Ua mae‘a ona tatala le toe faaleleia o vaega na leaga o le uafu i Satitoa Aleipata mai le galulolo, ma ua faailoa mai ai le amata o malaga i le va o Samoa e lua e faaaogā ai lea uafu, i le Aso Tofi o le vaiaso nei.
O le iva i le taeao o le a tuua ai e le Lady Naomi le uafu i Satitoa, ae o le Aso Faraile i le 10 i le taeao e tuua ai Amerika Samoa.
Ua faaalia i lipoti o le a na o le tasi le malaga i le vaiaso e faaaogā ai Satitoa, ae e lē o faailoaina mai e le pulega o le faalapotopotoga o Vaa a le Malo o Samoa pe tumau pea malaga agai i Tutuila mai le uafu i Matautu i Apia lea e faia i po o Aso Lulu.
I malaga mai Satitoa ua faaalia o le a na o uta lava a pasese ua faamaonia o le a malaga e aveina e le vaa, ae leai ni uta masani e pei o taga talo ma isi oloa e masani ona felauai i le va o Samoa ma Amerika Samoa.
E foliga mai o le a iai se isi fetuunaiga i le felauaiina o uta i le faia o ni malaga faapitoa mo na o uta. E toatele nisi o loo atugalu i le taimi nei i le mamao o le uafu i Satitoa o le a faaee ai malaga.
O i latou ia e malaga mamao mai Savaii ma nuu maotua o le atunuu.
O le itu mautinoa e ui ina mamao ae o aiga ma tagata e iai a latou lava taavale o le a gafatia le agai i Satitoa e faaee ai se tasi poo nisi foi e malaga i Tutuila. O le a faapea foi pe a toe taliu mai i Upolu le faigamalaga.
O se avanoa foi ua ta‘ua e se tasi o tamalii ua tatau ai ona silasila le Faalapotopotoga o Vaa a Samoa i se auaunaga faaopoopo mo feoaiga, i le iai o se pasi e tuua Apia mo le uafu i Satitoa i le aso e malaga ai le vaa auā o le a lē toe malaga i le po ae o le ao.
O lona uiga e tatau ona iai se pasi e malaga po i le uafu i Aleipata ina ia taunuu e lei tai tai ona alu ese le Lady Naomi. I faataliga vaa masani mo pasese ma uta e aumai mai Pago Pago, e lē o iai se faigata auā o le ao e taunuu ai le vaa, se‘i vaganā le mamao o le tau malaga atu mai Apia i le uafu i Satitoa.
Pe ana leai le sunami na toe faaleagaina ai nisi vaega o le uafu i le Mata Aleipata semanu e faapenei ua leva ona faia malaga i le va o Samoa e lua.
Ua faailoa e le taitai o le Malo i lana saunoaga na toe tatala ai le uafu, e ui e tasi le malaga o le a amata ai, ae i le agai atu i le lumanai e au ina lua pe sili atu foi.
O le isi itu o loo silasila mamao i ai le Malo e au foi ina fausia se malae vaalele i lea vaega o Upolu ma faia ai ni malaga a vaalele i le va lava o Samoa e lua.