O lupe sa vaovao eseese a ua fuifui faatasi ona o le molimauina o le aso fiafia o alo ma fanau i totonu o le aiga.
O le itula e 10 i le taeao o le Aso Toonai, na faapaiaina ma osia ai le feagaiga e tamotu ai filifili gaogaosa o le olaga ma tuu atu loa le faamoemoega atoa o le susuga ia Aieni Levi mo lana manamea, le faatoanofotane ia Tracy Tolo Levi.
Ua tolu tausaga o le mafutaga ma ua alagatatau loa ona faatasia e ala i le sakalameta o le faaipoipoga.
O mātua o le alii faaipoipo ia Aieni Levi o le susuga ia Mose ma le faletua ia Saina Levi mai Mulifanua & Salelologa.
O le tamaitai o Tracey o se alo e faasino i le susuga i le faafeagaiga o le Ekalesia Church of God, le susuga ia Rev Tasi Tolo mai Samauga ma le faletua ia Foua Tolo mai Faleasiu. Sa taitaia lava le sauniga e le susuga i le faafeagaiga ia Ps Ian Hanson. E ova atu i le to‘a 9 isi faafeagaiga Samoa sa auai. O le afioga ia Leaupepe Api sa fai ma fofoga o le aso ma faafeiloai le auvalaaulia.
O le fetalaiga ia Afoa Sipaia mai Faleasiu sa tu i le tootoo i faaaloaloga auā le aufaigaluega paia a le Atua ma Samoa na potopoto. Sa matuai faatumulia le taumafataga sa tapenaina e le tofa ia Pauli Ituaumalosi Atipopo ma Line Wong Kee o le Wkk Super Supper.
