O faauluuluga o Matagaluega ma Faalapotopotoga a le Malo e galulue uma e faatino fuafuaga a le Malo mo le atiina a’e o le tamaoaiga o le atunuu ina ia manuia ai tagata uma. Ae peitai e le mafai ona tino ni fuafuaga a le Malo pe afai e le lelei le faatinoina o galuega a tagata faigaluega ae amata uma mai lava i le Pule Sili poo le faauluuluga.
O le autu lea o se mafutaga a Pule Sili poo Ofisa Sili o Matagaluega ma Faalapotopotoga eseese a le Malo na folasia ai faafitauli o loo fetaia’i ma le Kapeneta i le tuai maua o tali o fuafuaga e tuuina atu i faauluuluga e faatino. Na saunoa manino le afioga i le Palemia susuga Tuilaepa L Sailele Malielegaoi, i nisi o galuega sa faapena ona le lelei ona faatino ae mafua ua taofiofi mamau le Pule Sili ua le faasoa atu nisi o ana galuega e faatino ia i latou o le au faigaluega sinia.
O se tasi o fuafuaga o loo silasila nei iai le Malo o le agai lea o le Komisi e pulea tagata faigaluega poo le PSC (Public Service Commission) e faatino polokalame mo le aoaoina o tagata faigaluega ae taatia atu le faaiuga o le filifilia ma le faamalolo o tagata faigaluega i pulega o matagaluega ma faalapotopotoga a le Malo.
Na faaalia e le Palemia o se faiga sili lea o le a agai ai lava le komisi e faatino fuafuaga uma mo le lelei o le tagata faigaluega ma siitia ai le auaunaga mo le tautuaina o le atunuu.
“O le faamoemoe o le PSC i lenei taumafaiga e le na’o faamatalaga faalautele e tuuina mai e Matagaluega ma Faalapotopotoga ae ia faama’oti tonu mai tomai manaomia aemaise poto ma agavaa faapitoa (technical competencies). O le a taumafai le PSC e fesoasoani atu i Matagaluega i le faamaopoopoina o nei tomai ma agavaa i se faataitaiga e faigofie ona tuufaatasia e Matagaluega ma Faalapotopotoga, ma o le a auiliili atu i le tou talanoaga atoa ai ma feiloaiga a le PSC ma Human Resource Managers a Matagaluega ma Faalapotopotoga.
O le sini o lenei galuega o le mafai lea ona tuufaatasia se ata atoa o le manao (demand) mo tomai ma agavaa mo le malo atoa (whole Public sector), ina ia mafai ai ona fuafua iai avanoa (supply) o aoaoga o loo mafai ona faia e le PSC pe faatinoina foi lava i totonu o Samoa e le NUS faapea faalapotopotoga faapolofesa (professional associations) ma faaaogaina ai a tatou vaegatupe (training available from PSC or within Samoa and funded from our own resources). E tāua tele le manino o tomai ma agavaa na o fafo atu o Samoa e mafai ona a’oa’oina ai ma manaomia ai le fesoasoani mai o Paaga Atinae (Specialist Technical training available only outside Samoa and require the support of development partners).
O le agaga tāua tele o lenei galuega e lē gata i le manino o tomai ma agavaa tonu o manaomia, ae o le aogā tele o nei faamaumauga e fua i ai faaiuga mo a’oa’oga e tatau ona faatino (evidence based decision making), ae maise ai ma le fesoasoani mai a tatou paaga.
O le talosaga a le PSC e tauala atu ia te au, o le lagolago mai e lē gata i Matagaluega ma Faalapotopotoga i lalo o le PSC, aemaise ai State Owned Enterprises ina ia mafai ai ona tuufaatasiaina le ata atoa o training needs ma capacity building requirements o le Malo atoa (whole public sector).
E iai foi le manatu o nei faamaumauga o le a fesoasoani foi i le Matagaluega o Aoga, o le NUS ma professional associations i le faatulagaina o a latou aoaoga.
Ia ae se’i tālia ia i le mae’a lelei o lenei galuega e manaomia tele ai le lagolago a CEOs ma pulega o Matagaluega ma Faalapotopotoga”. O se tasi mataupu sili ona taua i tiute tauave o Pule Sili o le faaaogaina o aseta a le Malo e pei o taavale.
Ua faaalia e le Minisita o Galuega tetele a le Malo o loo mataitu pea le faaaogaina o ia aseta taua ma taugata ona o loo molimauina pea e iai lava i latou o loo solia aiaiga o le faaaogaina o taavale a le Malo.
