“O lenei foi Tulafono Taufaaofi, o loo iai nisi o solitulafono faavaomalo o loo fautuaina mai e silasila i ai le Malo o Samoa mo le mataituina ma le faatulafonoina”
O fonotaga faalauaitele sa faia ma le atunuu e saili ai ni o latou finagalo e faatatau i nisi o moliaga tau solitulafono, ua tatau ona soloia ma aveesea, faapea le faaopoopoina o faasalaga mo nisi solitulafono, ae tainane le faaopoopo o nisi o moliaga tau solitulafono, ua mae‘a ona tuufaatasia nei e le Komisi o tulafono a le Malo teuteuga ma aiaiga fou o le Tulafono o soligatulafono o le tausaga e 1961, ma o le a faataatia i le Palemene i le masina nei.
O nisi o solitulafono sa lauliliuina e le komisi o tulafono sa faaali i ai finagalo o le atunuu, e aofia ai le mulilua, ma le aveesea o moliaga e faasaga i se alii na te faia ni uiga ma ni aga e faafoliga ai i se tamaitai.
O le tasi lea o solitulafono ua iai le fautuaga ina ia soloia, ae amanaia le aiā tatau a alii faafafine e mafai ai ona laei faapei o se tamaitai.
Peitai o se tasi o mataupu o loo ilitata pea i ai lagona faaalia o nisi o le lautele o le atunuu.
O le tuuina atu o le tulafono taufaaofi i le Palemene o loo aiāia ai ma le faaofiina o nisi o faasalaga faamamafa mo solitulafono o faiga faatetorisi, poo terrorist.
O se tasi lea o solitulafono fou, faapea gaioiga solitulafono i fesootaiga televavave faaonapo nei e pei o le Cyber crimes. I se faaiuga a le Kapeneta o loo faaalia ai e faapea: “O lenei Tulafono Taufaaofi ua mafai ona toe iloiloina ai le ‘Tulafono o Solitulafono 1961’, ma ua silia i le limasefulu tausaga e lei toe iloiloina le Tulafono tuai lenei”.
Sa silasila toto‘a le Komiti e iloiloina Tulafono o Soligatulafono, lea na filifilia i le 2008, ma latou mauaina ai ni mataupu ma faafitauli i le Tulafono o le 1961.
O le tele o Vaega o lenei Tulafono o loo faaaogāina le gagana Peretania maotua.
E lē o atagia mai foi i le Tulafono itu tāua nei: suiga fou ua iai nei lo tatou atunuu; malamalama faatekonolosi faaonaponei; faiga faaterorisi; faalavelave fuafuaina e se faalapotopotoga; tupe feaveai faasolitulfono; faafoeina o se galuega a le Malo i ala faaalatua; fefaatauaiga o tamaiti ma tamaitai; fefaatauaiga o fualaau faasāina; fefaatauaiga o auupega; ma solitulafono faatekonolosi.
O le tuuina atu o lea lava tulafono tau faaofi, o loo aofia ai ma se fautuaga e faasino i aiā tatau o alii faafafine ma tamaitai faafatama.
O se fautuaga lea a le Komisi o aiā tatau a malo aufaatasi o loo faamalosia ai atunuu o le taupulega ina ia ave i ai le faatāua.
Peitai ua iai se finagalo o le Malo e lē faigofie mo Samoa ona o talitonuga faakerisiano ma talitonuga faalelotu o loo faavae ai le soifuaga o tagata.
O lea Tulafono Taufaaofi ua mafai ona toe iloiloina ai le “Tulafono o Solitulafono 1961”, ma ua silia i le limasefulu tausaga e lei toe iloiloina le Tulafono tuai lenei.
