E pisa lava tama ae o le uso. E faapena se lagona o nisi o le au mātau o upufai o Malo, pe a toe manatua feupuaiga o polokiki i le va o le Palemia o Samoa ma le palemia lē tumau o Fiti.
E mafua ona iai lea lagona, pe a silasila i le feiloaiga talu ai nei a le palemia lē tumau o lea atunuu tuaoi, ma le Ao Mamalu o le Malo o Samoa ma lana masiofo, a o iai le tama-aiga i le atunuu o Fiti mo le faauuga a le Iunivesite Aoao a le Pasefika i Saute.
O le feiloaiga lea ua mafua ona mapuna mai i fafo ma iloa e le toatele ona o se faamatalaga mai le Malo o Samoa ua ta‘ua ai le sese o lipoti a le leitio a le malo o Fiti i le auala na mafua ai ona feiloai atu le Ao o le Malo i le taitai o le faigamalo faafitafita a lea atunuu.
E talitonu le Malo o Samoa o le talosaga a le faigamalo faafitafita na ave i le pulega o le Iunivesite mo le fia faia o se feiloaiga, na mafua ai ona luluaao le Ao o le Malo, afioga Tui Atua Tupua Tamasese Efi, o lana masiofo ma le Palemia o Bainimarama.
Ua lē nofonofo lelei le Malo o Samoa i le masua mai o lipoti a le leitio a lea Malo na ta‘ua ai, o le feiloaiga na mafua ina ua tuusa‘o se manao o le palemia lē tumau le taitai‘au o le fitafita a Fiti i le Ao o le Malo.
Faaalia e le Malo o Samoa i se pepa o faamatalaga, e matuā lē sa‘o lea lipoti. Peitai o le pulega o le Iunivesite a le Pasefika i Saute i totonu o Suva na auala atu ai le manao o le Peresitene o lea atunuu faapea ma le palemia lē tumau e fia feiloai i le tama-aiga ma lana masiofo.
E lei tuuina mai se finagalo o le Malo, pe na talafeagai le feiloaiga na faia. Ae peitai ua faaalia e se ofisa sinia o le pulega o le Iunivesite a le Pasefika i Saute i Fiti o Rajesh Chandra, sa uia e le pulega o le USP i Suva i Fiti le auala sili ona fetaui ma faiga faamalo, o le talosaga lea i le pulega o le iunivesite mo se avanoa.
A maua lelei, a lē maua ua pau lava o le mea ua oo i ai. Ae sa mafai ona feiloai le Ao Mamalu ma le Peresitene ma le palemia lē tumau o lea Malo tuaoi.
E lē o iloa lava poo ā ni mataupu sa feofoofotai ai le tama-aiga ma lana masiofo ma le palemia lē tumau o Fiti.
O loo mātau e le au faiupufai o Malo o le lalolagi aemaise lava i Samoa le feiloaiga a le Ao o le Malo ma lea taitai o loo ilitata i ai lagona ma finagalo ona o lona foua o le faigamalo na filifilia e tagata o Fiti e ala i se gaioiga na faaaogā i ai lona malosi faafitafita.
