Feei fiafia ma patipati ua taunuu manuia suiga o le itu auala

Ua faamauina nei i talafaasolopito o Samoa aemaise o le lalolagi le aso 7 o Setema 2009, na suia ai le itu o le auala e feoai ai taavale i Samoa i le tuanai o le silia i le selau tausaga o feoai i le itu taumatau, talu mai taimi o pulega a Siamani, o lea ua sui nei i le itu agavale.
“E lagona le faafetai i le Atua ua faataunuu manuia le faamoemoe o le Malo ma le atunuu”, o saunoaga amata ia a le alii Palemia, Susuga Tuilaepa L Sailele Malielegaoi, ina ua fesiligia e le tusitala i sona lagona i le tuanai o nai minute talu ona ia faasilasila aloaia le suiga o le itu auala e ala i se sauniga sa faia i le ofisa tutotonu o le Matagaluega a le Tineimu i Apia.
“Ua lagona le faafetai i le Atua ua taulau o le faamoemoe e le gata i lena, o le faafetai foi i le tapuaiga a Samoa i ona tupu ma ona ee i le lagolagoina o lenei suiga tele. Ou te faafetaia foi i latou sa iai ni o latou popolega aua o popolega foi na o le Malo, ia i matou uma aua e tatou te fai fanau.
E tele manuia e maua e lo tatou atunuu aemaise ia tatou e le tutusa le malosi e mafai ai ona faaaoga isi auala e pei o tatou fanau i Niu Sila e maua mai ai se auala e feoai ai matua ma aiga i Samoa nei aemaise tatou i tua e mafuli i le savali i uta ma amo ane i tai fua o faaeleeleaga ma tau totogi taavale e lau mai ai i le maketi.
O le avanoa lea e faatelevave ai le tamaoaiga, faatelevave ma siitia ai fua o faatoaga ma aumai foi i Apia ma pa‘u ai i lalo le tau o le soifuaga”, o se finagalo faaalia o le Palemia.
O se isi itu taua na faaalia e le taitai o le Malo, a iai taavale a aiga, e vave ona malaga uma ai tagata o se aiga ma faanatinati i nofoaga maualuluga pe a oo ina afea le atunuu e mala faalenatura e pei o galuafi poo tsunami.
“O lea lava sa tatou vaai i ai ia tatou faataitaiga sa fai e umi tele lea mea o le savali toe tuu atu i ai ma le faafaigofie i matua ona ave fanau i aoga. E iai lou talitonuga e uma le aso ua masani tagata ae o le tatalo i afioaga foi o iai pea le moemoenoa ma le laufaleaina sei fesoasoani ane alii ma faipule leaga o le faaleagaga o mea ia o faasinoala e ono toe lavevea ai a tagata o le nuu.
O mea ia e fai e le Malo e mo le manuia mo le atunuu. E faafetai atu foi i polokalame o loo faatino e lau tou vasega o le au faasalalau e faatupu manatu pea i le Malo”, na toe saunoa ai Tuilaepa.
E toatele tusitala o fale televise, o leitio ma nusipepa mai atunuu o le lalolagi na tumutumu ai le taulaga o Apia i le sauniga na tatala aloaia ai le suiga o le itu auala. Na faaalia e Tuilaepa o se tulaga taua lea i le faamoemoe o le Malo ma le atunuu ona ua avea le suiga fou o feoaiga a taavale ma avanoa e faasalalau atu ai ma Samoa i le lalolagi i fafo.
O se avanoa foi e le tau fesiligia e lenei nusipepa o le a tosina mai ai tagata tulisi e maimoaina le atunuu aemaise pe afai o atunuu o loo feoai taavale i le itu agavale o le auala. Talosia i le amataga o lenei suiga e pei ona faaalia e se tasi tamalii ia aveave ai pea le saogalemu o feoaiga e pei ona molimauina i aso amata o le suiga o le itu auala.