O le faletalimalo o le Mercure i Liverpool na talimalo ai le Afioga i le Konesula fou o Samoa le Tofa ia Manogiamanu Fonoti Etuale Ioane aemaise lona faletua ia Safanua i le mamalu o Samoa i Sini nei. Na tapenaina uma foi e le Hai Komesina, Afioga Lemalu Samau Tate Simi i Canberra lea taumafataga mamafa na talisua ai le atunuu.
O le sui Hai Komesina ia Faatoatoa Luciano Fonoti na faailoa mai o lenei feiloaiga e taualuga ai le tapenaga o le ofisa o le Konesula i Liverpool.
Ua toe taliu foi sui o le Malo o Samoa na afifio mai i le faatotogaina o le maota. O le susuga i le Toeaina i le Faatonu Rev Elder Peleti Toese Toailoa na saunia se talosaga puupuu ma faamanuia ai le Tofi fou.
Na aufaga potopoto ai foi susuga i Faafeagaiga ma o latou Faletua e pei o le susuga i le faafeagaiga ia Rev Iakopo Leleimalefaga ma le faletua ia Faiesea o le EFKS a Canterbury. Na auai mai ai foi Rev Asi Luaei Siaoloa mai Melepone ma Aloese Filipaina ma le faletua.
O le susuga i le faafeagaiga ia Faauuga Siitia ma le faletua ia Faatuai o valaaulia ia mai le Uniting Church i Lakemba.
O se avanoa foi e faafetaia ai le Aulotu AOG mai Hurstville le Faafeagaiga ia Papalii Saumaosoma le faletua i le tuanai o la latou foai maoa‘e e $10,000 mo le HRPP. Sa faapea foi ona auai atu le Afioga Patele Morris Thompsen faapea Patele Spa Silva.
Na saunoa le Afioga Lemalu Tate Simi le Hai Komesina mai Canberra e faailoa le soifua a‘oa‘oina ma le galue o le tofa Manogiamanu Fonoti Etuale Ioane.
O le Iunivesite i Papua Niu Kini na saili ai lona faailoga BA i le Tekonolosi ma sosoo ai ma le sueina o lona faailoga Masters i le Iunivesite o Sheffield i Egelani.
Na avea foi ma faatonu o le komiti o taaloga o le Pasefika i le 2007. Ua tatala nei la le Konesula i Sini ma ua faamāmā avega i tusifolau e lē toe tuliloaina Canberra.
Na valaaulia foi nisi o faipisinisi iloga i Sini nei ua loa la latou tautua i le mamalu o le atunuu. Sa faatasi atu ai Dr Seagaitumua Paniani Patu ma le faletua ia Mineva Patu, Peseta John Nigel ma le faletua ia Aniva Nickel o le Ea Pasefika, Rosalina Parker, Leilua ma Sita Uesele o le Polynesian Umu Cooker ma le Ofisa Malaga o le Aqua, Tauo Valu Siaki Toomata o le falemaliu, Lisa Parker o le Poly Aussie Mix, aemaise Peresetene o le Fono ia Teleiai ma Lagi Wilson faapea Alaalatoa Emani ma Fetu o le Lau Samoa.
O le failautusi a le fono ia Peti Moaga ua avea nei ma failautusi a le Konesula. Na auvasa mamao mai foi se aumalaga mai Canberra e aofia ai Salale ma Saitoria Salale, Arieta, Elaine Stanley ma Katie Fonoti.
Na toe faaalia e le Afioga i le konesula ua sauni nei e auauna i soo se auala e mafai ona fesoasoani ai i o tatou tagata i le telefoni 62865505.
