Feiloai Faatonu aoga Katoliko talanoa le fesoasoani mo pili aoga

Ua faafetaia e le pulega o aoga a le Ekalesia Katoliko le fesoasoani a le Malo ua faasoa atu mo le totogiina o pili o le fanau i aoga tulagalua, i le naunautaiga ia maua se faamāmā avega mo matua limavaivai i le itu tau tupe. Peitai o le itu mautinoa e le tutusa manaoga o aoga tulagalua a le Malo ma aoga tulagalua a ekalesia.
Faaalia e le faatonu o aoga a le ekalesia Katoliko, le afioga A‘eau Chris Hazelman, ua tele se fesoasoani a le polokalame mo matua e toatele fanau o loo aooga i aoga tulagalua a le ekalesia, peitai e iai to‘a o loo fia sailia ai se fofo ina ia ausia le faamoemoe o le Malo e aooga fua uma fanau i aoga tulagalua, aua o le sini lea o le tulafono ua faamalosia ai le ave o fanau i le aoga lea e amata faamamalu i le masina fou.
O le mafuaaga lea o se fonotaga ua tāloina e le ofisa o aoga a le ekalesia Katoliko ma uluaoga o ana aoga tulagalua, i le fia talanoaina o le fesoasoani tau tupe mo le totogiina o pili ma faatupe ai le aoaoina o le fanau.
O aoga tulagalua a le Malo e fua le aofaiga tupe e ave i ai i le aofai o tamaiti, faaopoopo i ai ma le selau tala o le pili o le tamaititi mo le tausaga atoa, ae o aoga a ekalesia e $2,000 tala le tupe e maua faaopoopo i ai ma le selau tala o le pili aoga o le tamaititi, peitai o pili aoga mo nisi o aoga tulagalua a le ekalesia e selau tala ma ona tupu i le kuata ae le o le tausaga.
Faaalia e le faatonu o aoga a le ekalesia, le afioga A‘eau Chris Hazelman, o pili o le fanau o loo maua ai se isi vaegatupe o loo fesoasoani i le totogiina o faiaoga ma isi vaega o le aoaoina o fanau, ma o le itu lea o le a silasila totoa i ai i le fonotaga o loo fuafuaina.
O se tasi lea o aulape o le fesoasoani e le faaaogaina ai tupe, o le polokalame i ni totogi o faiaoga. Ua iai le talitonuga o nisi e ono faaopoopo le numera o tamaiti i aoga tulagalua a le Malo, pe afai o le a na o le tasi le kuata faaleaoaoga e gafatia i le fesoasoani mo aoga a ekalesia e silia i le selau tala le pili aoga i le kuata e tasi.
Na faaailoa e le pulega o le Matagaluega o Aoga, Taaloga ma Aganuu i se feiloaiga ma pulenuu ma sui o komiti a aoga i le amataga o le vaiaso nei, o le a faaauau pea le fesoasoani a le Malo e lima miliona tala o loo vaevae i aoga tumaoti, ma aoga a ekalesia faapea aoga faapitoa i tausaga taitasi ma o le isi lea fesoasoani o loo toomaga i ai aoga a le ekalesia Katoliko e pei ona faaalia e le faatonu o aoga a le ekalesia.