaopoopo ai se tamaoaiga e maua mai i palapala a malo ma tupe ma toga, pe fia iloa ma fia tagata faaalialia vale ai i le tele o sona tamaoaiga ae mulimuli ane tigaina i le mau aitalafu ma oo ai i nisi mafatiaga ogaoga.
