Ua faamautu mai e le afioga i le Alii Minisita o le Matagaluega o tina ma tamaitai, atina‘e o nuu ma agafesootai, Tolofuaivalelei Falemoe Leiataua i le mataupu a le afioaga o Satapuala lea o loo vaeluaina i le taimi nei.
“O le agaga lava o le Malo, o le faatumau o pulega lelei i totonu o nuu, ma teuteu eseesega e tulai mai i totonu o pulega a alii ma faipule,” o se saunoaga lea a le alii minisita.
E oo mai i le taimi lenei, e lua ni faiganuu eseese ua vaeluaina i ai le afioaga o Satapuala, ma e lē o toe iai ni sui aloaia o lea afioaga i totonu o le Malo e pei ona iai le sui pulenuu, sui tamaitai ma le sui o tupulaga mo afioaga uma.
O le masina o Setema sa faia ai le faamasinoga mo le suafa Toalepaialii ma o le mae‘a o le lauina o le faaiuga a le faamasinoga i le masina o Oketopa mo lea mataupu, na faasala ai e le afioaga le afioga ia Vailituisemealelei Tatupu III, ona o se faamatalaga e faapea, e iai ni ana lafoga sa faia i lea faamasinoga ua oia ai le faavae o le nuu.
E $5000 tala na faasala ai Vaili Tatupu, ma sa ia teena lea faasalaga ona e iai lona talitonuga, e lē sa‘o lea faaiuga ua faia faasaga ia te ia. Sa faaoo mai e le afioaga lea mataupu i le faamasinoga, ina ia faamalosia le latou faaiuga na faia faasaga ia Vaili Tatupu.
Sa faaoo mai foi le tagi a Vaili Tatupu i le lē sa‘o o le faaiuga ua faia e le afioaga. O le faaiuga a le Faamasinoga i ia mataupu uma, o le toe agai uma o itu e lua e feiloai i tua i le nuu ona faia ai lea o se isi faaiuga ona e lē lava mau mo mataupu ua faaoo atu i luma o le Faamasinoga.
O le feiloaiga la na sosoo ai, e lei iai se faaleleiga na faatautaia ona na ta‘ua e Vaili Tatupu sa faatonu o ia e totogi atu pea lana sala, ae ua pa‘u i lalo i le $4,000 tala.
O le ala lea na faatū ai loa le faiganuu a Vaili Tatupu ma matai o loo lagolago i lana itu i le aso 6 o le masina nei o Novema ma tuu mai ai loa se latou tusi i le Alii Palemia e aloaia ai le latou faiganuu faatasi ai ma sui o le a faatū mai mo tofiga faalemalo ona o le taimi nei ua lē o toe iai ni sui o Satapuala i totonu o le Malo.
E to‘a 32 matai o loo fai monotaga i totonu o Satapuala ua i lalo o le faig+anuu a Vaili Tatupu, faatasi ai ma matai e to‘aono o loo aumau i atunuu i fafo o loo lagolago mai i lea faiganuu ma matai e to‘a 12 o loo i isi afioaga o Samoa. O matai o loo lagolagoina le itu a Vaili Tatupu, e aofia uma ai i latou sa lē malilie i le gaioiga o loo tuua‘ia ai ma ua molia ai i luma o le faamasinoga nisi o le afioaga faatasi ai ma le sui faipule o Aana Alofi III, Toeolesulusulu Cedric Shuster i le faia o se pamaa i le aualatele e faafesagai ma le malaevaalele na taofia ai faigamalaga a le atunuu.
O le isi itu o le nuu, o loo taitaia e Vaili Mimita, ma o loo aofia ai ma Ga Sakaria, o ia lea sa avea ma pulenuu o Satapuala a o lei tulai mai le feeseeseaiga i le nuu. Faaalia e Vaili Tatupu, o le a lē toe foi le latou faiganuu ua iai nei ona e manumanu i le lumanai o le fanau faapea le aufaigaluega a le Atua o loo galulue i totonu o le afioaga.
Sa faaalia foi e le latou itu i le feiloaiga ma Tolofuaivalelei i le vaiaso nei, ua sauni e lagolago i soo se polokalame a le Malo pe a tusa ai ma se faaiuga o le a faia e le kapeneta ma le alii Palemia.
E lei iai se finagalo mai le itu a Vaili Mimita, ona o loo iai se latou fuafuaga e feiloai i se taimi o i luma ona faailoa mai lea o so latou finagalo o le a autasi i ai.
O le mae‘a o le feiloaiga a le alii Palemia ma le minisita o tina ma tamaitai, atina‘e o nuu ma agafesootai, o le a toe feiloai ai loa le itu a Vaili Tatupu ma le alii minisita mo se faaiuga o lea mataupu, aemaise o le talosaga sa tusi ai lea itu i le Alii Palemia.
