O le tuanai o le palota tele a le atunuu i le tausaga e 2011 na faaalia ai e le Palemia i se feiloaiga ma tusitala o le malosi o le tātā o lona fatu e pei o se fatu o se pulu. O le faailogaina o le aso fanau o le HRPP i le amataga o le tausaga nei na saunoa ai Tuilaepa ma ia ta‘ua o lona malosi o loo atoatoa ma o le malosi foi o lona fatu e pei o le fatu o le i‘a o le tafolā.
I le feiloaiga ma tusitala i le vaiaso ua mavae na ia faamatala ai le tāua o le tausia lelei o le soifua maloloina auā o le isi lea mau tauave a le Malo o loo faamalosia. O sana asiasiga i Savaii talu ai nei mo le tatalaina o nisi atinae a le Malo e pei o auala tetele, na faaalia e le Palemia na foi mai i Upolu ma agai loa i le falemai mo le faia o lana siaki masani. Na ia faamatala i tusitala le tau taofiofi e teine o le falemai, masalo o ni tausi soifua, o le feei o masini ona o le malosi tele o le tātā o lona fatu. E mālie le finagalo o le alii Palemia ona e faamatala i nisi taimi ma soisoi, ae o le talitonuga o loo afifi ai se feau tāua mo le atunuu i le tāua tele o le tausia o le latou soifua lelei. E tai ono masina ma agai le alii Palemia e fai ana siaki, ma e lē o iai lava se mea o faaletonu.
O le molimau a nisi o le au fai tofa o upufai o Malo poo polokiki, o lea ua manino mai i le finagalo o le taitai o le Malo, e mafai foi ona ia toe taitai lana vaega faaupufai o le HRPP mo le isi lima tausaga o lumanai pe a mae‘a le palota tele o le tausaga e 2016.
O le faamautuina foi lea o le mau a nisi, o le taimi e suia ai le taitai o lea vaega faaupufai o le a tutupu mai loa ni feteenaiga i le lotoifale o le HRPP. O loo molimau nisi o le paeaiga mulimuli lenei a le Palemene o le a tuua ai e Tuilaepa le tofiga taitai ae lafo i le pati e faia le latou filifiliga.
Peitai o lea ua manino mai i le finagalo o le alii Palemia ina ua faamanatu le 35 tausaga o le vaega faaupufai i le amataga o lenei tausaga fou, e lei taofia lava i le falemai i se gasegase, o lona malosi e lē o suia e fua i lona fatu o loo lelei atoatoa.
O lona uiga i se matau faapolokiki o le ata manino lea o le faatumauina pea o le taitaiga o lea vaega faaupufai ma le tumau ai pea ona avea ma taitai o le Malo pe afai o le a toe filifilia lana vaega faaupufai i le palota o le 2016 lea toe lua tausaga ona faatino loa lea.
