“O le lē auai o Tahiti ma Fiti ona o popolega o tama fusu o se luitau”..taitaifono
O le faalauiloaina o tama fusu a Samoa o le a tausinio i le taamilosaga na faaalia ai e le taitaifono o le PRBC le tofa Pa‘u Teleai Edwin Fereti Puni, o se luitau tele lea mo ia i lona tulaga o le taitaifono ona e foliga ua le silasila pulega o fusuaga a ia atunuu e lua i le maualuga o tapenaga a Samoa i mea tau fusuaga.
O le finagalo o le taitaifono na atagia mai ai lona atugalu i le lē auai o aufusu a Tahiti ma Fiti ua mae‘a ona faamautu le auai i le amatalia o le taamilosaga.
Ta‘ua e Pa‘u e le o se tulaga e faapea o le a faaletonu ai le amataga o le PRBC ona ua iai se alii fusu mai Peretania, o Niu Sila, ma Amerika Samoa o le a tausinio ma tama fusu a Samoa ua filifilia mo ia fusuaga faapolofesa.
O le itu i le seleni o loo faatupe ai le faamoemoe ua mae‘a ona faailoa ni fesoasoani faapea mai le Malo o Samoa ma le Komiti o tapenaga o le Tutoatasi e pei ona aofia fusuaga a le PRBC i le polokalame o le Fu‘a.
O le lagolago autu foi a le kamupani telefoni o le Bluesky ua mafai ai e i latou o tapenaina le taamilosaga ona faatino nisi o fuafuaga.
Faaalia e le alii pule o le BlueSky i Samoa le susuga Tiafau, o le naunautaiga lea o le kamupani ia maua sona sao i le atinaeina o faipelega ma soo se taaloga lava i le atunuu.
O le lagolago a le BlueSky ua fuafua e tusa lona tau aofai ma le $20,000 ae le aofia ai telefoni ua faaaogā mo fesootaiga.
O paga ua faailoa mai e le pulega o le PRBC o le a fetaui:
PRBC Heavyweight (6 x 6)
Gogosina Ulutoa vs John Niggins (Niu Sila)
PRBC Super Middleweight (6 x 6)
Leti Leti / Too Mitai vs Richard Hackney (UK)
PRBC Super Middleweight (6 x 6)
Iosia Nanai vs Ata Fai (Niu Sila)
PRBC Cruiserweight (4 x 3)
Saipeti Muga Asiata vs Alapati Aasa (Am. Samoa)
Samoa Cruiserweight (4 x 3)
Francis Mamoe vs Farani Tavui
Samoa Welterweight (4 x 3)
Tony Iapesa vs Michael Fonoti
